Tayta Diospa yanapakuyninta David mañakusqanmanta
Churin Absalonpa qayllanmanta David lluptispan Diosman takisqan
3
Dios Taytalláy,
mayna achkallañamya enemigoykunaqa kachkanku.
Dios Taytalláy,
achka-achkallañamya contraypi kaqkunaqa kachkanku.
2 Achka-achka runamya kaynata ñoqamanta nichkanku:
“Diosqa manam paytaqa imamantapas salvaykunqachu.”
(Samariy)
3 Dios Taytalláy,
qanmi ichaqariki muyuriqniypi pakaykuwanki.
Ñoqallaytaqariki hatunchawankim,
kallpanchawankim.
4 Tayta Diostaqariki qapariywanmi qayakuchkani
chaymi sapaqchakusqan orqomantaraq contestaykuwan.
(Samariy)
5 Siriykuspaypas puñuruni Tayta Dios yanapawaptinmi.
Puñullaspaypas rikcharini Tayta Dios yanapawaptinmi.
6 Ñoqallaytaqa wañuchiwananpaq muyuykuwaptinkupas
manapuniñam manchakuniñachu tropantin runatapas.
7 Hatariyá Dios Taytáy.
Salvawayá Diosnilláy.
Ñoqallaypa enemigoykunataqa uyankunapipas maqapankim.
Mana allin ruraqkunapataqa kirunkunatapas pakipankim.
8 Tayta Dios,
qampunimá kallanki runakunapa salvaqnillanqa.
Tayta Dios,
llumpaytayá bendeciy lliw qampa runaykikunataqa.
(Samariy)