Diospa yanapakuynin mañakusqanmanta
Takiqkunapa maestronpaq, qenakunawan Diosman Davidpa takisqan
5
Dios Taytalláy,
uyariykuyá kay rimarillasqayta.
Dios Taytalláy,
entiendeykuyá kay quejakamusqayta.
2 Rey Diosnilláy,
uyariykuyá kay qaparillasqayta.
Qamllatañamá mañakamullachkayki.
3 Dios Taytalláy,
tutapaytamá uyariykullawanki.
Achikyaqtamá willakamullachkayki.
Suyachkanimá contestawanaykita.
4 Qamqa manam kanki mana allinkunalla munaq Dioschu.
Mana allin rurallaqpas manam qanwanqa yachanmanchu.
5 Manam sayanmanchu ñawpaqnikipiqa alabakuqqa.
Cheqnillankim llapan mana allin rurallaqkunataqa.
6 Dios Taytalláy,
llulla rimaq runakunataqa qamqa chinkarachinkim.
Wañurachiqtawan traicionakuqtaqa millakullankim.
7 Ichaqa kuyapayakuq kasqaykiraykum wasikiman yaykullani.
Ñoqaqa respetowanmi temployki lawman qawarispa yupaychayki.
8 Dios Taytalláy,
wateqaqniymantayá allin sonqoykiman hina pusallaway.
Yanapaykullawayá munasqallaykiman hina kawsanaypaq.
9 Paykunaqa mana cheqap rimaqmi kanku.
Sonqonkupi mana allin piensaqmi kanku.
Asnaq sepultura hinam rimasqankupas.
Llullakuspam paykunaqa rimachkankupas.
10 Dios Taytalláy,
sentenciaykuyá paykunaqa castigarusqaña kallanankupaq.
Paykunatayá mana allin tanteasqankumanta wichiykachiyña.
Paykunatayá mana allin rurasqankumanta wikaparuyña.
Contraykipimá paykunaqa mana kasukuqña kawsallachkanku.
11 Kusikuchunkuyá qampi amparakuy maskaq runakunaqa.
Kusikuymantayá wiñaypaqraq takichunku runakunaqa.
Qanmi allinta harkaykunki paykunataqa.
Chaymi qamrayku kusikunku kuyaqnikiqa.
12 Dios Taytalláy,
qamqa allinlla rurallaqtam bendeciykunki.
Qamqa kuyakuq kallaspaykim harkaykullanki.