Jobta Elifaz qaqchasqanmanta
(Job 15–21)
15
Teman lawmanta Elifazpas Jobtam nirqa:
2 Yachayniyoq runaqa
¿rimanmanchu yanqakunata?
Yachayniyoq runaqa
¿wayrallawanchu huntachinman wiksanta?
3 Yachayniyoq runaqa manam rimanpas
mana serviq palabrakunatachu.
Yachayniyoq runaqa manam rimanpas
mana valeq palabrakunatachu.
4 Dios respetaytam qamqa
chinkachiypi richkanki.
Diosmanta yuyaymanaytam qamqa
menosyachichkanki.
5 Mana allin sonqoykim
mana allinllata rimachisunki.
Qamqariki atoq runakunapa
rimanantam akllakuykunki.
6 Simillaykim huchayoq kasqaykitaqa
reqsirachisunki.
Manam ñoqachu huchayoq kasqaykitaqa
reqsirachiki.
Simillaykim contraykipiqa
contestasunki.
7 ¿Runakunamanta punta naceqchu
qamqa kanki?
¿Orqokunamanta puntataraqchum
qamqa wachakusqa karqanki?
8 ¿Qamllachu Diospa huñunakuyninpi
rimasqanta uyarayarqanki?
¿Sapallayki yachayniyoq
kasqaykipaqchum hapikunki?
9 ¿Imatañataq qamqa yachanki
ñoqaykupa mana yachanaykutaqa?
¿Imatañataq qamqa entiendenki
ñoqaykupa mana entiendenaykutaqa?
10 Ñoqayku ukupiqariki kachkan
soqo chukchayoq machuyaruq runakunañam.
Ñoqayku ukupiqariki kachkan
taytaykimanta aswan achka watayoq runakunañam.
11 ¿Asllapaqchum hapinki
kikin Diospa consuelasusqaykita?
¿Asllapaqchum hapinki
sumaq palabrakunawan rimapayasusqaykita?
12 ¿Imanasqataq sonqoyki
karunchasuchkanki?
¿Imanasqataq nanay ñawikiwanqa
qawarayachkanki?
13 ¿Imanasqataq chayna palabrakunataqa
simikimanta lloqsichichkanki?
14 ¿Pitaq runaqa chuyayachisqapaqña
hapisqa kananpaqqa?
¿Pitaq warmimanta naceqqa
limpiopaqña hapisqa kananpaqqa?
15 Diosqa manam angelninkunapipas
confiakunchu.
Paypa qayllanpiqa cielokunapas
manam limpiochu.
16 Hinaptinqa aswanraqchiki
millakuypaq huchasapa runapiqa
Diosqa mana confiakunchu.
Hinaptinqa aswanraqchiki
yaku tomachkaq hina huchallikuq runapiqa
Diosqa mana confiakunchu.
17 Uyariwayá.
Ñoqam willasqayki.
Ñoqaqa qawasqaytam willasqayki.
18 Ñoqam willasqayki
yachayniyoqkunapa willawasqankuta.
Chay yachayniyoqkunaqa manam pakarqakuchu
abuelonkunapa willasqanta.
19 Paykunallamanmi allpaqa
qosqa karqa.
Forasterokunaqa manam pasarqachu
paykunapa chawpintaqa.
20 Mana allin ruraqpa kawsayninqa
tukuy tiempom ñakariylla.
Chaynataqmi ñakarichiqpa watankunaqa
kachkan yupasqalla.
21 Chay mana allin runaqa
manchakuypaq qapariykunatam uyarirun.
Chay mana allin runamanqa
hawkalla kakuchkaptinmi salteaqkuna chayaramun.
22 Paypaqa manam ima confianzanpas kanñachu
chay tutayaymanta lloqsinanpaqqa.
Payqa akllasqañam kachkan
espadawan wañunanpaqqa.
23 Ullachkukunapa mikusqan kananpaqmi
payqa akllasqaña kachkan.
Tutayaq tiempo suyasqantam
payqa yachakuchkan.
24 Sasachakuywan llakikuymi
paytaqa mancharichin.
Chaykunam paytaqa rey hina contranpi
hatariruspan vencen.
25 Chaykunamá pasan Diospa contranpi
makin hoqariq runataqa.
Chaykunamá pasan Tukuy Atiyniyoq Diospa contranpi
hatunchakuq runataqa.
26 Chay runaqa Diospa contranpim
pawaykuq-pawaykuqllaña kallpan.
Chay runaqa allin rakta harkachikunawan
harkaykachikuspanmi kallpan.
27 Payqa poqosqa uyallañam kachkanpas.
payqa wiksasapallañam kachkanpas.
28 Payqa yachanqapas tuñichisqa llaqtakunapim.
Payqa yachanqapas chunnichkaq wasikunapim.
Payqa yachanqapas purmasqa wasikunapim.
29 Payqa qori-qollqewanqa
manañam apuyanqachu.
Paypaqa kapuqninkunam
manaña duranqachu.
Kay pachapiqa kapuqninkunam
manaña miranqachu.
30 Payqa manam lluptinqachu
tutayaymantaqa.
Sachapa kallmanta ninapa chakirachisqan hinam
payqa kanqa.
Payqa Diospa pukuykusqanwanmi
tukusqa kanqa.
31 Mana allin runaqa amayá hapipakuchunchu
pantachiqnin engañollapiqa.
Chay engañollam paypaqa
pagon rikurirunqa.
32 Sachapa kallman chakiruq hinam
payqa manaraq tiemponpi tukurunqa.
Ikllimuq kallmakunapas
manam kanqañachu paypaqa.
33 Payqa kanqa
yuranmanta mana poqosqa uvas pallarusqa hinam.
Payqa kanqa
aceitunas sachapa sisan wichiruq hinam.
34 Dios mana yupaychaqkunapa castankunaqa
mana mirayniyoqmi kanqa.
Pakasqallapi imapas chaskikuq runapa wasinqa
ninapa rupasqanmi kanqa.
35 Paykunaqa wiksayoq warmi hinam
mana allinta wiksayakurunku.
Paykunaqa wachakuq warmi hinam
mana allinta wachakurunku.
Wachakuq warmi,
wawata rikurichiq hinam
paykunaqa engañollata rikurirachinku.