Tukuykunallanpaqña Job defiendekusqanmanta
(Job 29–31)
29
Jobmi nirqataq:
2 ¡Ima allinraq kanman
ñawpaq killakunapi hina rikuriruptiyqa!
¡Ima allinraq kanman
Diospa waqaychawasqan punchawkunapi hina rikuriruptiyqa!
3 Chay tiempokunapiqa paypa achkiyninwan
kanchaykusqam kaq kani.
Chay tiempokunapiqa kanchaykuwaptinmi
tutayaypipas puriq kani.
4 ¡Ima allinraq kanman
kallpaypi hinaraq rikuriruptiyqa!
Chay tiempokunapiqa
favorecewaspam Diospuni wasiytapas waqaycharqa.
5 Chay tiempokunapiqa
Tukuy Atiyniyoq Diospunim ñoqawan karqa.
Chay tiempokunapiqa
churiykunapas muyuriqniypim ñoqawan karqa.
6 Chay tiempokunapiqa
lechepa llukllunpas yanqaña kaptinmi
chaypa hawantaña purirqanipas.
Chay tiempokunapiqa rumikunapa hawantaraqmi
puririrqa aceiteypas.
7 Llaqtapa zaguanninpi
huñunakuyman riptiymi
hinaspa chay huñunakuypi
tiyaykuptiymi
8 mozokunapas rikuykuwaspan
respetowan huk lawman pasakuqku.
Yuyaq runakunapas
sayariykuspam rimaykuwaqku.
9 Kamachikuqkunapas rimachkaspankum
qonqayta upallaykuqku.
Paykunaqa makinkuwanmi
siminkuta tapakuqku.
10 Jefekunapas rimachkaspankum
upallaytaña qallaykurqaku.
Qonqaytam wata qalluña
rikurirurqaku.
11 Uyariwaqniykunam
ñoqataqa alabawaqku.
Qawaqniykunam ñoqamanta
allinta rimaqku.
12 Ruegakuwaqniy ñakariqtaqa
ñoqam librarqani.
Mana pipapas nanachikusqan
mana piyniyoqtam ñoqaqa yanaparqani.
13 Pasaypaq wakchayaruq runapas
graciastam ñoqaman qowarqa.
Yanapasqaywanmi viudapas
kusikuywan takirqa.
14 Sapa punchaw pachakuchkaq hinam
allin ruraytaqa ruraq kani.
Sapa punchaw punchukuchkaq hinam
allin arreglotaqa ruraq kani.
Sombrerokuchkaq hinam
allin arreglotaqa ruraq kani.
15 Ñawsapa ñawinkuna hinam
ñoqaqa karqani.
Suchupa chakinkuna hinam
ñoqaqa karqani.
16 Wakchakunapa taytanmi
ñoqaqa karqani.
Mana reqsisqaypa asuntonpi preocupakuqmi
ñoqaqa karqani.
17 Mana allin runapatam ichaqa
kirunkunatapas pakiparqani.
Siminmantañam hapisqantapas
horqoq kani.
18 Ñoqam piensarqani kawsasqay punchawkunaqa
aqo hinaña kananmanta.
Ñoqam piensarqani
wasiypipuni wañukunaymanta.
19 Ñoqam piensarqani
yakupa patanpi sachapa sapin hina
allin kasqayta.
Piensarqanitaqmi
tutapi sulla chaskichkaq sacha hina
allin kasqayta.
20 Nirqanitaqmi runakuna
mana tukuyta alabawananmanta.
Nirqanitaqmi mosoq flechana hina
kallpayqa mana tukunanmanta.
21 Chay tiempopiqa llapa runakuna uyariwaspanmi
pacienciawan suyaqku.
Consejoykunata chaskinankupaqmi
paykunaqa upallaykuqku.
22 Rimayta tukuruptiyqa
manam pipas kutipawaqchu.
Sulla hina chayaykuq palabraykunataqa
manam wischupakuqkuchu.
23 Parata suyachkaq hinam
paykunaqa suyawarqaku.
Usyay tiempopi parata suyachkaq hinam
palabraykunata uyariqku.
24 Ñoqam paykunapaq asirirkurqani
manaña pimanpas confiakuptinku.
Paykunam chay favortaqa
mana despreciaspa chaskiqku.
25 Ñoqam paykunapa imaynam
purinanta tantearqani.
Paykunapa jefen kaspaymi
chawpinkupi tiyarqani.
Tropankunapa chawpinpi rey hinam
paykuna ukupi yacharqani.
Llakisqakunata consuelaq hinam
ñoqaqa paykunata consuelarqani.