Diospa favorninpi Eliu sutiyoq runa rimarisqanmanta
34
Yapatawan rimarispanmi Eliu nirqa kaynata:
2 Yuyayniyoqkuna,
uyariychikyá
kay palabraykunata.
Yachayniyoqkuna,
atiendeychikyá
kay rimasqaykunata.
3 Malliykuspam yachanchik
mikuypa gustontaqa.
Chaynataqmi uyariykuspataq yachachwan
palabrakunapa allin otaq mana allin kasqantaqa.
4 Chaynaqa rimasqaykichikmantayá
razonninpi kaqta akllasunchik.
Hinaspayá allin kaqta
kikinchikpura yachasunchik.
5 Uyarisqanchikpi hinam Job nirqa kaynata:
“Ñoqaqa allin ruraq kaptiypas
Diosqa manamya ruraykapuwanchu allin arreglota.
6 Razonniypi kaptiypas llullakuqpaqmi hapiwan” nispa.
“Mana faltayoq kachkaptiypas
mana sanoyay atiq heridawanmi castigaruwan” nispa.
7 Chaynaqa ¿pi runataq kanman
Job hina Diosta burlakuq runaqa?
Sapa rato yaku tomachkaq
hinamiki burlakun Jobqa.
8 Payqa purikun mana allin
ruraqkunawanmi.
Payqa purikun mana allin
runakunawanmi.
9 Jobpa nisqanman hinaqa,
runaqa
manas imatapas horqokunchu
Dios agradayta munaspanqa.
10 Chaynaqa yuyayniyoq runakuna,
qamkunayá uyariwaychik.
Mana allin rurayqa
Diosmanta karunchasqayá kachun.
Hucha rurayqa
Tukuy Atiyniyoq Diosmanta karunchasqayá kachun.
11 Diosqariki runamanqa pagapun
imaynam rurasqanman hinam.
Diosqariki runamanqa qopun
imaynam kawsasqanman hinam.
12 Hinaptinqariki Diosqa manam
ruranmanchu mana allintaqa.
Hinaptinqariki Tukuy Atiyniyoq Diosqa
manam tikranmanchu allin arreglo ruraytaqa.
13 Diosmanqa manam pipas
kay pachataqa qoykurqachu.
Diosmanqa tukuy kay pachataqa
manam pipas churachikurqachu.
14 Sichum runata Dios nanachikuptinqa,
vidantawan samayninta kutichikuptinqa
15 llapallan runakunach tukurunman.
Runakunach allpaman kutiykunman.
16 Chaynaqa entiendeq kaspaykiqa
uyariwayá.
Chaynaqa uyarikuq kaspaqa
atiendewayá.
17 Sichum allin arreglo
rurayta Dios cheqnispanqa
manach atinmanchu gobiernaytaqa.
Chaynaqa yaqachum acusawaq
tukuy allin ruraq Atiyniyoq Diostaqa.
18 Payqariki reykunatapas ninmi:
“Qamkunaqa qara uyam kankichik” nispa.
Payqariki kamachikuqkunatapas ninmi:
“Mana allin ruraqkunam kankichik” nispa.
19 Payqa manam sayapakunchu
kamachikuqkunamanpas.
Payqa manam wakchata despreciaspanchu
apumanñataq sayapakunpas.
Paypa unanchasqallanmiki
kachkan apupas-wakchapas.
20 Runakunaqariki
qonqayllamantam wañukunku.
Runakunaqariki
chawpi tutatam wañukunku.
Paykunaqa katkatatarispam
ripukunku.
Manam runapa atiyninwanchu
llapa munaychakuqkunaqa qechusqa kanqaku.
21 Diosqa qawachkanmi
runakunapa imaynam kawsasqantaqa.
Diosqa rikuchkanmi
runakunapa imaynam purisqantaqa.
22 Mana allin ruraq runa pakakunanpaqqa
manam kanchu tutayaypas.
Mana allin ruraq runataqa
manam pakaykunmanchu
maynaña yanay-yanay tutayaypas.
23 Diosqa manam suma-sumaqtaraqchu
averiguanan runamantaqa
chaynapi runa payman rispa
juzgasqa kananpaqqa.
24 Diosqa manam averiguananraqchu
munaychakuqkunata urmachinanpaqqa.
Diosqa manam averiguananraqchu
paykunapa rantinpipas churananpaqqa.
25 Diosqa yachanmi
chay munaychakuqpa imam rurasqantaqa.
Payqa tutallan tikraparuspam
lliw ñutuparun paykunataqa.
26 Mana allin ruraqkunata hinam
payqa castigan.
Llapa runapa qawasqantam
payqa castigan.
27 Paykunaqa manañam qatirqakuchu
Diostaqa.
Paykunaqa manañam piensarqakuchu
Diospa munasqanman hina kawsaytaqa.
28 Chaynapim Diosman chayachirqaku
wakchakunapa qayakusqanta.
Chaymi Diosqa uyariykurqa
ñakariqkunapa qayakusqanta.
29 Sichum Dios upallakuykuptinqa
¿pitaq payta acusanman?
Sichum Dios uyanta pakaykuptinqa
¿pitaq payta qawanman?
Diosqa qawachkanmi nacionkunataqa.
Diosqa qawachkanmi runakunataqa
30 chaynapi Diosta mana yupaychaq runaqa
mana gobiernananpaq,
chaynapi runakuna engañaqqa
mana gobiernananpaq.
31 Ichaqa sichum Diosta
mana allin ruraq runa ninman kaynata:
“Huchallikurunim,
ñoqaqa
manañam huchallikusaqñachu
yapatawanqa.
32 Mana rikusqay faltaykunatayá
qawaykachiway” nispa.
“Sichum huchallikuruptiyqa manaña
ruranaypaqyá qawaykachiway” nispa.
33 ¿Qampa tanteasqaykiman hinachu
Dios pagasunaykita munachkanki?
Qamqariki paypa pagasusqaykitam
wischupakurunki.
Chaynaqa qanmi akllakunaykiqa.
Manam ñoqachu akllanayqa.
Hinaptinqa niwayá imam yachasqaykitaqa.
34 Yuyayniyoq runakunam
niwanqaku ñoqata.
Yachayniyoq runakunam
niwanqaku kaynata:
35 “Jobqa rimachkan manam yachaywanchu.
Jobqa rimachkan manam yuyaywanchu.
36 Ima allinraq kanman
Jobpa rimasqankuna allin tapusqa kaptinqa.
Mana allin runa hinam
hukmankunata payqa rimarqa.
37 Payqa huchallikuchkaspanpas
mana kasukuqraqmi rikurirun.
Payqa ñoqanchiktapas
kutipakuqñam rikurirun” nispa.
“Payqa Diospa contranpipas
llumpay rimaqmi rikurirun” nispa.