Tayta Diospi hapipakuspa mañakusqanmanta
Takiqkunapa maestronpaq, cuerdakunawan Diosman Davidpa takisqan
4
Ñoqallaypa favorniypi alli-allin ruraq Diosnilláy,
qamta qayakuptiyá ñoqallaytaqa contestaykuway.
Ñakariypi kachkaptiymi yanapaykuwanki Diosnilláy.
Llakipayawaspayá mañakusqayta uyariykuway.
2 Llapa runakuna,
¿Haykapkamataq insultawankichik ñoqata?
¿Haykapkamataq kuyankichik yanqakunata?
¿Haykapkamataq maskankichik llullakuyllata?
(Samariy)
3 Yachaychikyá Tayta Diosqa
payman iñiqkuna akllakusqanta.
Yachaychikyá Tayta Diosqa
payta mañakuptiy uyariwasqanta.
4 Qamkunaqa katkatataywanraqyá
amaña mastaqa huchallikuychikchu.
Qamkunaqa upallaspaykichikyá
camaykichikpipas yuyaymanaychiktaq.
(Samariy)
5 Animalkunata wañuchispayá
sonqomanta ofreceychik.
Qamkunaqariki Tayta Diospiyá
allinneqta confiakuychik.
6 Dios Taytalláy,
achka-achkallañamya rimaspa runakuna nillachkanku:
“¿Pitaq kusichiwachwan allinta ñoqanchikta?”
nispanku.
Dios Taytalláy,
allin ñawikiwanyá qampuni qawariykamullawayku.
7 Hatun kusikuytamya ñoqapa sonqollayman churaykunki.
Achka trigomantapas aswan mas Kusikuytam qoykuwanki.
Uvas aqamantapas aswan mas Kusikuytam qoykuwanki.
8 Ñoqallayqa hawkalla siriykuspam chaypunilla puñurunipas.
Waqaychallawaptikim mana pipa imanasqan kawsakunipas.