Diosta mana imapas qokuptin Job quejakusqanmanta.
24
Tukuy Atiyniyoq Diosqa
¿imanasqataq juzgananpaq
tiempotaqa mana churanchu?
Payta reqsiqkunaqa
¿imanasqataq paypa
chay punchaw churasqantaqa
mana reqsinkuchu?
2 Mana allin runakunaqa
linderokunatam kuyurachinku.
Paykunaqa animalkunatam
suwakuspa michikunku.
3 Paykunaqa mana tayta-mamayoqpa
asnontam pusakunku.
Paykunaqa viudapa bueyesnintapas
prendapim apakunku.
4 Paykunaqa wakchakunatapas
ñanmantam wischunku.
Chaynapim paykunapa kasqan nacionpi
wakchakunapas lliw pakakunku.
5 Chay wakchakunaqa purun asnokuna hinam
wawankunapaq mikuy maskamuq lloqsinku.
Paykunaqa churinkunapaq
mikuytaqa chunniqllapim tarinku.
6 Paykunaqa huk runapa chakranpi
cosechapakuqñam rinku.
Paykunaqa mana allin ruraqkunapa
uvas huertanpi pallapakuqñam rinku.
7 Mana imapas qatayoqmi
tukuy tuta kallanku.
Tapakuykunankupaq mana imapas kaptinmi
chiripi ñakarillanku.
8 Orqokunapi parapas
nuyurullanmi paykunataqa.
Manaña imapas harkaykachikunankupaq kaptinmi
rumikunamanña asuykullanku paykunaqa.
9 Mana allin ruraqkunaqa mana taytayoq wawatam
qechurunku mamanpas ñuñuchkaptinraq.
Paykunaqa wakchakunamantam
prendakunata qechunku.
10 Wakchakunaqa mana pachanku kaptinmi
purillankupas yaqa qalallaña.
Paykunaqa trigotam qepillanku
yarqaymantapas yanqallaña.
11 Molinowan chamchaspam
horqonku aceiteta.
Yakunayachikustinmi vinopaq
sarunku pozopi uvasta.
12 Llaqtapi yachaq wakcha runakunam
ñakariypi kasqankumanta waqallachkanku.
Heridasqa runakunam
yanapakuyta mañakullachkanku.
Diosmi ichaqa
chay mana allin rurasqankumanta
mana acusanchu.
13 Wakin runakunaqa
achkiytam mana munankuchu.
Purisqankupi chay achkiy kanantaqa
manam munankuchu.
Chay achkiypa kanchasqan ñanpiqa
manam takyayta munankuchu.
14 Ñakariq runatawan wakcha runata wañuchinanpaqmi
runa wañuchiqqa tutapaytaraq hatarin.
Tutapas suwakunanpaqmi
payqa hatarin.
15 Warmin traicionaq runaqa
tutayananta suyaspam piensan:
“Manam pipas rikuwanchu” nispa.
Hinaspam payqa uyantapas pakan.
16 Suwakunaqa tutallan wasiman
yaykuruspam suwakunku.
Punchawqa lliwmi wichqakurunku.
Achkiy reqsiytapas manam
munankuchu paykunaqa.
17 Achikyaypas pasaypaq tutayay hinam
paykunapaqqa.
Pasaypaq tutayaytam kuyan paykunaqa.
18 Paykunaqa yakupa hawanpi
pusoqo hinallam kanku.
Paykunapaqa chakrankupas
ñakasqam kachkanku.
Manañam pipas rinñachu
uvas huertanmanpas.
19 Usyaywan rupayllaña kaptinmi
chulluruspan chinkarunña ritipas.
Chaynatapunim huchallikuqkunataqa
chinkarachinqa sepulturapas.
20 Suwakunataqa qonqarunqam
mamankupunipas.
Paykunaqa aycha urupa
miskillaña mikusqanmi kanqaku.
Paykunaqa pipapas mana
yuyasqanñam kanqaku.
Qorusqa sacha hinam
paykunaqa kanqaku.
21 Qolluq mana wachakuq warmitam
paykunaqa ñakarichirqaku.
Viuda warmitapas manam
allintachu paykunaqa rurarqaku.
22 Diosmi ichaqa kallpanwan
qarqorun atiyniyoqkunataqa.
Pay hatariruptinqa
manañam pipas seguroñachu vidanmantaqa.
23 Suwakunaman Dios confianzata
qoykuptinmi paykunaqa segurollaña kachkanku.
Ichaqa Diosqa qawachkanmi
imaynam paykunapa kawsasqantaqa.
24 Paykunaqa huk ratollapaqmi hoqarikunku.
Huk ratollapitaqmi chinkachisqapas kanku.
Wichqakuruq wayta hinam humillasqa kanku.
Trigo qorusqa hinam rikurirunku.
25 Mana chayna kaptinqa
¿pitaq llullakuqpaq kunan hapiwanman?
Mana chayna kaptinqa
¿pitaq rimasqaykunata yanqachanman?