Eliu sutiyoq runa Jobta contestasqanmanta
(Job 32–37)
32
Jobqa allin ruraq kasqanpaq hapikusqanraykum chay rimaqmasinkuna manaña imatapas nirqakuchu.
2 Hinaptinmi Eliu sutiyoq runa Jobpa contranpi piñakururqa.
Payqa piñakururqa Jobqa mana huchayoqpaq hapikuspan Diosta culpaptinmi.
Eliu sutiyoq runaqa karqa Baraquelpa churinmi.
Baraquelñataqmi karqa Buz casta Ram sutiyoq runapa miraynin.
3 Eliu sutiyoq runaqa piñakururqataqmi Jobpa chay kimsan amistadninkunapa contranpipas.
Paykunamá imallatapas manaña nispanku Jobta mana allin ruraqpaq hapirqaku.
4 Eliu sutiyoq runaqa paykunamanta sullkaraq kaspam rimananpaq listollaña suyarqa.
5 Chay kimsa runakuna manaña Jobta niyta atiptinkum paykunapa contranpi Eliuqa piñakururqa.
6 Chaynapimá Buzpa castan Baraquelpa churin Eliuqa rimarirqa kaynata:
Qamkunaqa machu señorkunaña kaptikichikmi,
ñoqaqa mozollaraq kaspaymi
manchakurqani yachasqaykuna rimariyta.
7 Ñoqamá piensarqani kaynata:
“Machu runakunayá puntataqa
rimachunku” nispa.
“Achka watayoqkunayá puntataqa
yachayta yachachichunku” nispa.
8 Seguroch Diosmanta hamuq espiritu
runapiqa kachkan.
Seguroch Tukuy Atiyniyoq Diospa pukuriynin
runataqa entiendechichkan.
9 Manam yuyaqkunallachu yachayniyoqqa kanku.
Manam machukunallachu allin kaq entiendeqqa kanku.
10 Chaymi nikichik:
“Ñoqatayá uyariwaychik.
Yachaytam ñoqapas yachachisqaykichik.”
11 Ñoqam atienderqani rimasqaykichikta.
Ñoqam uyarirqani yuyaymanaspa rimasqaykichikta.
Ñoqam suyarqani allin palabrakuna maskasqaykichikta.
12 Ñoqaqa sumaqtam uyarirqani
qamkunapa rimasqaykichikta.
Ichaqa mayqannikichikpas
manam atirqankichikchu Job convencechiyta.
Ichaqa mayqannikichikpas
manam atirqankichikchu Job rimapayayta.
13 Yachaysapapaq mana hapikunaykichikpaqmi
mana runachu contestanqa aswanqa Diosmi.
14 Jobqa manam imatapas rimapayawarqachu.
Ñoqapas contestasaqqa
manataqmi qamkunapa rimasqaykichikman hinachu.
15 Tayta Job,
paykunaqa kachkanku
mancharisqañam.
Paykunaqa kachkanku qamta mana
rimapayay atiqñam.
Paykunapaqa palabrankupas tukurunñam.
16 Chaynaqa ¿ñoqapas suyasaqchum
paykuna upallarusqanrayku?
Chaynaqa ¿ñoqapas suyasaqchum
sayaruspa manaña rimapayasusqaykirayku?
17 Manam,
ñoqaqa kikiypa
parteymantam nisqayki.
Ñoqaqa yachasqaytam
qanman rimapayasqayki.
18 Sonqoymi huntallaña kachkan rimanaypaq.
Manam aguantayta atiniñachu rimanaypaq.
19 Vino timpuchkaq hinam
ñoqapa sonqollay timpuchkan.
Mosoq odre llikikuruchkaqña hinam
ñoqapa sonqollay llikiruq hinaña kachkan.
20 Chaynaqa hawkayarinaypaqmi
ñoqaqa rimarisaq.
Chaynaqa qamta contestanaypaqmi
simiyta kicharisaq.
21 Pimanpas mana sayapakuspaymi
rimarisaq.
Pitapas mana alabaspaymi
rimarisaq.
22 Ñoqaqa manam yachanichu
runa alabaytaqa.
Chaynata ruraruptiyqa unanchawaqniychá
qarqoruwanman ñoqataqa.