2
Huk punchawmi angelkuna Tayta Diospa qayllanman rirqaku.
Satanaspas paykunawan kuskataqmi rirqa Tayta Diospa qayllanman.
2 Chaymi Satanasta Tayta Dios tapurqa:
—¿Maymantataq hamuchkanki?
—nispa.
Hinaptinmi Satanasñataq nirqa:
—Allpa pachata canton-canton muyumusqaymantam hamuchkani —nispa.
3 Hinaptinmi Tayta Diosñataq nirqa:
—¿Cuentata qokamurqankichu serviqniy Jobmanta?
Pay hinaqa manam pipas kanchu allpa pachapiqa.
Payqa mana huchallikuspa munasqayman hina allin ruraqmi.
Payqa adoraqniy kaspanmi imapas mana allinmantaqa rakikunpuni.
Yanqapuni paypa kapuqninkunata tukurachiwaptikipas hinallaraqmi payqa mana huchayoq kachkan —nispa.
4 Chaymi Satanasñataq nirqa:
—Qararayku qara,
vidanraykum runaqa tukuy ima kapuqnintapas qonman.
5 Aychanpiwan tullunpi nanayta qoykuptikiqa uyaykipipunim ñakasunki —nispa.
6 Hinaptinmi Tayta Diosñataq Satanasta nirqa:
—Allinmi,
munasqaykitayá ruray paywanqa ichaqa amam wañurachinkichu —nispa.
7 Tayta Diospa qayllanmanta Satanas lloqsispanmi llumpa-llumpay chupu onqoywan Jobta hapirachirqa.
Chay chupukunam Jobpa cuerponpi rikurirurqa chaki plantanmanta qallaykuspa uma puyukninkama.
8 Chaymi Jobqa uchpapa hawanpi tiyaykuspan pakisqa kallanawan siksikurqa.
9 Warminñataqmi payta nirqa:
—¿Hinallaraqchu qamqa mana huchallikuq kachkanki?
¡Diosta ñakaspaykiyá wañuy!
—nispa.
10 Hinaptinmi Jobñataq nirqa:
—¡Mana yuyayniyoq warmikuna hinam rimachkanki!
allin kaqkunata Diosmanta chaskichkaspanchikqa ¿imanasqataq mana allin kaqkunataqa manaqa chaskichwanchu?
—nispa.
Tukuy chaykunawanpas rimasqanpiqa Jobqa manam huchallikurqachu.
Jobta amistadninkuna watukusqanmanta
11 Jobpam karqa kimsa amistadninkuna.
Hukninpa sutinmi karqa Elifaz.
Payqa karqa Teman lawmantam.
Hukninpa sutinñataqmi karqa Bildad.
Payqa karqa Sua sutiyoq lawmantam.
Hukninpa sutinñataqmi karqa Zofar.
Payqa karqa Naamat lawmantam.
Paykunam Jobta tukuy mana allinkuna pasarusqanta yacharuspanku rirqaku compañaspa consuelanankupaq.
12 Karullamantaraq qawarispankum Jobtaqa mana reqsiypas atinataña rikururqaku.
Qaparillawanña waqaspankum llakikuymanta pachankutapas llikiparqaku,
allpatapas altomanmi maqchirqaku umankuman wichimunanpaq.
13 Paykunapas Jobpa waqtan pampapim tiyaykurqaku.
Jobpa nanaynin llumpa-llumpay kasqanraykum paykunaqa pasaypaq imallatapas rimarirqakuchu,
qanchis punchaw qanchis tutanmi chaynalla karqaku.