Yachayqa maypim tarikusqanmanta
28
Qollqe horqonapaqqa
kanmi minakuna.
Qorita chuyanchanapaqqa
kanmi sitiokuna.
2 Fierrotaqa horqona
allpa ukumantam.
Cobreta chulluchispaqa
rakina rumimantam.
3 Runaqa achkiymanñam
tikrarun tutayaytapas.
Payqa kuchun-kuchunmi
maskan metalniyoq rumikunatapas.
Payqa maskanmi tutayayña kaptinpas.
Payqa maskanmi sinchillaña tutayay ukukunapipas.
4 Minatam toqonku runakunapa
mana yachananpi.
Minatam toqonku runakunapa
mana purinanpi.
Runakunapa kasqanmanta karupim
waskakunawan warkuchikuspa llamkanku.
Paykunaqa kaynaman-waknamanmi
waskakunawan wayuchikuspa aywiykachachikunku.
5 Kawsaykunatam qespichin
kay pachapa hawan allpaqa.
Ichaqa ninawan tukusqa hinam
kachkan chaypa ukunqa.
6 Chay allpapa ukun rumikunapim tarikun
safiro sutiyoq alhaja rumikunapas.
Chay allpapitaqmi tarikun
qori rumikunapas.
7 Chaykunaman riq ñantaqa
manam rikurqachu wamankunapas.
Chaykunaman riq ñantaqa
manam reqsirqachu ankakunapas.
8 Manchakuypaq animalkunapas
manam chaynintaqa purinchu.
Leonkunapas manam chaynintaqa pasanchu.
9 Hina rumi kaptinpas runaqa
qaqatam uchkun kallpallanwan.
Qaqallaña kaptinpas runaqa
orqotam wikutin kallpallanwan.
10 Runaqa toqon qaqay-qaqay rumikunatam.
Payqa tarin tukuy suma-sumaq kaqkunatam.
11 Payqa mayupa toqyasqan
pukyukunatam qochacharun.
Pakasqa kaqkunatam
lliwpa qawanantaña rurarun.
12 Ichaqa ¿maymantamá hamun yachayqa?
¿Maypimá kachkan entiendeyqa?
13 Runaqariki mayna valorniyoq
yachay kasqantaqa manam yachanchu.
Yachayqariki tarikun manam
runakunapa kawsasqan kay pachapichu.
14 Uku-uku lamar qocham nin:
“Yachayqa manam tarikun kaypichu” nispa.
Chaynataqmi lamar qochapas nin:
“Kaypipas manataqmi tarikunchu” nispa.
15 Yachaytaqa manam qoriwanchu rantina.
Yachaytaqa manam qollqewanchu pagana.
16 Qoripurowanpas yachaytaqa
manam tupachichwanchu.
Onice alhaja rumiwanpas yachaytaqa
manam tupachichwanchu.
Safiro alhaja rumiwanpas yachaytaqa
manam tupachichwanchu.
17 Qoriqa manam igualanmanchu
yachaymanqa.
Sumaqllaña cristalpas
manam igualanmanchu yachaymanqa.
Qori-puromanta alhajakunapas
manam igualanmanchu yachaymanqa.
18 Coral alhaja rumitaqa
manam qawarinapasñachu.
Cristal rumitaqa
manam qawarinapasñachu.
Yachaypa llumpay valesqanman hinaqa
perlaskunapas manam ancha valenchu.
19 Cus nacionmanta hamuq
topacio sutiyoq alhaja rumipas
manapunim yachaymanqa igualanchu.
Qori-purowanpas manapunim
yachayqa rantisqaqa kanmanchu.
20 Chaynaqa ¿maymantamá hamun yachayqa?
Chaynaqa ¿maypimá kachkan entiendeyqa?
21 Yachayqa llapa kawsaqkunapa ñawinmanta
pakasqam kachkan.
Yachayqa alton pawaq animalkunamantapas
pakasqam kachkan.
22 Uku pachapas rimachkaq hinam nin:
“Yachaymantaqa uyayllam-uyarirqani” nispa.
23 Diosllam reqsin
chay yachaypa ñannintaqa.
Diosllam yachan chay yachaypa
maypim kasqantaqa.
24 Diosqa qawanmi kay pachataqa
cantonmanta cantonkamapas.
Diosqa rikunmi cielopa ukunpi
kaqkunatapas.
25 Wayraman Dios kallpata qospanqa,
yakupaq Dios medidanta churaspanqa,
26 parananpaq kamachikuykunata qospanqa,
llipyayllawanña rayokunapa ñanninta kichaspanqa
27 qawarqataqmi yachaytapas.
Willakurqataqmi chay yachaymantapas.
Chaynapim payqa mana
tukuqpaq churarqa.
Sumaqta qawapaykuspanmi
chaskirqa chaytaqa.
28 Hinaspam runataqa
Dios nirqa kaynata:
“Runa yachayniyoq kananpaqqa
ñoqa Señortam respetawanan.
Runa allin entiendeq kananpaqqa
mana allinmantam rakikunan.”