Jobmi defiendekun honrado runa kasqanmanta
13
Arí,
tukuy kaykunataqa
kikiypunim rikurqani.
Arí,
tukuy kaykunataqa
kikiypunim uyarispay entienderqani.
2 Ñoqapas yachanim
qamkunapa yachasqaykichiktaqa.
Manataqmi ñoqaqa menoschu
kani qamkunamantaqa.
3 Ñoqaqa Tukuy Atiyniyoq
Dioswanmi rimayta munani.
Manam qamkunawan rimaytachu
ñoqaqa munani.
Asuntoymanta Dioswan
parlariytam munani.
4 Qamkunaqa llullakuspam
imatapas pakaykunkichik.
Qamkunaqa llapallaykichikmi mana
imapaq serviq doctorkuna kankichik.
5 ¡Ima allinraq kanman
pasaypaqta upallaruptikichik!
Hinaptinqa yachayniyoq kasqaykichiktach
reqsichikuwaqchik.
6 Kunanyá uyariykuwaychik
asuntoymanta rimarisqayta.
Kunanyá atiendeykuwaychik
ñoqapa defiendekusqayta.
7 ¿Diospa favorninpichum
chay llullakunata rimachkankichik?
¿Diospa favorninpichum
chay engañokunata rimachkankichik?
8 ¿Qamkunaqa Diosmanchum
sayapakurunkichik?
¿Qamkunaqa Diospaqchum
discutiwachkankichik?
9 Sichum pay pruebasuptikichikqa
¿yaqachum allin lloqsiwaqchik?
¿Yaqachum qamkunaqa runapas kanman hina
payta engañaruwaqchik?
10 Sichum engañollawan payman sayapakuptikichikqa
seguropunim qaqchaparusunkichik payqa.
11 Hatu-hatun kasqanraykum
Diosqa mancharichisunkichik.
Diosqa llumpa-llumpaytam
qamkunata mancharichisunkichik.
12 Rikchanachiykuna rimasqaykichikqa
usuchisqa uchpa hinallam.
Murallaykichikqa mitumanta
wichiruq perqa hinallam.
13 Kunanqa upallaptikichikyá
ñoqañataq rimarisaq.
Imaña pasawaptinpas
ñoqañataqmi rimarisaq.
14 ¿Imanasqataq vidaytapas wañuypa
patanmanraqqa churallasaq?
¿Wañuypas-kawsaypas chullalla kachkaptinchum
chaymanraq wichiykullasaq?
15 Diospuni wañurachiwaypi kaptinpas
ñoqallayqa paymanmi hapipakullasaq.
Imaynaña kaptinpas paypa ñawpaqninpim
ñoqaqa defiendekullasaq.
16 Ichapas chaynapi salvacionta
tarillayman ñoqallayqa.
Diosta mana kaqpaqpas hapiq runaqa
manam chayanmanchu paypa ñawpaqninmanqa.
17 Qamkunaqa allintayá uyariychik
kay nisqaykunata.
Qamkunaqa allintayá uyariychik
kay rimarisqaykunata.
18 Kunanmi ordenninpi rimarisaq asuntoymanta.
Ñoqaqa yachakunim mana huchayoq kasqayta.
19 ¿Yaqachum pipas
atipanakunman ñoqawanqa?
Chayna kaptinqa upallakuruspaymi
wañukusaqña ñoqallayqa.
20 Iskay cosallatañayá
ama ruraychu ñoqallaypaqqa.
Hinaptinqa manam
pakakusaqchu qanmantaqa.
21 Amañayá castigawaychu
ñoqallaytaqa.
Amayá manchachiwaychu
manchakuypaq kasqaykiwanqa.
22 Qayaykamuwayá hinaptinqa
ñoqam contestamusqayki.
Ñoqa rimapayamuptiymi
qamñataq contestamuwanki.
23 ¿Maynañataq mana allin rurasqaykunaqa?
¿Maynañataq ñoqapa huchaykunaqa?
Qawaykachiwayá mana kasukusqaytaqa.
Qawaykachiwayá ñoqapa huchaytaqa.
24 ¿Imanasqataq ñoqamantaqa pakakuchkanki?
¿Imanasqataq enemigoykipaqqa hapiwachkanki?
25 ¿Wayrapa apakachasqan rapi hinalla kachkaptiychum
ñoqataqa ñakarichiwanki?
¿Chakisqa paja hinalla kachkaptiychum
ñoqataqa qatikachawanki?
26 Llakikuypaq kaqkunatam
contraypi qellqachkanki.
Mozo kaspay mana allin rurasqaymantam
cargochawanki.
27 Cepo sutiyoq hapichinawanmi
chakiykunata hapichiwanki.
Maypim purisqaypim
qamqa wateqawanki.
Chaki plantaytam
qamqa señalarunki.
28 Ismuchkaq hinam
runaqa machuyaruchkanña.
Puyupa tukusqan pacha hinam
runaqa tukuruchkanña.