Jobta Zofar qaqchasqanmanta
11
Naamat lawmanta Zofar sutiyoq runam Jobta nirqa:
2 Chayna achkallaña palabrakunaqa
contestasqam kanan.
¿Pipas achkallataña rimaspanchum
mana huchayoqpaqña hapisqa kanman?
3 ¿Achka rimasqaykiwanchu
runakunata upallarachinki?
¿Burlakuptikichu
mana pipas qaqchasunki?
4 Qamqa Diostam ninki:
“Yachachisqaykunaqa allinpunim” nispa.
Qamqa Diostam ninki:
“Qayllaykipiqa limpiom kani” nispa.
5 Amalaya Diospuni rimapayasunkiman.
Amalaya Diospuni contraykipi nisunkiman.
6 Diosqa yachachisunkimanmi
runamanta pakasqa kaqkunata.
Allin yachachikuyqariki
iskay yachachikuyniyoqmi.
Chaynapim qamqa qawawaq
Diospa castigasusqaykiqa
merecesqaykimantapas aslla kasqanta.
7 ¿Mana haypay atina Diospa
kaynintachu maskayta munachkanki?
¿Tukuy atiyniyoq Diospa cabal
kaynintachu maskayta munachkanki?
8 Chaykunaqariki cielokunamantapas
aswan alto-altoraqmi.
Hinaptinqa ¿imatamá rurawaq?
Chaykunaqariki wañuqkunapa
kasqanmantapas aswan uku-ukuraqmi.
Hinaptinqa ¿imatamá yachawaq?
9 Chaykunapa sayayninqariki
kay pachamantapas aswan largoraqmi.
Chaykunapa sayayninqariki
lamar qochamantapas aswan anchoraqmi.
10 Sichum Dios pasaspan
pitapas presocharuptinqa
¿pitaqcha payta harkakunman?
Sichum Dios pasaspan
juicioman qayaptinqa
¿pitaqcha payta harkakunman?
11 Payqa reqsinmi
engañakuq runakunataqa.
Mana allin kaqkunata qawaspanqa
payqa yachachkanpunim chaykunamantaqa.
12 Mana yuyayniyoq runaqa
manam tikrakurunmanchu
yuyayniyoq runamanqa.
Asnomantaqa
manam nacenmanchu runaqa.
13 Sichum sonqoykita
Diospaq preparaptikiqa,
sichum Diosman makikita
haywariptikiqa,
14 sichum makikikunapi mana allin kaqta
kikikimanta wischuptikiqa,
sichum wasikipi
imapas mana allin yachananta
mana consienteptikiqa
15 umaykim mana penqakuspa
altoman hoqarisqa kanqa.
Sonqoykim mana imatapas manchakuspan
qaqa hina takyanqa.
16 Hinaptinmi ñakarisqaykitaqa
qonqarunkiña.
Yaku pasaruqmanta hinam
chaykunataqa qonqarunkiña.
17 Hinaptinmi qampa vidaykiqa kancharinqa
chawpi punchawmantapas aswan mastaraq.
Hinaptinmi tutayaypi kasqaykiqa kancharinqa
achikyaypi kanchay hinaraq.
18 Qamqa seguroña
confiakusqaykiraykum kawsakunki.
Muyuriqnikita qawarispam
mana manchakuspaña puñukunki.
19 Puñuykuptikiqa manam pipas
manchachisunkichu qamtaqa.
Achkaqmi favorecenaykipaq
maskasunki qamtaqa.
20 Mana allin runakunapa ñawinmi
ichaqa pisiparunña
Amparakunankupaq mana imatapas
tarispam pisiparunkuña.
Paykunapa confianzanqa wañuruchkaq hinam
puchukarunña.