Diosqa Tukuy imapi munaychakuq kasqanmanta
26
Jobñataqmi nirqa:
2 ¿Imapitaq yanaparqanki
mana kallpayoq runata?
¿Imaynatataq librarqanki
eqoyasqa runata?
3 ¿Yaqachum allin consejollatapas
qorqanki mana yuyayniyoq runaman?
¿Yaqachum allin yachayta
yachachirqanki chayna runakunaman?
4 ¿Pipa yanapakuyninwantaq
rimarirqanki chay palabrakunata?
¿Pi rimachisuptikitaq
qamqa rimarqanki chaynata?
5 Wañuqkunapa almanmi
yakukunapa ukunpi qewikachakuchkan.
6 Diospa qayllanpiqa
wañuqkunapa kasqanpas sutichallam kachkan.
Paypa qayllanpiqa uku pachapas
manam pakasqachu kachkan.
7 Diosmi norte lawpi cielokunata
mastarirqa mana imapa kasqanpi.
Kay pachatam warkusqata
hina churarqa mana imapa hawanpi.
8 Payqa puyukunapim
wichqarun yakukunatapas.
Yakupa llasayninwanqa manamya
llikirunchu puyukunapas.
9 Payqa poqosqa killapa
uyantam puyunkunawan tapaykun.
Pañolonwan tapachkaq hinam
puyunkunawan tapaykun.
10 Lamar qochapa muyuriqnintam
Diosqa churaykun linderopaq
chaykamalla achkiy chayananpaq,
hinaspañataq chaymanta
tutayay qallaykunanpaq.
11 Cielokunapa pilarnin orqokunam
katkatatan Diospa qaqchakuyninwan.
Mancharikuchkaq hinam
katkatatanku Diospa qaqchakuyninwan.
12 Diosqa kallpanwanmi
lamar qochata hawkayachin.
Payqa allin tanteayninwanmi
Rahab animalta ñutuparuspan chinkarachin.
13 Pukusqanwanmi cielokunata
puyumanta limpiarun.
Makinwanmi lluchkay-lluchkay culebrata
payqa tuksirun.
14 Chaykunaqa
rurasqankunapa wakillanmi.
Kay uyarisqanchikqariki
upallalla rimarisqapa aschallanmi.
Hinaptinqa ¿pitaq entiendenman
nisyullay-nisyuta qapariptinqa?