Diospa contranpi Job rimasqanmanta
7
Kay pachapi runapa vidanqa
levapi riq soldado hinallam.
Kawsasqan punchawkunaqa llamkapakuqpa
punchawnin hinallam.
2 Runapa kawsasqanqa rikchakun
llantukuykuy munaq sirvientemanmi.
Runapa kawsasqanqa rikchakun
pagon chaskiy munaq llamkapakuqmanmi.
3 Killan-killanmi mana valeqlla
ñoqapa kawsasqayqa.
Tutan-tutanmi ñakariylla
ñoqapa kawsasqayqa.
4 Camapi wischurayaspaymi:
“¿Imay horataraq hatarillasaq?”
nispay piensanipas.
Tutapas manaña achikyariptinmi
mana puñuyta atistillan achikyarunipas.
5 Urukunapa tukusqanñam kachkan
cuerpollayqa.
Qarapachkaq polvollañam kachkan
cuerpollayqa.
Qeyallañam toqyachkan matakusqa
aychaymantaqa.
6 Awaqpa kallwanmantapas aswan apurawmanraqmi
pasachkan punchawniykunaqa.
Manaraq imamanpas hapipakuykuchkaptiymi
tukurunña ñoqapa kawsasqayqa.
7 Diosnilláy,
yuyariyá vidayqa
pasaruq wayra hinalla kasqanta.
Yuyariyá ñoqapa ñawillaykunaqa
allin kaqta manaña rikunanta.
8 Qawawaqniykunam mastaqa
manaña rikuwanqakuchu.
Qawariykuwaptikiqa manañam kasaqchu.
9 Imaynam puyupas
waspiruspan chinkarun,
chaynam sepulturaman uraykuqpas
pasaypaqña chinkarun.
10 Wasinmanqa manañam
payqa kutinqañachu.
Nitaqmi llaqtamasinkunapas
paytaqa qawanqakuñachu.
11 Chayraykum mana upallaykuspayña rimasaq.
llakipa intusqan sonqoyoqmi rimasaq.
Sonqoypas nanarisqam ñoqaqa rimasaq.
12 ¿Cuidarayawanaykipaqqa ñoqaqa
kani lamar qochachu?
¿Cuidarayawanaykipaqqa ñoqaqa
kani lamar qochapi manchakuypaq animalchu?
13 Ñoqam piensani puñunaypiqa
nanayniy qonqariyta.
Ñoqam piensani puñuptiyqa
¡Ay,
ay!
ninay samananta.
14 Ichaqa pesadillakunawanmi
manchachiwanki.
Ichaqa manchakuypaq mosqoykunatam
qoykuwanki.
15 Ñoqaqa mastaqa munani
teqoruwanaykitañam.
Cuerpoymantapas mastaqa kuyani
wañukuytañam.
16 Ñoqaqa amiruniñam vidaytaqa.
Manam wiñaypaqchu kawsasaq ñoqaqa.
Ñoqataqa saqeruwayñayá qamqa.
Waspiy hinallamiki ñoqapa vidayqa.
17 ¿Pimá runaqa payta
hatunchanaykipaqqa?
¿Pimá runaqa paymanta
cuentallikunaykipaqqa?
18 ¿Pimá runaqa sapa tutapayta
watukunaykipaqqa?
¿Pimá runaqa rato-ratolla
pruebanaykipaqqa?
19 ¿Haykapikamataq qamqa
qawarayawanki ñoqallaytaqa?
¿Haykapikamataq manaqa dejawankichu
toqayllaypas millpuykunaytaqa?
20 Runakuna waqaychaq Diosnilláy,
huchallikuruspayqa
¿ima mana allintataq
ruraruni contraykipiqa?
¿Imanasqataq ruraruwanki
flechapa tuksipananta hinaqa?
¿Ima sasachakuytamá ñoqaqa
qoyki qanmanqa?
21 ¿Manachum mana kasukusqaytaqa
pampachaykuwankiman?
¿Manachum mana allin rurasqaymantaqa
pampachaykuwankiman?
Chayllam allpapi
kuchparayarusaq ñoqaqa.
Chayllam maskawaptikiqa manaña kasaqñachu ñoqaqa.