Eliu sutiyoq runawan Job qaqchachikusqanmanta
33
Chaynaqa Job,
kunanyá
uyariy kay palabraykunata.
Chaynaqa Job,
kunanyá
atiendey llapan rimasqayta.
2 Kunanqa ñam simiyta kichaykuniña.
Kunanqa ñam rimayta qallaykuniña.
3 Ñoqaqa rimarisaq
Diospa munasqanman hina piensaspam.
Yachasqaytaqa rimarisaq mana llullakuspam.
4 Ñoqataqa Diospa espiritunmi
unanchawarqa.
Ñoqamanqa Tukuy Atiyniyoq Diosmi
kawsayta qowarqa.
5 Atispaykiqa ñoqatayá contestaway.
Allinta preparakuspayá contestaway.
Ñawpaqniypi sayaykuspayá contestaway.
6 Ñoqapas Diospa qayllanpiqa
qam hinallam kani.
Ñoqapas mitumanta
unanchasqallam karqani.
7 Chaynaqa ñoqamantaqa
manam ima manchakunaykipas kanchu.
Ñoqaqa manam tanqaypaqqa
tanqasqaykichu.
8 Cheqaptapunim qamqa
qayllaypi rimarqanki.
Hinaptinmi kayna
nisqaykita uyarirqayki:
9 “Ñoqaqa mana huchayoqmi kani.
Ñoqaqa kani manam mana kasukuqchu.
Ñoqaqa kani mana culpayoqmi.
Ñoqaqa kani manam
mana allin ruraqchu.
10 Ichaqa Diosmi yanqamanta
cargochawan.
Diosqa yanqamantam
enemigonpaqña hapiwan.
11 Chakiykunatam cadenawan hina
chaqnaruwarqa” nispa.
“Maypim purisqaytapas
paymi cuidawarqa” nispa.
12 Manam allinpunichu chay rimasqaykiqa.
Diosqa aswan mas hatunmi runamantaqa.
13 ¿Imanasqataq qamqa churanakunki Dioswanqa?
Payqa manam cuentataqa qonmanchu imapas rimasqanmantaqa.
14 Diosqa achka formapim rimapayan runakunataqa.
Ichaqa manam cuentata qokunchu runaqa.
15 Diosqa rimapayakunmi mosqoypipas.
Rimapayakunmi tuta revelacionpipas.
Rimapayanmi puñuy hapiruptinpas.
Rimapayanmi camanpi puñuruptinpas.
16 Rinrillanpim rimapayan Diosqa.
Cheqapyachinmi amenazasqantaqa.
17 Chaynataqa rimapayan
mana allin rurasqankumanta kutirichinanpaqmi.
Chaynataqa rimapayan
orgulloso kayninta qechunanpaqmi.
18 Chaynapim Diosqa
runakunata libraykun sepulturamanta.
Chaynapim Diosqa
libraykun guerrapi wañunanmanta.
19 Diosqa corregintaqmi
camapi nanaykunawanpas.
Diosqa corregintaqmi
tullunkunapi mana taniq nanaykunawanpas.
20 Chaynapim runaqa
mikuytapas millakurunña.
Mayna miskiña kaptinpas
mikuytam millakurunña.
21 Chaynapim aychanpas
tukuchkan manaña rikurinankama
hinaspa mana rikuriq
tullunkunapas rikurinankama.
22 Paypa vidanqa
sepulturamanñam hichpaykuchkan.
Paypa vidanqa wañuqkunapa
kasqanmanñam hichpaykuchkan.
23 Ichaqa paypa ladonpi huk angel kaspaqa,
waranqa angelkunamanta huk allinyanachiq angel kaspaqa,
Diospa munasqanta rurananpaq
chay runata rimapayaq angel kaspaqa
24 chay runamanta llakipayarikuspanyá
Diosta nichun kaynata:
“Sepulturaman ama yaykunanpaqyá
libraykuy kay runata” nispa.
“Vidanpa rantinpim
tariruniña huk pagota” nispa.
25 Hinaptinqa aychallanpas
rikurirunqa mozo kasqanpi hinaraqchá.
Hinaptinqa rikurirunqa
mozo kasqanpi hina kallpayoqraqchá.
26 Diosta ruegakuptinmi
payqa chaskiykunqa.
Kusikuywan qaparispam
Diospa uyanta rikuykunqa.
Runaqa ñawpaq hina allin ruraq kananpaqmi
Diosqa payman kutichipunqa.
27 Chaynataqmi chay runaqa
llapa runakunaman ninqataq kaynata:
“Ñoqa huchallikuruchkaptiypas
Diosqa manam merecesqayman
hinachu castigaruwan.
Diospa munasqanman hina
mana kawsachkaptiypas
payqa manam merecesqayman
hinachu castigaruwan.
28 Aswanraqmi payqa
sepulturaman rinaymanta
vidallayta libraykuwan.
Kunanqa achkiyta
qawaspay kawsakunaypaqñam
libraykuwan.”
29 Chaynaqa tukuy kaykunatam
Diosqa runawan ruran.
Iskay otaq kimsa kutikamam
Diosqa chaynata ruran.
30 Chaynatam ruran runata
wañuypa patanmantaña kutichinanpaq.
Chaynatam ruran wakin kawsaqkunata hina
achkiyninwan kancharinanpaq.
31 Tayta Job,
qamqa
allintayá uyariykuway.
Ñoqa rimanaypaqyá
upallalla uyariykuway.
32 Sichum imapas niwanayki kaptinqa
kunanyá niway.
Munachkanim allin ruraq kasqayki yachaykuyta,
chaynaqa qamyá rimapayaway.
33 Mana chayna kaptinqa
uyariway ñoqata.
Mana chayna kaptinqa upallayá,
yachachisqaykim allin yachayta.