Sasachakuy tiempokunapi Davidpa mañakusqanmanta
Takiqkunapa maestronpaq, cuerdakunawan Diosman Davidpa takisqan
6
Dios Taytalláy,
amayá qaqchallawaychu piñakuspaykiqa.
Amayá castigawaychu rabiakuspaykiqa.
2 Dios Taytalláy,
llakipayariykuwayá.
Ñoqaqa pasaypaq mana kallpayoq hinañamriki kachkani.
Dios Taytalláy,
qamqa hampiykullawayá.
Tulluypa chilinankamam pasaypaq mancharisqaña kachkani.
3 Dios Taytalláy,
ñoqaqa mancharikuspam katkatatachkani.
¿Haykaptaq ñoqallaytaqa yanapaykuwanki?
4 Dios Taytalláy,
kutiriykamuspayá libraykullaway.
Kuyapayawaspayá salvaykullaway.
5 Wañukuspaqa manapunim pipas qamtaqa yuyasunkichu.
Wañuqkunapa kasqanpiqa manam graciasta qosunkimanchu.
6 Ñoqallayqa amirunim llumpa-llumpayta waqaytapas.
Sapa tuta waqaspaymi nuyurachini sawnaytapas.
Weqeywanmi tuyturuni puñuykullasqay camaytapas.
7 Llumpay waqallasqayraykum rikukunñachu ñawillaypas.
Enemigoykunaraykum antallataña rikunipas.
8 Mana allinkuna,
asuy ñoqallaymanta.
Tayta Diosmi uyarirun waqallasqayta.
9 Tayta Diosmi uyarirun ruegakusqayta.
Tayta Diosmi chaskiykuwan mañakusqayta.
10 Llapallan enemigoykunam
penqakuspa llumpayllataña mancharikunqaku.
Llapallan cheqnillaqniykunam
qonqayllata penqakuymanta kutirikunqaku.