Diospa ancha reqsisqa kayninmantawan runapa hatunchasqa kasqanmanta
Takiqkunapa maestronpaq, Gat llaqtapi yachaqkunapa tononwan Diosman Davidpa takisqan
8
Hatu-hatun Dios Taytallayku,
¡qampa sumaq sutikiqa
kay tukuylla pachapiqa mayna reqsisqam!
¡Suma-sumaq kaynikiqa
mastakun cielokunapapas waklawninkamaraqmi!
2 Llapa wawakunapiwan
ñuñuqraq wawakunawanmi alabaykachikunki.
Qamqa atiynikiwanmi
enemigoykikunarayku chayta rurarullanki,
chaynapim enemigoykikunata upallachinki,
chaynapim vengativo kaqkunata upallachinki.
3 Qamllapa rurasqayki cielotapas qawarispaymi,
altopi churasqayki killatapas qawarispaymi,
altopi churasqayki lucerota qawarispaymi
4 ñoqallayqa tapukuni:
“¿Piraqtaq runaqa paymantaraq piensanaykipaq?
¿Pitaqsi mirayninpas paykunata yuyanaykipaq?”
5 Runataqa rurarqanki
angelkunamantapas tumpaniraq menostamriki.
Coronawan churaq hinam
paytaqa respetana runataraq ruraykullanki.
Coronawan churaq hinam
paytaqa ancha reqsisqallataña ruraykullanki.
6 Rurasqaykikunapim payta gobiernaykachirqanki.
Tukuylla imapapas hawanpimya churaykurqanki.
7 Ovejakunapipas qanmiriki munaychachinki.
Llapallan bueyespipas qanmiriki munaychachinki.
Munaychachinkitaqmi purun animalkunapipas.
8 Munaychachinkitaqmi pawaq animalkunapipas,
lamar qochapi kawsaq tukuy challwakunapiraqpas,
lamar qochanta tukuy ima puriqkunapiraqpas.
9 ¡Hatu-hatun Dios Taytallayku,
qampa sumaq sutikiqa
kay tukuylla pachapiqa mayna reqsisqam!