Mana allin runakuna castigasqa kananmanta
27
Jobmi yapatawan nirqa:
2 Derechoyta qechuruwaptinpas
kawsaq Diosraykum jurani.
Llakichiwaptinpas
Tukuy Atiyniyoq Diosraykum jurani.
3 Tukuy tiempo kawsanaykamaqa
Diospa qowasqan samayniy kanankamaqa
4 manam mana allintaqa
rimasaqchu ñoqaqa.
Qalluypas manataqmi
rimanqachu llullataqa.
5 Kawsanaykamaqa manapunim upallasaqchu
mana huchayoq kasqaymanta rimaytaqa.
Manapunim chaskisqaykichikchu
qamkuna cheqap rimaq kasqaykichikpaqqa.
6 Allin ruraq kasqaymantaqa
mana kachakuykuspam defiendekusaq.
Kawsanaykamaqa sonqoypapas
mana qaqchasqanmi ñoqaqa defiendekusaq.
7 Mana allin ruraqkuna hina
castigasqayá kachun enemigoykunaqa.
Mana allin runakuna hina
castigasqayá kachun contraypi sayariqkunaqa.
8 Diosta mana respetaq runaqa
¿imapitaq confiakunman
Diospa wañurachisqan kaspanqa?
Diosta mana respetaq runaqa
¿imapitaq confiakunman
Diospuni kawsayninta qechuruptinqa?
9 Diosqa ¿yaqachum payta uyarinman
sasachakuykuna payman hamuptinqa?
10 Payqa manam kusikuytaqa tarinchu
Tukuy Atiyniyoq Diospiqa.
Payqa manam sapa punchawchu
qayakun Diostaqa.
11 Ñoqam yachachisqaykichik atiyninwan
imaynam Diospa rurasqanmantaqa.
Manam pakasqaykichikchu
Tukuy Atiyniyoq Diospa ruray munasqanmantaqa.
12 Chaynaqa llapallaykichik rikuchkaspaqa
¿imanasqataq rimankichik yanqakunataqa?
13 Mana allin ruraqpaq
Diospa waqaychasqan castigoqa kaynam,
daño ruraq runakunapa
Diosmanta chaskisqanku herenciaqa kaynam:
14 Churinkunaqa maynataña miraspapas
guerrapim wañurunqaku.
Mirayninkunaqa maynaña kaspapas
mikuymanta yarqasqam kanqaku.
15 Paykunamanta puchuqkunañataqmi
peste onqoywan wañuspa pampasqa kanqaku.
Hinaptinmi viudakunapas paykunamanta
manaña waqaspa upallakuykunqaku.
16 Mana allin ruraq runaqa
allpata hinaña qollqeta huñukuruptinpas,
mana allin ruraq runaqa
mituta hinaña pachata ruraruptinpas
17 chaywanqa pachakunqa
allin ruraq runakunam.
Chay qollqetaqa rakinakunqa
mana huchayoq runakunam.
18 Mana allin ruraq runaqa
pacha tukuq puyu hinallam
wasinta rurakurun.
Mana allin ruraq runaqa
chakrapi cuidaqpa hatusninta
hinallam wasinta rurakurun.
19 Chayna runaqa chay tutallapaqñam
apullaña puñuykun,
ichaqa rikchariruspanqa
mana imayoqñam rikurirun.
20 Paytaqa manchakuymi aparunqa
lloqlla hina.
Paytaqa tutapi wayra param
aparunqa suwa hina.
21 Paytaqa intipa qespimunan
lawmanta wayra pukumuqmi pasachikun.
Paytaqa vientom
wasinmanta hoqariruspan seqaykachikun.
22 Wayraqa mana llakipayarispam
paypa contranpi pukunqa.
Atiyninmanta ayqeyta munaptinpas
wayraqa paypa contranpim pukunqa.
23 Taqllakuspa asipayachkaq hinam
paymantaqa viento burlakunqa.
Silbakuspa burlakuchkaq hinam
vientoqa maymi kasqanmanta aparunqa.