Jobta Elifaz qaqchasqanmanta
(Job 4–14)
4
Teman lawmanta Elifaz sutiyoq runam rimarispan Jobta nirqa:
2 Job,
qamqa ¿piñakuruwaqchum
qamta rimapayaykuptiykuqa?
¿Pitaq kanman upallallaqa
mana rimapayakuspankuqa?
3 Qamqariki achka-achkamanmi yachachirqanki.
Mana kallpayoqtam kallpancharqanki.
4 Qamqariki wichiykuchkaqña runatam
rimapayaykuspa kallpanchaykuq kanki.
Moqonpas doblakuruchkaqña runatam
kallpanchaykuq kanki.
5 Kunanñataqmi mana allin
qanman chayaramusuptiki
manapas unaypi amirunki.
Kunanñataqmi mana allin
qanman tuparamusuptiki
manapas unaypi hukmanyarunki.
6 Diosta adorachkaspaykiqa
¿imanasqamá manaqa paypichu hapipakunki?
Mana huchayoq kawsachkaspaykiqa
¿imanasqamá manaqa Diosmanchu hapipakunki?
7 Kunanyá yuyaymanariy
¿Pi inocente runataq chinkarunman?
¿Maypitaq Diospa munasqanman hina
kawsakuq runaqa purmachisqa kanman?
8 Ñoqapa rikusqayman hinaqa
yapuchkaq hina mana allinllata tarpuqqa
chaytataqmi cosechanqa.
Ñoqapa rikusqayman hinaqa
tarpuchkaq hina ñakarichiyllata tarpuqqa
chaytataqmi cosechanqa.
9 Diospa samayninwanmi paykunaqa chinkarunku.
Viento hina piñakuyninwanmi puchukarunku.
10 Leon hinaña ñawrawyaptinpas,
leon hinaña qaparkachaptinpas
kirunkunam pakipasqa kanqa.
Kallpanpi kaq leon hina kaptinpas
kirunkunam pakipasqa kanqa.
11 Orqo leonqa wañurun
mana imapas mikunanpaq kaptinmi.
China leonpa wawankunaqa cheqerun
mana imapas mikunanpaq kaptinmi.
12 Huk asuntotam upallallamanta
huk kaqnin willaykuwarqa.
Chaytaqa rinrillaypim
huk kaqnin willaykuwarqa.
13 Pesadillallaña kanan tutamriki,
miski-miskita runakuna puñuchkaptinmiki
14 ñoqallaymanqa katkatataywan
llumpay manchakuy yaykuruwarqa.
Llapa tullullaykunapas
llumpa-llumpaytam katkatatarqa.
15 Ñawpaqniytam huk espiritu pasarurqa,
cuerpoypi pelokunapas mancharikuptiymi sayarirurqa.
16 Ñawpaqniypim sayaykurqa chay rikuriykuwaqniyqa
ichaqa manam rikurqanichu uyantaqa.
Uyarirqanitaqmi upallallamanta kayna rimarisqantaqa:
17 “Runaqa manam kanmanchu Diosmanta
astawanraq allin ruraqqa.
Runaqa manam kanmanchu unanchaqninmanta
aswanraq chuyaqqa.
18 Diosqa manam confiakunchu
serviqninkunapipas.
Diosqa pantaytam tarin
angelninkunapipas.
19 Chaynaqa ¿imaynamá confiakunman
mana kallpayoq runapiqa?
Ñutu allpapa hawanpi
mitumanta wasi rurasqa hinallam runaqa.
Sarurusqa pacha puyu hina
wañuruqllam runaqa.
20 Achikyaqmanta tutaykuqkamallam
sarupasqa rikurirunku.
Mana pipapas yuyarisqanmi
wiñaypaq chinkarunku.
21 Waskan chutukuruptin tuñiruq karpa hinallam
paykunaqa wañurunku.
Yachayniyoq kayta manaraq haypachkaspam
paykunaqa wañurunku.”