Diospa qayllanpi Job defiendekuy munasqanmanta
23
Jobñataqmi nirqa:
2 Kunanpas sinchi llakikuywanmi
quejakuchkani ñoqaqa.
Kay llakikusqaypim
llumpay llasaqllaña rikurirun
Diospa ñitiwaqniy makinqa.
3 ¡Ima allinraq kanman
Diosta maypipas tariruptiyqa!
¡Ima allinraq kanman
paypa yachasqanman chayaruptiyqa!
4 Chayna kaptinqa paymanchá
willakuyman asuntollayta.
Chayna kaptinqa favorniypichá
willakuyman tukuy asuntoyta.
5 Chayna kaptinqa yachaymanchá
Diospa imam contestawasqanta.
Chayna kaptinqa entiendeymanchá
Diospa imam niwasqanta.
6 ¿Payqa tukuy kallpanwanchum
ñoqapa contraypi sayarinman?
Manam,
payqa aswanraqmi
uyariykuwanman.
7 Paypa munasqanman hina kawsaq runaqa
paywanchá rimanakunman.
Hinaptinqa juzgawaqniy runamantachá
wiñaypaqña librakuruyman.
8 Ichaqa intipa qespimunanmanña riptiypas
Diosqa manamá chaypichu.
Ichaqa intipa seqaykunanmanña rispaypas
Diostaqa manamá rikunichu.
9 Ichoq lawpi imata ruraptinpas
manam Diostaqa rikuykunichu.
Alleq lawman muyuriptinpas
paytaqa manamya qawaykunichu.
10 Payqa reqsinpunim
ñoqapa imaynam kawsasqaytaqa.
Pruebaman churaykuwaptinqa
qori hina chuyay-chuyaymi
lloqsisaq ñoqallayqa.
11 Paypa akllapuwasqan ñannintam
cuidadollawanña purirqani ñoqallayqa.
Yachachiwasqanta kasukuspaymi
manapuni pantarqanichu ñoqallayqa.
12 Paypa kamachikusqantaqa
mana qepanchakuspam kasukurqani.
Paypa rimarisqankunataqa
mikuy tupawaqniymantapas mastam waqaycharqani.
13 Payqa sapallanmi.
¿Pitaq cambiarunman paypa
tanteasqantaqa?
Payqa ruranpunim
imam munasqantaqa.
14 Payqa cumplinqapunim ñoqamanta
imam kamachisqantaqa.
Chayna piensasqankunaqa
achka-achkam kachkan paypa sonqonpiqa.
15 Chayraykum manchakuni paytaqa.
Piensarispallapas manchakunim ñoqallayqa.
16 Diosmi hukmanyarachin sonqollayta.
Tukuy Atiyniyoqmi mancharichiwan llumpa-llumpayta.
17 Manamá chinkaruniraqchu
tutayaypipas.
Manataqmi tutayayqa
taparunraqchu uyaytapas.