JOBWAN SUTICHASQA LIBRO
Job sutiyoq runapa ñakarisqanmanta
1
Uz sutiyoq lawpim yacharqa Job sutiyoq runa.
Payqa mana huchallikuspam Diospa munasqanman hina allinta ruraq.
Payqa Diosta adoraqmi karqa,
payqa imapas mana allinmantaqa rakikuqpunim.
2 Churinkunam karqa qanchis qarikuna hinaspa kimsa warmikuna.
3 Paypaqa kapurqam qanchis waranqa ovejankuna,
kimsa waranqa camellonkuna,
pichqa pachak pares bueyesninkuna,
pichqa pachak china asnonkuna,
kapurqataqmi achka-achka sirvientenkunapas.
Jobqa karqa intipa qespimunan lawpi llapallan yachaqkunamantapas aswan reqsisqa runam.
4 Qari churinkunam tupamuqnin punchawpi wasinpi ruraq huk hatun convidota hinaspam watukanakuqku,
qayachimuqkutaqmi kimsan paninkutapas paykunawan tomaspa mikunankupaq.
5 Chayna qatinasninpi convidokuna tukuruptinmi Jobqa churinkunata qayachimuq paykunata chuyanchananpaq.
Jobqa tutapayta hatarispanmi sapa churinpa huchanrayku animalta wañuchispa Diospaq lliwta kañaq.
Sapa kutim chaynata ruraq kaynata piensasqanrayku:
—Ichapas churiykunaqa imawanpas huchallikurun,
ichapas paykunaqa sonqonkupi Diosta insultarunku —nispa.
6 Huk punchawmi angelkuna Tayta Diospa qayllanman rirqaku.
Satanaspas paykunawan kuskataqmi rirqa Tayta Diospa qayllanman.
7 Chaymi Satanasta Tayta Dios tapurqa:
—¿Maymantataq hamuchkanki?
—nispa.
Hinaptinmi Satanasñataq nirqa:
—Allpa pachata canton-canton muyumusqaymantam hamuchkani —nispa.
8 Hinaptinmi Tayta Diosñataq nirqa:
—¿Cuentata qokamurqankichu serviqniy Jobmanta?
Pay hinaqa manam pipas kanchu allpa pachapiqa.
Payqa mana huchallikuspa munasqayman hina allin ruraqmi.
Payqa adoraqniy kaspanmi imapas mana allinmantaqa rakikunpuni —nispa.
9 Chaymi Satanasqa Tayta Diosta nirqa:
—Arí,
Jobqariki adorasuchkanki manam debaldellachu.
10 Qamqariki qenchawan hina muyuruspam waqaychachkanki paytaqa chaynataq familiankunatapas hinaspa tukuy ima kapuqninkunatapas.
Llamkayninpipas bendeciykuptikim paypaqa animalninkunapas chaylawpiqa llumpa-llumpayta mirarun.
11 Aswanqa paypa llapa kapuqninta purmarachiptikiqa uyaykipipunim ñakasunki —nispa.
12 Hinaptinmi Tayta Diosñataq Satanasta nirqa:
—Allinmi,
munasqaykitayá ruray Jobpa llapallan kapuqninkunawanqa.
Ichaqa amam imanankipaschu kikin Jobtaqa —nispa.
Hinaptinmi Satanasqa lloqsirqa Tayta Diospa qayllanmanta.
13 Huk punchawmi Jobpa churinkuna mayor kaqpa wasinpi mikuspa tomachkarqaku.
14 Hinaptinmi Jobman hamuspan huk runa nirqa:
—Bueyeskunawan yapuchkaptiykum chaynataq asnokunapas hichpaykupi mikuchkaptinmi
15 qonqayta chayaramurqaku Saba casta runakuna hinaspam animalkunata salteawaspanku runaykikunatapas lliwta wañurachinku.
Ñoqallañam lluptiramuni qanman willanaypaq —nispa.
16 Manaraqpas chay runa willakuyta tukuchkaptinmi huk runapas chayaramuspan nirqa:
—Cielomanta Diospa ninan wichiykamuspanmi ruparun llapallan ovejakunatawan llapallan michiqkunata.
Ñoqallañam lluptiramuni qanman willanaypaq —nispa.
17 Manaraqpas chay runa willakuyta tukuchkaptinmi huk runapas chayaramuspan nirqa:
—Kimsaman rakisqa Caldea tropakuna hamuruspankum camellokunata qatikunku,
michiqkunatapas espadawanmi wañurachinku.
Ñoqallañam lluptiramuni qanman willanaypaq —nispa.
18 Manaraqpas chay runa willakuyta tukuchkaptinmi huk runapas chayaramuspan nirqa:
—Piwi churikipa wasinpim llapallan churikikuna mikuspa tomachkarqaku.
19 Hinaptinmi qonqaymanta chunniqpa waklawninmanta viento rikuriramuspan churikikunapa kasqan wasita tawan esquinamanta tuñirachin hinaptinmi llapallanku wañurun.
Ñoqallañam lluptiramuni qanman willanaypaq —nispa.
20 Chaymi Jobqa llakikuymanta hatarispan pachantapas llikipakurqa hinaspam chukchantapas rutukuruspan qonqoranpa pampaman kumuykuspan Diosta adorarqa,
21 paymi nirqa:
Nacekuspayqa manam imatapas apamurqanichu.
Wañukuspaypas manataqmi imatapas apasaqchu.
Tayta Diosmi qowarqa imatapas.
Paytaqmi qechuruwanpas.
Tayta Diosyá alabasqa kachun.
22 Tukuy chaykunawanpas Jobqa manam huchallikurqachu,
manataqmi chaykunamantaqa Diosmanchu culparqa.