Mana allin ruraqkuna hawkayaypiraq kawsakusqankumanta
21
Jobñataqmi nirqa:
2 Kay rimasqaykunatayá uyariykuychik.
Chaywanyá consuelaykuwaychik.
3 Rimarinaykamayá pacienciaykuwaychik.
Chaymantañayá munaspaqa asikuwaychik.
4 Manam runawanchu quejayqa.
Manam kaymanchu qasillallaqa.
5 Qawariwaspayá mancharikuychik.
Makikichikwanyá simikichikta tapaychik.
6 Ñoqapunim yuyarispayqa
mancharikuni llumpayta.
Manchakuymantam cuerpoypas
katkatatan llumpayta.
7 ¿Imanasqataq mana allin ruraqkunaqa
kawsachkankuraq?
¿Imanasqataq paykunaqa kawsachkanku
machuyayninkukamaraq?
¿Imanasqataq paykunaqa kachkanku
aswan-aswan atiyniyoqraq?
8 Paykunaqa kawsakuspam churinpas
allin kasqanta qawanku.
Paykunaqa ñawinkuwanpunim willkankunapas
allin kasqanta qawanku.
9 Wasinkupas seguro kaptinmi
imatapas mana manchakunkuchu.
Diospa castigonpas
manam paykunamanqa wichiykunchu.
10 Paykunapaqa kachkanmi mana faltaspa
muyaq toronkunapas.
Mana sulluspam sumaqllataña
wachan vacankunapas.
11 Chayna mana allin ruraqkunapa warmankunaqa
ovejakuna hinam lloqsinku.
Paykunapa churinkunaqa
pawaykachastinmi purinku.
12 Paykunaqa tinyata,
arpata
tocaptinkum kusikuymanta takinku.
Paykunaqa qenapa tocasqanwanmi
anchallataña kusikunku.
13 Paykunaqa allin kawsaypim
kawsakunkupas.
Hawkalla wañukuspam uraykunku
wañuqkunapa kasqanmanpas.
14 Paykunaqa Diostapas kaynatam ninku:
Qamqa anchurikuyá ñoqaykumantaqa.
Manam munanikuchu munasqaykiman hina kawsaytaqa.
15 “¿Pitaq Tukuy Atiyniyoq Diosqa?”
nispa.
“¿Chaynapi payta servinanchikpaqqa?”
nispa.
¿Imallapipas serviwachwanchum
payta mañakuptinchikqa?
16 Ichaqa mana allin ruraqkunapa allin kayninkuqa
manam kachkan paykunapa makillanpichu.
Chayraykum paykunapa tanteayninkutaqa
ñoqallayqa mana qatipakuymanchu.
17 As kutillapim wañurun
mana allin ruraq runapa mecheronqa.
As kutillapim desgraciapas
hamun paykunamanqa.
As kutillapim Diospas
piñakuyninpi castigan paykunataqa.
18 As kutillapim mana allin ruraq runaqa
paja hina wayrapa cheqechisqanpas.
As kutillapim paykunaqa kanku
qopa hina vientopa apakachasqanpas.
19 Runakunapa nisqanman hinaqa
chay mana allin ruraqkunapa churinkunapaqmi
Diosqa waqaychan castigonta.
Ñoqapa piensasqayman hinaqa
Diosyá castigachun kikin mana allin ruraqta.
Chaynapiyá qawachichun payqa huchayoq kasqanta.
20 Payqa kikinpuniyá qawachun
chay castigonta.
Payqa kikinpuniyá tomachun
Tukuy Atiyniyoqpa piñakuyninta.
21 Wañukuspanñaqa ¿yaqachum
kusikunmanraq qepan hamuqkunamanta?
22 ¿Yaqachum pipas Diosta
yachachinman imallatapas?
¿Yaqachum pipas alto-altopi kaqkuna juzgaq Diosta
yachachinman imallatapas?
23 Chayna runaqa allin kallpallanpiraqmi
wañukunpas.
Payqa seguro hinaspa hawkallam
wañukunpas.
24 Chay runaqa wañukunqa poqosqaraqmi.
Chay runaqa wañukunqa kallpayoqraqmi.
25 Wakin runañataqmi wañukunqa
llumpay llakikuypi.
Manaraq allinta kusirikuchkaspam
wañukunqa llakikuyllapi.
26 Ichaqa wañukuspankuqa iskayninkum
allpapi pampasqa kanqaku.
Chaynapim paykunaqa
aycha urupa mikusqan kanqaku.
27 Ñoqaqa yachanim ñoqapa contraypi
imam piensasqaykichikta.
Yachanim contraypi tanteanakuspa
daño ruray munawasqaykichikta.
28 Qamkunam tapunakunkichik kaynata:
“¿Maypitaq kachkan
chay munaychakuqpa wasinqa?”
nispa.
“¿Maypitaq kachkan
chay mana allin ruraqkunapa yachananqa?”
nispa.
29 ¿Manachum tapuyllapas-tapukurqankichik
ñannin pasaqkunataqa?
¿Manachum imapas qokusunkichik
paykunapa willakusqanmantaqa?
30 Mana allin runataqa manas imapas pasanchu
desgraciapa chayamusqan punchawqa.
Payqa Diospa piñakuynin punchawpipas
waqaychasqas kanqa.
31 ¿Pitaq uyanpi declaranman
chayna mana allin runataqa?
Chay runamanqa ¿pitaq paganman
chayna mana allin rurasqanmantaqa?
32 Payqa kanqapas pampakunanpaq
sepulturaman apasqaraqmi.
Paytaqa velanqakupas
sepulturanpa hawanpiraqmi.
33 Pampakusqan qechwa allpapas
sumaqllatañam chaskiykun paytaqa.
Pampamunankupaq apaptinkupas
achkallay-achka runakunam payta qatirqa.
Chaynataqmi paypa puntantapas
achkallay-achka runakunataq rirqa.
34 Chaynaqa yanqallam qamkunaqa
consuelaq tukuwankichik.
Yanqa engañollatam qamkunaqa
contestawankichik.