Mana huchayoq kasqanmanta Jobpa rimarisqanmanta
31
Kikiypunim contratota rurarqani
doncellakunataqa mana qawapayanaypaq.
2 Hanaq pachapi kaq Diosqa
¿ima premiotataq runamanqa qonman?
Tukuy Atiyniyoq Diosqa
¿ima herenciatataq altomanta qomunman?
3 ¿Manachum llakikuytaqa
qonman mana allin runakunaman?
¿Manachum sasachakuytaqa
qonman mana allin ruraqkunaman?
4 ¿Manachum Diosqa qawanman
imaynam purisqayta?
¿Manachum Diosqa yupanman
lliw ichisqaykunata?
5 Ñoqaqa juranim
mana engañowan rurasqaymanta.
Ñoqaqa juranim apuraspay
mana pitapas engañasqayta.
6 Mana engañakuq balanzapi
pesachkaq hinayá
kikin Diospuni allinta juzgaykuwachun.
Payqa mana huchayoq kasqaytayá
yachachun.
7 Sichum allin ñanmanta
rakikuruptiyqa,
sichum ima mana allinmanpas
makiykuna chapukuruptinqa
8 tarpusqaytapas hukñayá mikukuchun.
Tarpusqaypa rurunpas pilapasqayá kachun.
9 Sichum sapaq warmiwan
engañarachikuptiyqa,
sichum vecinoypa punkunpi
payta wateqaptiyqa
10 kikiypa warmiypuniyá
hukpaqña kawsayta kutapakuchun.
Mana reqsisqay runañayá
paywan puñukuchun.
11 Chaynata ruraruptiyqa
¡mayna huchach kanman!
Chaynata ruraruptiyqa
¡mayna castiganapaqcha kanman!
12 Chaynata ruraruptiyqa kanman
uku pachakama rupaspan yaykuq nina hinach.
Chaynata ruraruptiyqa kanman
tarpukusqaypa sapinkama ruparuq nina hinach.
13 Sichum sirvienteykuna reclamawachkaptin
despreciarqani paykunapa derechonta,
sichu sirvientaykuna reclamawachkaptin
despreciarqani paykunapa derechonta
14 hinaptinqa ¿imatataq ruraykullayman
Diospuni contraypi hatariruptinqa?
hinaptinqa ¿imatataq contestallayman
Diospuni tapuykuwaptinqa?
15 Ñoqapas-paykunapas mamaykupa wiksanpi
Diospa unanchasqallanmi kanikuqa.
Ñoqapas-paykunapas mamaykupa wiksanpi
sapallan Diospa rikurichisqanmi kanikuqa.
16 Wakchakunapa mañakuwasqantaqa
manam negarqanichu.
Viudatapas aminankama waqaqtaqa
manam qawakurqanichu.
17 Mikuspayqa manam sapallaychu
mikurqani.
Mikuspayqa mana tayta-mamayoqmanmi
haywaykuq kani.
18 Ñoqaqa mozo kasqaymantaraqmi
mana tayta-mamayoqkunapaq taytan hina karqani.
Ñoqaqa warma kasqaymantaraqmi
viudakunata yanaparqani.
19 Pipapas mana pachan kaptin
wañunayachkaqta rikuspayqa,
pipapas tapakuykunanpaq
mana imanpas kaptinqa
20 ñoqam ovejaykunapa millwanwan
qoniykachirqani paytaqa.
Hinaptinmi payñataq
bendecisqa kanaypaq mañapuwarqa.
21 Mana tayta-mamayoqtaqa
manam amenazarqanichu.
Payta amenazanaypaqqa
reqsisqay autoridadkunamanqa
manam hapipakurqanichu.
22 Kay rimasqaykuna mana cheqap kaptinqa
rikraypas wasaymantayá chutakuruchun.
Kay rimasqaykuna mana cheqap kaptinqa
brazoypas hombroymantayá pakikuruchun.
23 Ñoqallayqa Diospa castigontam manchakurqani.
Atiyninta qawachkaspaqa manam kaykunataqa
rurayta atiqchu kani.
24 Manam haykapipas qoripiqa
hapipakurqanichu.
Manataqmi:
“Qanmi hapipakunayqa
kanki” nispayqa nirqanichu.
25 Kusikuyniytaqa manam churarqani
llumpay apu kasqaypichu.
Kusikuyniytaqa manam churarqani
llumpay qollqe ganasqaypichu.
26 Rikurqanim intipa kancharisqanta.
Rikurqanim killapa sumaqllaña achkirisqanta.
27 Ichaqa piensaspallaypas
manam engañasqachu karqani.
Manataqmi muchapayaspaypas
adoraqchu karqani.
28 Chaynata ruraruptiyqa
¡mayna castiganapaqcha kanman!
Chaynata ruraruptiyqa
Altopi kaq Diosta negaycha kanman.
29 Pipas cheqniwaqniy llakipa hapisqan kaptinqa
manam kusikurqanichu.
Cheqniwaqniyta ima mana allinpas pasaruptinqa
manam kusipayarqanichu.
30 Ñoqaqa manam munarqanichu
simiy huchallikunantaqa.
Ñoqaqa manam ñakarqanichu
paypa wañunanta munaspayqa.
31 Wasiypi yachaqkunam ñoqamanta
nirqaku:
“¿Pitaq Jobpa mikunanmanta
mana saksaykurqachu?”
nispa.
32 Manam hawapichu puñuchiq kani
forastero runataqa.
Wasiytaqa kichaykuqmi kani
puriq runamanqa.
33 Wakin runa hinaqa
manam taparqanichu
mana kasukusqaytaqa.
Wakin runa hinaqa
mana allin rurasqaytaqa
manam pakarqanichu sonqoypiqa.
34 Chay huchakunataqa mana rurasqayraykum
mana manchakurqanichu
chay huñunasqa runakunataqa.
Chay huchakunataqa mana rurasqayraykum
mana hukmanyarqanichu
aylluykunapa despreciawananmantaqa.
Chay huchakunataqa mana rurasqayraykum
upallakuykuspay mana lloqsirqanichu punkuymantaqa.
35 ¡Ima allinraq kanman
pipas uyariykuwaptinqa!
Kay firmaywanmi
defiendekuni asuntoytaqa.
Tukuy Atiyniyoq Diosyá
contestawachun ñoqataqa.
Acusawaqniyqa qellqaspayá
denunciawachun ñoqataqa.
36 Hinaptinqa chaytam apasaq
hombroypi sutillata.
Umaypi coronata apachkaq
hinam apasaq sutillata.
37 Tukuy ima rurasqaymantam
ñoqaqa Diosman cuentata qosaq.
Ñoqaqa ancha reqsisqa kamachikuq hinam
payman asuykusaq.
38 Chakraypi runakunapas manam
contraypiqa qaparirqakuchu.
Chakraypi yapuqkunapas
manapunim waqarqakuchu.
39 Paykunapa cosechasqankutaqa
manam mikurqani debaldellachu.
Chakrapi llamkaqkunataqa
manam hukmanyachirqanichu.
40 Sichum chaykunata ruraruptiyqa
trigo wiñananmantayá
chakraypipas kichkaña wiñachun.
Sichum chaykunata ruraruptiyqa
cebada wiñananmantayá
chakraypipas qoraña wiñachun.
Chaykunata rimarispanmá Jobqa tukurqa defiendekusqanta.