Zofarmi rimarin mana allin ruraqkunaqa castigasqa kananmanta
20
Naamat lawmanta Zofar sutiyoq runañataqmi nirqa:
2 Manam atiniñachu qasillalla kayta.
Chayraykum ñoqañataq nisqayki.
Manam atiniñachu upallalla uyariyta.
Chayraykum ñoqañataq nisqayki.
3 Tratawasqaykitam uyariykuyki.
Entiendeq kasqayraykum contestasqayki.
4 Qamqariki yachankim
ñawpa tiempomantaraq kayna pasakusqanta.
Qamqariki yachankim kay pachapi
runa rikurisqanmantaraq kayna pasakusqanta:
5 Mana allin ruraqpa asikuyninqariki
pisi tiempollapaqmi.
Dios mana respetaq runapa kusikuyninqa
huk ratollapaqmi.
6 Cielomanña haypaq hina
hatunchakuynin kaptinpas,
puyukunaman haypachkaq
hina uman chayaptinpas
7 payqa ispay hinallam
wiñaypaq chinkarunqa.
Reqsiqninkunapas:
“¿Maypitaq kachkan
payqa?”
nispam ninqa.
8 Payqa mosqoy hinallam chinkarunqa.
Payqa mana tarisqañam kanqa.
Mosqoypi qawasqa hinallam pasarunqa.
9 Qawaqninpas manañam rikunqañachu.
Yachasqan sitiopas manañam reqsinqañachu.
10 Paypa churinkunam
qopunqa wakchakunaman.
Suwakusqantaqa kikinpunim
kutichipunqa wakchakunaman.
11 Paypa cuerponqa
mozopa hinaraq kachkaptinpas
allpapiraqmi tukunqa kallpallanpas.
12 Mana allin rurasqanqa
siminpi miski hinaña kaptinpas,
chaytaqa qallunpa ukunpi
pakachkaq hinaña kaptinpas,
13 chaynataq allinpaq hapisqanrayku mana millakuptinqa
hinaspa simin ukupiraq waqaychaptinqa
14 wiksanpi mikuyninmá qoltututurunqa.
Culebrapa venenon hinamá ukunpi rikurirunqa.
15 Payqa rakrapu hinam riqueza mikusqanta aqtumunqa.
Diospunim paypa wiksanmanta vomitachinqa.
16 Chayna runaqa culebrapa
venenontam soqonqa.
Chayna runataqa maqta urum
kachuruspan wañurachinqa.
17 Payqa manañam rikunqachu
mayu hina kallpaq mieltaqa.
Payqa manañam rikunqachu
yaku hina kallpaq lechetaqa.
18 Payqa hukmanñam qonqa
llamkasqanpa ganasqantapas.
Payqa manam kusikunqachu
qori-qollqe huñusqanwanpas.
19 Payqa wakchakunata ñakarichispam
saqerurqa.
Payqa wasintapas mana rurakuspam
hukmantaña qechukurqa.
20 Payqa imawanpas mana saksaqmi karqa.
Tariqpunim imapas munasqantaqa.
21 Pay mikuptinqa manam
imapas puchuqñachu.
Chayraykum allin kayninpas
manaña takyanqachu.
22 Aswan-aswanraq apullaña kachkaspanmi
sasachakuykunaman wichiykunqa.
Tukuy ima ñakariymi
paypa hawanman chayaramunqa.
23 Wiksanta huntachichkaptinmi
Diosqa piñakuyninta kachaykunqa.
Mikuchkaptinmi Diosqa piñakuyninta
para kacharichkaq hina kachaykunqa.
24 Fierro armakunamanta lluptiruptinpas
broncemanta flecham tuksirunqa.
25 Chay flechaqa cuerponman yaykuruspanmi
hayaqninta pasarunqa.
Payqa manchakuywanmi hapirachikunqa.
26 Yanay-yanay tutayaymi paypa
qori-qollqentapas taparunqa.
Runapa mana pukupayasqan ninam
paytaqa kañarunqa.
Wasinpi puchuqkunatapas
chay ninataqmi ruparunqa.
27 Cielokunam paypa culpanta
qawachinqa.
Allpapas paypa contranpim
hatarinqa.
28 Wasintapas paypataqa
lloqllam aparunqa.
Diospa piñakusqan punchawpim
wasinqa apasqa kanqa.
29 Mana allin ruraqpaqmi
tukuy chaykunata Diospuni alistarqa.
Chay runapa pagon kananpaqmi
chaykunataqa Diospuni kamachikurqa.