Tayta Diosqa allin arreglaq kasqanmanta Davidpa gracias qosqan
Takiqkunapa maestronpaq, Mut-laben tonopi Diosman Davidpa takisqan
9
Dios Taytalláy,
ñoqaqa graciastam qomullasqayki tukuy sonqoymanta.
Ñoqaqa nisaqmi llapachallanña milagroykimanta.
2 Ñoqaqa qamraykum llumpayllataña kusikullachkani.
Ñoqaqa qamraykum sinchillataña kusikullachkani.
Altopi kaptikim sutikimanta ñoqa takillani.
3 Cheqniqniy kaqkunam qepaneqmanña kutirikurunku.
Paykunam qamllapa ñawpaqnikipi kuchpakurullanku.
Paykunam qamllapa ñawpaqnikipi puchukarullanku.
4 Qampunim imapas arreglokuna ruraq kapuwanki.
Qampunim tiyaspa arreglollayta ruraykapuwanki.
Qampunim tiyaspa derechonpiraq arreglapuwanki.
5 Qamqa llapan nacionkunatamya qaqchaparurqanki.
Mana allin ruraqkunatamya puchukarachirqanki.
Sutinkunatapas wiñaypaqmi chinkarachirqanki.
6 Llapachallan enemigollayqa lliwmi tukurunña.
Paykunaqariki wiña-wiñaypaqmi chinkarunña.
Mana yuyarinapaqmi llaqtankupas chinkarunña.
7 Tayta Diosñataqmi wiña-wiñaypaqña gobiernachkan.
Juzgananpaqmiki payqa tiyananta alistachkan.
8 Allin arregloman hinam kay pachata juzgallanqa.
Allin munasqanman hinam runatapas sentencianqa.
9 Dios Taytalláy,
ñakarillaq runakunataqa qanmi amparanki.
Sasachakuy tiempokunapipas qanmi amparanki.
10 Dios Taytalláy,
reqsiqniki runaykikunapas qampim confiakunku.
Maskasuqnikiqa manam qonqasqachu kallanqaku.
11 Sionpi gobiernaq Tayta Diosmanñayá
llapallaykichik takillaychik.
Tukuy imapas rurasqanmantayá
runakunaman willallaychik.
12 Wañuchiqpa yawar chaqchusqantamá
manapunitaq qonqanqachu.
Ñakariqpa qayakullasqantamá
manapunitaq qonqanqachu.
13 Dios Taytalláy,
ñoqallaytayá llakipayaykuway.
Ñoqallaytayá qawariykullaway.
Cheqniqniykunaraykumá
ñoqallayqa ñakarillachkani.
Wañuy patanmantañamá
qampa horqoykusqan kallachkani.
14 Sion zaguan punkupimá ñoqallayqariki willakusaq.
Alabanaykumantamá llapallanta ñoqa willakusaq.
Salvawasqaykimantamá ñoqallayqariki kusikusaq.
15 Nacionkunam wichiykunku kikillankupa uchku rurasqankuman.
Chakinkupas wichiykuspam hapirachikun malla pakasqankuwan.
16 Tayta Diosqa reqsichikun arreglokuna allin rurasqanwanmi.
Mana allin rurallaqqa urmaykullanqa imam rurasqanmanmi.
(Higaion-Samariy)
17 Mana allinlla ruraqkunaqa apasqa kanqaku
wañuqkunapa kasqanmanmi.
Diosta qonqaruq nacionkunaqa apasqa kanqaku
wañuqkunapa kasqanmanmi.
18 Mana imayoqkunaqa manataqmiriki kanqa qonqallasqachu.
Manataqmi humildepa confianzallanpas kanqa chinkachisqachu.
19 Dios Taytalláy,
hatariykuspayá ama vencechikuychu mana valeq runawanqa.
Ñawpaqnikipiyá kachun nacionkunapas llumpayllaña juzgaykusqa.
20 Dios Taytalláy,
qamllapunitaqyá llumpa-llumpaysutaraq mancharichiy paykunata.
Yachachunkutaqyá wañuq runakunalla llapallanku kasqankuta.
(Samariy)