Jobta hatu-hatun huchallikuqpaq Elifaz qaqchasqanmanta
(Job 22–27)
22
Teman lawmanta kaq Elifazñataqmi Jobta nirqa:
2 ¿Yaqachum runaqa Diospaq
imallapipas servikunman?
Allin yachayniyoqña runa kaspapas
¿yaqachum Diospaq servikunman?
3 ¿Tukuy Atiyniyoq Diostaqa
kusichinchu allin ruraq kasqaykiqa?
¿Qampa allin kawsakusqaykiwanchum
payqa imallatapas allinta gananqa?
4 Payta respetasqaykiraykum
payqa mana qaqchasunkichu.
Payta respetasqaykiraykum
payqa juiciomanpas mana pusasunkichu.
5 Cheqaptaqa ancha mana allin runam
qamqa kanki.
Cheqaptaqa mana yupay atinañam
kachkan qampa mana allin rurasqayki.
6 Yanqapunim aylluykikunapa
pachanta prendapaq hapirqanki.
Chaynapim paykunataqa
qalallataña saqerurqanki.
7 Pisipasqamanmi yakuta
mana tomaykachirqankichu.
Yarqaymanta kaqmanpas
manam mikuykachirqankichu.
8 Chaywanpas qamqariki
chakrasapallaña munaychakuqmi kanki.
Chaywanpas qamqariki
chaypi yachaq ancha reqsisqam kanki.
9 Qamqariki viudakunatapas
mana imayoqtam kutichirqanki.
Qamqariki mana piyniyoqpa
makinkunatam chamcharurqanki.
10 Chayraykum kunanqa
lazollaña muyusuchkanki.
Chayraykum kunanqa
mancharikuyllaña hukmanyachisuchkanki.
11 Chayraykum manaña rikukunaykipaq
tutayayña muyuykusunki.
Chayraykum lloqllaq yakukunapas
pamparusunki.
12 ¿Manachum Diosqa
cielokunapa altonpiraq kachkan?
Lucerokunaqa mayna altopiña kaptinpas
chaykunapa altonpiraqmi payqa kachkan.
13 Chaywanpas qanmi ninki:
“Diosqa manam imatapas yachanchu.
Puyuy-puyuyllaña kachkaptinqa
manam juzgaytaqa atinmanchu.
14 Puyukuna tapaykuptinmi
manaña rikunchu payqa” nispa.
“Cielokunapa muyuriqninpim
purichkan payqa” nispa.
15 ¿Qampas munachkanki
ñawpa runakuna hina kawsaytachu?
¿Qampas munachkanki mana allin
runakuna hina kawsaytachu?
16 Paykunam manaraq wañunanku tiempopi
chinkachisqa karqaku.
Paykunaqa lloqllapa apasqan wasi hina
mana takyaqmi karqaku.
17 Paykunaqa Diostapas kaynatam nirqaku:
“Qamqa ñoqaykumantayá anchurikuy” nispanku.
Nirqakutaqmi:
“Tukuy atiyniyoq Diosqa
imanawachwantaq ñoqanchiktaqa” nispanku.
18 Chaywanpas paymi allinkunawan
huntaykachirqa paykunapa wasintaqa.
Chaymi ñoqallayqa manapuni qatipakusaqchu
mana allin ruraqkunapa tanteayninkutaqa.
19 Allin ruraq runakunam
qawaspanku kusikunqaku.
Mana huchayoq runakunam
burlakunqaku kaynata nispanku:
20 “Contranchikpi hatariqkunam
lliw tukusqaña kachkanku.
Imanku puchuqtapas ninam
lliwta ruparun” nispanku.
21 Qamqa hawkaña kawsanaykipaqyá
Dioswan allinyanakuy.
Chaynata ruraspaqa
allinyaytam qallaykunki.
22 Chaynaqa paypa yachachikuynintayá
chaskikuy.
Palabrankunatayá ama qonqaruspayki
waqaychaykuy.
23 Tukuy Atiyniyoq Diosman kutirikuspaqa
huktawan hoqarisqam kanki.
Wasikimanta mana allinkunata qarqoruspaqa
huktawan hoqarisqam kanki.
24 Chaynaqa qori kapusuqnikitayá
allpaman wischuy.
Qori-puroña kapusuqnikitapas
mayukunapa wayqonmanyá wischuy.
25 Chaynata ruraptikiqa
Tukuy Atiyniyoq Diosñam
qori hina kapusunki.
Chaynata ruraptikiqa
Tukuy Atiyniyoq Diosñam
monto-monton qollqe hina kapusunki.
26 Qanmi Tukuy Atiyniyoq Diosrayku
sinchillataña kusikunki.
Paytam llumpay
confianzallawanña qawaykunki.
27 Imatapas qam mañakuptikim
payqa uyarisunki.
Chaynataqmi qampas prometekusqaykita
cumplinki.
28 Imaña ruray munasqaykipas cumplikunqam.
Purisqayki ñanpas kancharinqam.
29 Paykuna humillasqa kaptinmi
qamñataq ninki:
“Paykunaqa hoqarisqañayá
kachun” nispayki.
Chayna humillasqa kaqtaqa
Diosmi salvanqa.
30 Culpayoqña kaptinpas
runataqa Diosmi libranqa.
Mana huchayoq kasqaykiraykum
payqa librasqa kanqa.