Diospa yanapakuyninta David mañakusqanmanta
10
Dios Taytalláy
¿imanasqataq sayakuchkanki llumpay karu-karupiqa?
¿Imanasqataq pakakuchkanki sasachakuy tiempopiqa?
2 Mana allinllata ruraq runaqa
hatun tukuspanmi qatikachan ñakariqkunata.
Mana allinllata ruraq runaqa
trampa rurasqanpim hapirachikunqa pasaypaqta.
3 Mana allinllata ruraq runaqa
alabakunraqmi mana allin munapayallasqanmanta.
Kikillanpaqpuni munaq runaqa
ñakaykuspanraqmi despreciaykullachkan Tayta Diosta.
4 Mana allinllata ruraq runaqa
umantapas hoqariruspanmi Diosta mana maskaykunchu.
Mana allinllata ruraq runaqa
tanteaspapas Diosmantaqa manapunim yuyaykunchu.
5 Mana allinllata ruraq runaqa
ima rurasqanpiñapas allinpunim lloqsin haykapipas.
Manamriki entiendenchu reglamento rurasqaykitapas.
Despreciaykullanmi llapachallan enemigonkunatapas.
6 Chayna runam sonqonpipas tanteachkan:
“Manapunim haykapipas ñoqallayqa wichisaqchu” nispa.
“Manapunim haykapipas sasachakuykullasaqchu” nispa.
7 Mana allinllata ruraq runaqa
qacha siminwanmi pitañapas ñakaykarin llumpaysuta.
Llulla siminwanmi pitañapas engañaykun llumpaysuta.
Ñakaq siminwanmi pitañapas amenazan llumpaysuta.
Rimasqallanwanmi pitañapas ñakarichin pasaypaqta.
Rimasqallanwanmi pitañapas dañaykullan pasaypaqta.
8 Mana allinllata ruraq runaqa
llaqtachakunapim pitañapas wateqaypaq-wateqachkan.
Mana huchayoqtam pakakuspa wañuchiypaq-wañuchichkan.
Mana piyniyoqtam pakakuspa wateqaypaq-wateqachkan.
9 Mana allinllata ruraq runaqa
machayninpi pakakuchkaq leonpas hinaraqmi wateqachkan.
Wakcha runatapas hapirunanpaqmi wateqaykullachkan.
Hapiruspanmiki wakcha runatapas mallawan aysachkan.
10 Mana allinllata ruraq runaqa
leonpas hinaraqmi chintiparikuspan kurkuykacharichkan.
Mana piyniyoqpas wakcha runaqa
mana allinllata ruraqpapas makinmanmi wichiykuchkan.
11 Mana allinllata ruraq runaqa:
“Diosqa qonqarunñam wakcha runataqa” nisparaqmi nichkan.
“Mana qawaykunanpaqmi pakakurun” nisparaqmi nichkan.
12 Yupaychasqay Dios Taytalláy,
qamqa hatarispayá makikita hoqariykuy.
Wakchakunamantayá siemprepuni yuyariykuy.
13 ¿Imanasqamá despreciasunki mana allin runakunaqa?
¿Imanasqamá piensachkankupas mana allin runakunaqa:
“Manapunimá juzgawasunchu Tayta Diospas” nispankuraqqa?
14 Rikurqankimá ñakarichikuq mana allin rurallasqanta.
Qawarqankimá fastidiakuspa mana allin rurallasqanta.
Qawaspaykimá paymanqariki pagapunki merecesqanta.
Qamllamanñamá hapipakullan wakchayasqa runakunapas.
Qamllamanñamá amparakullan mana tayta-mamayoq kaqpas.
15 Brazontataqyá pakiparullay mana allin ruraqpatapas.
Cuentatataqyá mañaykurullay mana allin rurasqantapas.
Cuentatataqyá mañaykurullay tukusqaña kanankamapas.
16 Wiñaypaqñamá gobiernallachkan Tayta Diosqa maykunapipas.
Allpanmantamá wischuchikunqa llapachallan nacionkunapas.
17 Dios Taytalláy,
uyarichkankim ñakarillaqpa tukuy mañakullasqanta.
Uyariykusqa kanankupaqmi preparanki sonqonkuta.
18 Dios Taytalláy,
ruraykullankim arreglotapas mana piyniyoqkunapaq.
Ruraykullankim arreglotapas wakchayaykusqakunapaq.
Allpa runaqa ama pitapas llumpay mancharichinanpaq.