Jobmi rimarin Diospa atiyninmantawan yachayninmanta
12
Hinaptinmi Jobñataq nirqa:
2 Arí,
decente runakunam
kankichik qamkunaqa.
Qamkuna wañukuptikichikmi
yachaypas qamkunawantaq tukurunqa.
3 Ñoqapas qamkuna hina yuyayniyoqmi kaniqa.
Arí,
manam qamkunamanta menoschu kaniqa.
¿Pimá mana yachanchu chaykunataqa?
4 Diosta mañakuptiymi rimapayawarqa.
Chaywanpas amistadniymi asipayawarqa.
Allin ruraq mana huchayoqmi kani.
Chaywanpas amistadniypa asipayasqanmi kani.
5 Seguro kawsakuq runakunaqa manam
kaqpaqpas hapinchu desgraciataqa.
Huchaman urmaq runakunallas
pasan chayna desgraciataqa.
6 Salteaq runakunaqa wasinkupipas
hawkam kawsakunku.
Diosta piñachiq runakunaqa
segurom kawsakunku.
Diosqa paykunapa munayllanpi
kasqanta piensaspankum
seguro kawsakunku.
7 Chaynaqa kunanyá tapuy uywakunata.
Hinaptinmi paykuna yachachisunki.
Chaynaqa kunanyá tapuy alton pawaqkunata.
Hinaptinmi paykuna willaykusunki.
8 Kay pachapi kaqkunatapas
rimapayayá hinaptinqa yachachisunkim.
Lamar qochapi
kaqkunapas chaykunataqa willaykusunkim.
9 ¿Pitaq mana yachanchu
tukuy kaykunataqa?
¿Pitaq mana yachanchu
Tayta Diospuni kaykuna rurasqantaqa?
10 Diospa makinpim
llapallan kawsaqkunapa vidanqa kachkan.
Paypa makinpitaqmi
llapallan runakunapa espiritunpas kachkan.
11 Cheqaptapunim rinriqa
musyan palabrakunata.
Chaynataqmi simipas
musyantaq mikuypa gustonkunata.
12 Machuyaruqña runakunapim
kachkan yachayqa.
Unay watayoq runakunapim
kachkan entiendeyqa.
13 Diosllamantam hamun
yachaywan atiyqa.
Diosllamantam hamun
allin consejakuywan allin entiendeyqa.
14 Imatapas Dios tuñirachiptinqa
manañam pipas hatarichinmanchu.
Pitapas Dios wichqaruptinqa
manañam pipas kacharinmanchu.
15 Yakukunata Dios tanirachiptinqa
lliwmi chakirun.
Yakukunata Dios kachaykuptinqa
lliw allpatam aparun.
16 Diosllamantam hamun
atiywan venceyqa.
Payllamantam hamun
engañachikuq runawan engañakuq runaqa.
17 Consejaqkunatam imanmantapas
qechusqataña payqa presochaspan pusarun.
Payqa juezkunatam
upamanña tikrarun.
18 Payqa mana munayniyoqtañam
rikurirachin reykunata.
Payqa presochaspam mana pachayoqtaña
pasachin paykunata.
19 Sacerdotekunatam imanmantapas qechusqataña
payqa presochaspan pusarun.
Unay tiempoña munaychakuq runakunatam
payqa qarqorun.
20 Hapipakuna consejaqkunatam
payqa upallachin.
Yuyaq runakunapa allin tanteasqantam
payqa chinkachin.
21 Payqa kamachikuqkunatam
penqayman churarun.
Payqa kallpasapakunapa armantam
qechurun.
22 Diosmi tutayay ukupi
pakasqata rikurichin.
Tutay-tutayña kaqtapas
achkiymanmi lloqsichin.
23 Diosmi hatunyachin nacionkunata.
Diosmi purmachin nacionkunata.
Payqa nacionkunapa linderontam hatunyachin.
Chaypi yachaqkunatapas presotam pusachin.
24 Kay pachapi jefekunapa yuyaynintam
Diosqa yanqacharachin.
Mana ñampa kanan chunniqpim
paykunataqa pantarachin.
25 Paykunaqa tutayaypim
tamra-tamra purinku.
Sinka runa hinam
Diospa pantachisqan
paykunaqa purinku.