Tayta Diosllam allin juezqa
Benjaminpa miraynin Cus insultaruptinmi Tayta Diosman David tukuy sonqonwan kaynata takirqa.
7
Yupaychasqay Dios Taytalláy,
qamllapipunimá amparakuni sonqoymanta.
Salvaykullawayá lliw qatikachawaqniymanta.
Libraykullawayá lliw qatikachawaqniymanta.
2 Paykunaqa yanqam ñoqallaytaqa leon hina llikiparuwanman.
Paykunaqa yanqam mana pipapas librasqanta tisaparuwanman.
3 Yupaychasqay Dios Taytalláy,
sichum chaynata rurallasqayrayku culpayoq kallaptiyqa,
4 sichum ñoqawan hawka kaqman mana allinwan pagaptiyqa,
(Librarqanimá yanqapunimanta wateqawaqniytapas.)
5 qatiwaspanyá kikin enemigoy hapirullawachun
hinaspataqyá pampakunapipas saruparuwachun.
Pampamanraqyá honornillaytapas wikapaykuruchun.
(Samariy)
6 Dios Taytalláy,
ñoqapa favorniypiqa piñakuywanyá hatariy.
Piñakuq enemigoykunapa contranpiraqyá sayariy.
Ñoqapa favorniypiqa qampunitaqyá hatariy.
Ñoqapa favorniypiqa arreglotayá ruraykuy.
7 Llapallan naciontaqa qayllaykipiyá huñunay.
Altopi tiyaykuspayá paykunataqa gobiernay.
8 Dios Taytalláy,
qamqa kikikimá llapan runata
juzgaykullanki juicioman hina.
Allin arreglotayá ruraykullaway
allin sonqoyoq kasqayman hina.
Allin arreglotayá ruraykullaway
mana culpayoq kasqayman hina.
9 Allinlla ruraq Diosnilláy,
qanmi runapa piensasqanta reqsinki.
Qanmi runapa sonqontaqa reqsinki.
Tukuchunñayá mana allin ruraqkunapa rurasqankuqa.
Takyachisqayá kachun tukuy allintapuni ruraqkunaqa.
10 Altopi kawsaq Diosnilláy,
harkawaqniyqa qamtaqmiki kallanki.
Munasqaykipi kawsallaqtam salvanki.
11 Allinpunimá Diospa tukuy arreglokuna rurasqanqa.
Tukuy tiempomá piñakunki mana allinpa contranpiqa.
12 Pipas wanakuspa Diosman manapuni kutirikuptinqa,
paymi espadanta filoyaykachispan castigarullanqa.
Castigananpaqmi flecha arcontapas alistaykurunña.
13 Payqa rurakurullanñam wañuchina armakunatapas.
Payqa rurakurullanñam rupakuchkaq flechakunatapas.
14 Mana allin runaqa wiksayakuq warmi hinam kachkan.
Payqa huchallata wachakunanpaqmi nanaywanña kachkan.
Huchallikusqanmi runamasintapas ñakarichillanqa.
Wiksayakusqantam llullallatapuni wachakurullanqa.
15 Payqariki pozotaraqmi aspirunpas.
Payqa uku-ukutaraqmi uchkurunpas.
Payqariki uchkusqanmanmi wichiykunqa.
16 Runakuna ñakarichisqanmi kutiykunqa umallanman.
Daño rurasqanmi wichiykunqa paypa uma puyukninman.
17 Allin-allin kasqanraykum Tayta Diosman graciastataq qosaq.
Alto-altopiraq kawsaq Tayta Diostam alabaykullasaq.