Runapa pisilla kawsasqanmanta
14
Warmimanta naceq runapa vidanqa
pisi tiempollapaqmi.
Warmimanta naceq runapa vidanqa
llumpay amirunallapaqmi.
2 Runapa vidanqa wayta hina
panchiruspan qawiruqllam.
Runapa vidanqa llantuy hina
mana takyaspan chinkaruqllam.
3 ¿Kayna runatachum
qawariwanki?
¿Kayna runatachum
juiciomanraq qayachiwanki?
4 Manam pipas qachamantaqa
horqonmanchu limpiotaqa.
5 Cheqaptapunim runapa punchawninkunaqa
yupasqalla kachkan.
Cheqaptapunim runapa killankunaqa
makillaykipi kachkan.
Decretasqaykiman hina maykamam chayananmantaqa
mana pasaqmi payqa kachkan.
6 Amaña paytaqa qawarayaspayá
hawka kananpaqña saqeykuy.
Llamkapakuqpa punchawnin cumplikunankamayá
paytaqa saqeykuy.
7 Sachaqa kuchusqa kaspapas
huktawanraqmi ikllimunqa.
Mana faltaytam
chay sachaqa ikllimunqa.
8 Chay sachapa sapinkuna
allpapi machuyaruptinpas,
chay sachapa kullun ñutu
allpapi wañuruptinpas
9 yaku nuyuykuptinmi huktawan verdeyarinqa,
mosoq planta hinaraqmi
kallmankuna mutmurinqa.
10 Ichaqa runa wañukuptinqa
¿pitaq sayarichinman?
Ichaqa runa tukuruptinqa
¿maypitaq kanman?
11 Imaynam yakukuna lamar qochamanta waspirun,
imaynam mayupas taniruspa chakirun,
12 chaynam cielokuna kanankamaqa runaqa
mana hatarinqachu wañusqanmanta.
Chaynam cielokuna kanankamaqa runaqa
mana rikcharinmanchu puñusqanmanta.
13 ¡Ima allinraq kanman
piñakuyniki pasanankama pakaykuwaptikiqa!
¡Ima allinraq kanman
plazota qoykuwaspayki yuyariwaptikiqa!
14 Sichum huk runa wañukuspanqa
¿yaqachum huktawan kawsarimunqa?
Chayna kaptinqa ñakarispapas
kacharisqa kanaykamam suyasaq ñoqallayqa.
15 Hinaptinqa qayakamuptikim
ñoqañataq contestamusqayki.
Hinaptinqa unanchawasqaykimantachá
sientiypaqña-sientiwanki.
16 Yupiyta yupaptikipas manachá qamtaqa
imapas qokusunkimanchu huchaymantaqa.
17 Costalpa simin sirachkaq hinam
mana kasukusqayta sirarunki.
Mituwan llusichkaq hinam
mana allin rurasqaykunata tapaykunki.
18 Huk orqo wichiykuspan
mastakuruchkaq hinam,
tiyananmanta huk hatun rumi kuyuchkaq hinam,
19 imaynam rumikunata yaku
llaqwachkaq hinam,
imaynam allpata lloqlla apachkaq hinam
qampas runapa confiakullasqanta
lliw yanqacharunki.
20 Qamqa pasakunankamam wiñaypaqña
runata vencerunki.
Rikchaynintapas tikraruspaykim
paytaqa qarqorunki.
21 Churinkuna alabasqa kaptinpas
runaqa manañam yachanqañachu.
Churinkuna humillasqa kaptinpas
payqa manam cuentata qokunqañachu.
22 Runaqa sapallanmi ñakarillan
cuerponpa nanayninta.
Payqa sapallanmi llakikullan
kikinpa llakikuyninmanta.