Jobmi waqan nanayninmanta
10
Vidaytam amiruniña ñoqaqa.
Mana upallaykuspam
willakusaq ñoqaqa.
Llumpay llaki sonqoyoqmi
rimarisaq ñoqaqa.
2 Diostam nisaq ñoqaqa:
Mana allin ruraqpaqqa
amayá hapiwaychu ñoqataqa.
Qawaykachiwayá imamantam
culpayoqpaq hapiwasqaykitaqa.
3 Qampuni ñoqapa unanchaqniy kachkaspaykiqa
¿imanasqamá ñakarichiwankiqa?
¿Imanasqamá mana allin ruraqmanraqqa
sayapakurunkiqa?
4 Qamqariki manam
runapa ñawin hina
ñawiyoqchu kanki.
Qamqariki manam
runapa rikusqanman hinachu
qawanki.
5 Qampa punchawnikikunaqa
manam runapa punchawnin hinallachu.
Qampa wataykikunaqa
manam runapa watankuna hinallachu.
6 Hinaptinqa ¿imanasqamá
mana allin rurasqaykunataqa maskanki?
Hinaptinqa ¿imanasqamá
huchaykunataqa averiguanki?
7 Qamqariki yachankim
mana culpayoq kasqaytaqa.
Yachankimiki qampa makikimanta
mana pipas librawanantaqa.
8 Ñoqataqa qanmi formawaspayki
unanchawarqanki
¿hinaspachum kunanqa pasaypaqta
wañurachiyta munawanki?
9 Yuyariyá,
qamqariki mitumanta
hinam rurawarqanki
¿hinaspachum kunanñataq ñutu allpaman
huktawan tikraruwanki?
10 ¿Manachu lecheta hina talliruwarqanki?
¿Manachu quesopaq hina cuajaruwarqanki?
11 Qaraywan aychaywanmi pachaykachiwarqanki.
Tulluykunatawan ankuykunatam simpay-simpayta ruraykurqanki.
12 Qanmi kawsachiwaspayki favorecewarqanki.
Qanmi cuidawaspayki vidayta waqaycharqanki.
13 Chaywanpas qamqa ñam
yuyaymanarqankiña kaykunamanta.
Yachanim kay yuyaymanasqaykiqa
sonqoykipi kasqanta.
14 Qanmi qawawarqanki huchallikuruptiyqa
hapiruwanaykipaq.
Qanmi qawawarqanki huchallikuruptiyqa
culpayoqpaq hapiwanaykipaq.
15 Culpayoq kaspayqa ¿imallapiraq rikukuyman ñoqallayqa?
Manaña culpayoq kaspaypas manam hoqarisaqchu umaytaqa.
Llumpay penqaypim ñoqallayqa kallachkani.
Ñakarispaymi sinka hinaña kallachkani.
16 Sichum umallayta hoqariruptiyqa
leon hinam hapiruwanaykipaq qatikachawanki.
Sichum umallayta hoqariruptiyqa
contraypim milagrokunatapas ruranki.
17 Kuti-kutirispaykim contraypi testigoykikunata churanki.
Contraypim piñakuynikita yapaykuwanki.
Tropakunata yapa-yaparispam ñoqallayman pawaykachiwanki.
18 ¿Imanasqataq mamaymanta nacechiwarqanki?
Amalaya ñoqallayqa wañukuyman karqa.
Hinaptinqa manach pipas rikuwanmanchu karqa.
19 Hinaptinqa mana haykapipas
kawsaq hinach kayman karqa.
Hinaptinqa nacesqallaraq kachkaspachá
sepulturaman apasqa kayman karqa.
20 Ñoqapa asllapas punchawniykunaqa
ñam tukuruchkanña.
Tumpallatapas asirikunaypaqyá
ñoqamantaqa anchurikuyña.
21 Chayna asirikuytam munani
manaña kutimuq illaruchkaspay.
Chayna asirikuytam munani
manaraq tutayay nacionman illaruchkaspay.
Chayna asirikuytam munani
manaraq tutay-tutaypa kasqanman illaruchkaspay.
22 Chay nacionqa yana mankapa
sikin hina tutayaypa kananmi.
Chay nacionqa chaqwa hina
tutay-tutaypa kananmi.
Chaypiqa achkiypas rikchakun tutayaymanmi.