Jobmi qaqchan amistadnin Elifazta
6
Jobñataqmi nirqa:
2 ¡Ima allinraq kanman
llakikuyllayta pesaykuptinkuqa!
¡Ima allinraq kanman
ñakarisqayta balanzaman churaykuptinkuqa!
3 Hinaptinqa lamar qochapi aqomantapas
mastaraqcha llasanmanqa.
Chayraykum mana controlasqaña
karqa palabraykunaqa.
4 Tukuy Atiyniyoq Diospa flechankunam
hapiruwan ñoqallayta.
Chaymi ñoqapa sonqollayqa
soqochkan chaypa venenonta.
Diospa manchachiwasqanmi
hapiypaq-hapiwachkan ñoqallayta.
5 Purun asnoqa manam hawchityanmanchu
sumaqllaña pastokunata mikuchkaspanqa.
Toropas manataqmi waqanmanchu
panqata mikuchkaspanqa.
6 Manam pipas mikunmanchu
mana kachiyoq qamya mikuytaqa.
Manam miskiqa kanmanchu
runtupa yuraqninqa.
7 Manam munanichu
chayna mikuytaqa.
Onqoyllatam apamuwan
chayna mikuykunaqa.
8 ¡Ima allinraq kanman
munasqayta Dios qoykuwaptinqa!
9 ¡Ima allinraq kanman
Dios saruparuwayta munaptinqa!
¡Ima allinraq kanman
pay makinta hoqarispan wañurachiwaptinqa!
10 Hinaptinqa chayqa kanman
consueloraqchá ñoqallaypaqqa.
Hinaptinqa nanayllay mana tanichkaptinpas
kusikuymantachá pawaykachayman ñoqallayqa.
Manam ñoqallayqa pakarqanichu
Chuya Diospa palabrantaqa.
11 Ichaqa kallpallaymi tukurunña.
Manam atiymanñachu confiakuytaqa.
¿Imaraykutaq pacienciawan
kawsayman ñoqallayqa?
12 Ñoqapa kallpayqariki
manam rumimantachu.
Ñoqapa cuerpoyqariki
manam broncemantachu.
13 Manam kikiypunipas
atinichu yanapakuytaqa.
Tukuy imapi allin horqowaqniy yachayniypas
chinkarunñam ñoqamantaqa.
14 Llakipa qatisqan runataqa
kuyapayananmi amistadninqa.
Tukuy Atiyniyoq Diosta manaña respetaptinpas
kuyapayananmi amistadninqa.
15 Ichaqa wawqeykuna,
qamkunapas lloqlla hinam
traicionaruwankichik.
Ichaqa wawqeykuna,
kallpaq lloqlla hinam
qamkunaqa pasarunkichik.
16 Chay lloqllaqa ritipa chullusqanwanmi
aswanraq putkayarun.
Chay lloqllaqa lastapa chullusqanwanmi
aswanraq yapakurun.
17 Ichaqa rupay tiempo chayaramuptinmi
chay lloqllaqa chinkarun.
Ichaqa rupayllaña kaptinmi chay lloqllaqa
maymi kasqanmanta chinkarun.
18 Puriqkunapas karunchakurunñam ñanninkumanta.
Chunniqmanña seqaspankum
paykunaqa wañurunku yakumanta.
19 Tema lawmanta puriqkunam
yakuta maskanku.
Saba lawmanta hamuqkunam
yaku tarinankupi confiakunku.
20 Chay confiakusqanku yakuman chayaruspankum
penqaypi rikurirunku.
Chay yakupa kanankama chayaruspankum
burlakusqa hina rikurirunku.
21 Chayna lloqlla hinam qamkunapas kankichik.
Manchakuypaq kaqta rikuruspaykichikmi
mancharikunkichik.
22 Chayna kanaykichikpaqqa manam imatapas
mañakurqaykichikchu ñoqaqa.
Manataqmi mañakurqaykichikchu
qori-qollqekichikmanta ñoqapaq qonaykichiktaqa.
23 Manam ñoqaqa mañakurqaykichikchu
enemigomanta lluptichiwanaykichiktaqa.
Manam ñoqaqa mañakurqaykichikchu
manchakuypaq runakunamanta librawanaykichiktaqa.
24 Qamkuna yachachiwaptikichikqa
upallakusaqmi ñoqaqa.
Qamkunayá entiendechiwaychik
imapim ñoqallay pantasqaytaqa.
25 ¿Pitapas imananmanchum
allin rimayqa?
¿Imatataq reqsichiwachkankichik
qaqchawaspaykichikqa?
26 Qamkunam rimasqaymanta
qaqchawankichik.
Muspaypi hinaña rimasqay palabrakunatam
qamkunaqa wayrapaq hinalla hapinkichik.
27 Qamkunaqa mana tayta-mamayoqpaqmi
suerteankichik.
Qamkunaqa amistadnikichiktam
rantikurunkichik.
28 Munaspaykichikqa kunanyá
qamkuna uyapurawaychik.
Qamkunata llullakuptiyqa
ñoqatayá niykuwaychik.
29 Reqsikuychikyá.
Amayá mana allin ruraqqa kaychikchu.
Amayá allin ruraq kasqaytaqa negaychikchu.
30 Rimasqaywanqa manam huchallikunichu ñoqaqa.
Musyakustinmi imatapas rimani ñoqaqa.