Nacekusqan punchawta Job ñakasqanmanta
3 Ñakasqayá kachun
mamaypa wiksayakuwasqan tutaqa.
Ñakasqayá kachun
mamaypa wachakuwasqan punchawqa.
4 Chay punchaw
tutay-tutay rikuriruptinqa
¡ima allincha kanman karqa!
Diospuni chay punchawta
manaña kaqpaqpas hapiptinqa
¡ima allincha kanman karqa!
Chay punchawpa hawanman
manaña kanchaykuptinqa
¡ima allincha kanman karqa!
5 Chay punchawta yanay-yanay
tutayay tapaykuptinqa
¡ima allincha kanman karqa!
Chay punchawta yanay-yanay
puyu wankuykuptinqa
¡ima allincha kanman karqa!
Chay punchawta tutayay venceruptinqa
¡ima allincha kanman karqa!
6 Chay tutata yanay-yanay
tutayay millpuruptinqa
¡ima allincha kanman karqa!
Chay punchawta watapa punchawninkunapi
mana chaskiptinkuqa
¡ima allincha kanman karqa!
Chay punchawta watapa killankunapi
mana yupaptinkuqa
¡ima allincha kanman karqa!
7 Chay tutapi mana wiksayakuptinkuqa
¡ima allincha kanman karqa!
Chay tutapi mana kusikuypas kaptinqa
¡ima allincha kanman karqa!
8 Chay punchawta ñakaqkuna ñakaptinkuqa
¡ima allincha kanman karqa!
aLeviatanta rikcharichiy yachaqkuna
chay punchawta ñakaptinkuqa
¡ima allincha kanman karqa!
9 Chay punchawpaq achikyaq lucerokunapas
mana kanchaptinqa
¡ima allincha kanman karqa!
Chay punchawpaq suyasqanku achkiypas
mana chayamuptinqa
¡ima allincha kanman karqa!
Chay punchawpaq mana achikyarimuptinqa
¡ima allincha kanman karqa!
10 Chay punchawqa ñakasqayá kachun
nacenaypaq mana harkakusqanmanta.
Ñakasqayá kachun kayna sasachakuykuna
qawanaypaq mana harkakusqanmanta.
11 ¿Imanasqataq manaqa wañukurqanichu
mamaypa wiksallanpiraq kachkaspayqa?
¿Imanasqataq manaqa wañukurqanichu
mamaypa wiksanmanta chayraq lloqsimuchkaspayqa?
12 ¿Imapaqtaq millqaypipas chaskiwarqaku?
¿Imapaqtaq ñuñutapas qoykuwarqaku?
13 Sichum wañukuymanña karqa hinaspaqa
ñachá siriykuspa samakuchkaymanña karqa.
Sichum wañukuymanña karqa hinaspaqa
ñachá puñukuspa hawkaña kachkayman karqa.
14 Ñoqaqa ñachá puñukuchkaymanña karqa
kay pachapi reykunapiwan consejaqkunawanpas.
Paykunam kikinkupaq rurakunku wasikunata
ichaqa ñam purmasqaña tarikuchkan chaykunapas.
15 Ñoqaqa ñachá puñukuchkaymanña karqa
qori kapuqniyoq kamachikuqkunawan.
Ñoqaqa ñachá puñukuchkaymanña karqa
qollqewan wasin huntachiq kamachikuqkunawan.
16 ¿Imanasqataq sulluruq wawa hinaqa
mana pakasqachu karqani?
¿Imanasqataq nacekuchkaspan
wañukuq wawachakuna hinaqa
mana pakasqachu karqani?
17 Wañuqkunapa kasqanpiqa mana allin ruraqkunapas
manañam fastidiakunkuchu.
Wañuqkunapa kasqanpiqa pisipaq runakunapas
manañam pisipankuñachu.
18 Chaypiqa presokunapas ñam samakunkuña.
Capatazpa qaqchakuyninmantam samakunkuña.
19 Chaypiqa taksapas-hatunpas kuskam kachkanku.
Sirvientekunapas patronninmantam libreña kachkanku.
20 ¿Imanasqataq ñakariqmanqa
Diospas qonraq achkiyta?
¿Imanasqataq llakisqamanqa
Diospas qonraq kawsakuyta?
21 Paykunamanqa wañuyta suyaptinkupas
manamya chayamunchu.
Pakata hinaña maskaptinkupas
manamya chayamunchu.
22 Paykunaqa sepulturapiñam llumpa-llumpayta kusikunqaku.
Paykunaqa sepulturaman uraykuspañam chayraq kusikunqaku.
23 ¿Imanasqataq Diosqa kawsachin
mana maymanpas risqan yachaq runataqa?
¿Imanasqataq Diosqa kawsachin
qenchawan hina wichqarusqan runataqa?
24 Llakillaña hapiwasqanraykum
mikuytapas manaña mikuniñachu.
Yaku tallisqa hinañamya
qaparkachasqayqa manaña taninñachu.
25 Imam manchakusqaymi hamuruwanña.
Imam manchakusqaymi sucederuwanña.
26 Manamya hawka kawsakuyniypas kanchu.
Manamya hawka samakuyniypas kanchu.
Hukmanyasqalla kaspaymi
imaniraq hawkayaytapas
mana tarillanichu.