5
Chaynaqa Job,
qayakuyá qamqa.
¿Yaqachum pipas contestasunkiman qamtaqa?
¿Diospa mayqen sapaqchasqanmantaq asuykuwaqqa?
2 Cheqaptapunim millay sonqo runataqa
piñakuynillan wañurachin.
Cheqaptapunim mana yuyayniyoq runataqa
envidiakusqallan wañurachin.
3 Rikurqanim mana allin runaqa
allin sapichakuchkaq hina apuyasqanta.
Chaypunillam ñakaykurqani paypa wasinta.
4 Paypaqa churinkunapas
mana yanapayniyoqmi kachkan.
Paypaqa churinkunapas
juzgadopim ñakarichisqa kachkan.
Paykunaqa mana pipapas
defiendesqanmi kachkan.
5 Paypa cosecha horqosqantapas
yarqaymanta kaqkunam lliw tukurunku.
Kichkakuna ukupi kaqtapas
yarqaymanta kaqkunam lliw pallaparunku.
Paypa kapuqnintaqa
ñakariqkunam envidiawan qawapayanku.
6 Mana allinqa hamun
manam ñutu allpamantachu.
Ñakariyqa ikllimun
manam kay allpamantachu.
7 Ichaqa imaynam ninapa chispan pawan altoman
chaynam runapas nacen ñakariypi kawsakuyman.
8 Sichum qam kaspayqa
Diosmanmi kutirikuyman.
Qam kaspayqa asuntoytam
paypa makinmanña churaykuyman.
9 Diosqa mana entiendey atina
hatu-hatun kaqkunatam ruran.
Diosqa mana yupay atina
milagrokunatam ruran.
10 Payqa allpamanmi parata chayachimun.
Payqa chakramanmi yakuta kacharimun.
11 Payqa humildekunatam hatunchaykun.
Payqa lutoyoqkunatam seguroman churaykun.
12 Payqa sacrekunapa tanteasqantam
yanqacharun.
Makinkunawan mana imanananpaqmi
chaynata rurarun.
13 Payqa yachaysapakunatam hapirun
sacre kaywan piensasqankupi.
Payqa atoq runatam qonqayta
pantarachin yuyaymanasqanpi.
14 Paykunaqa punchaw kachkaptinmi
tutayaypi kachkanku.
Paykunaqa chawpi punchawraq kachkaptinmi
tutayaypi hina tampikachastin purichkanku.
15 Diosqa wakchakunatam salvan
espada hina kiruyoq atoq runakunamanta.
Diosqa wakchakunatam salvan
kallpasapa runakunapa makinmanta.
16 Payqa mana imayoqkunapa hapipakunanmi.
Mana allin ruraqkunapas upallakunmi.
17 ¡Mayna kusisqam Diospa corregisqan runaqa!
Chaynaqa amayá wischupakuychu
Tukuy Atiyniyoq Diospa castigontaqa.
18 Runaman heridata Dios qoykuspanqa
hina kikintaqmi chaytaqa vendaykunqa.
Pitapas Dios maqarachispanqa
hina paytaqmi hampiykunqa.
19 Payqa achka kutipim sasachakuymanta
librasunki qamtaqa.
Achka kutipim mana allinqa
mana imanasunkichu qamtaqa.
20 Yarqay tiempopim payqa
wañuymanta librasunki.
Guerra tiempopim payqa
espadamanta librasunki.
21 Payqa nina qallu runamantam
pakaykusunki.
Ima desgraciapas hamusuptikim
mana mancharikuspa takyanki.
22 Qamqa asikunkiñam ima desgraciamantapas.
Qamqa asikunkiñam yarqay chayamusuptikipas.
Manam manchakunkichu purun animalkunatapas.
23 Chakrapi rumikunapas manam imanasunkichu.
Purunpi animalkunapas manam imanasunkichu.
24 Qamqa wasikipim tariykunki
tukuy imaykipas allinlla kasqanta.
Qamqa kanchaykipi animalkunata
watukuykuspam tariykunki llapallanta.
25 Miraynikikunapas achkallaña
kasqantam qamqa tariykunki.
Willkaykikunapas kay pachapi
pasto hinaña achkallaña
kasqantam tariykunki.
26 Wañukunaykikamam kallpaykipas
mana pisinqachu qampaqqa.
Poqosqa trigo tiemponpi
hoqarisqa hinam kanki qamqa.
27 Tukuy chaykunataqa ñoqaykum
yachamurqaniku chayna kasqanta.
Hinaptinqa chayman hina kawsanaykipaqyá
qampas kasukuy uyarisqaykita.