Diosqa allin ruraq kasqanmanta Bildadpa rimarisqanmanta
8
Sua sutiyoq lawmanta kaq Bildadmi Jobta nirqa:
2 ¿Haykapikamataq chaykunata rimanki?
Sinchillataña viento pukuchkaq hinam qamqa rimachkanki.
3 Dios Juzgaspanqa
manam pitapas engañanchu.
Tukuy Atiyniyoq Diosqa allin ruraytaqa
manam qewinchu.
4 Paypa contranpichá
churikikunaqa huchallikurunku.
Hinaptinchá paykunaqa
mana kasukusqankumanta castigasqa kachkanku.
5 Sichum Diosta tukuy sonqoykiwan
maskaptikiqa,
sichum tukuy atiyniyoq Diosta
ruegakuptikiqa,
6 sichum limpiolla Diospa munasqanman
hina kawsakuptikiqa
cheqaptapunim Diosqa
qamta waqaychasunki.
Cheqaptapunim payqa
merecesqayki kaqta kutichipusunki.
7 Ñawpaq kapusuqnikikunam
pisillapaq rikchakapusunki.
Hamuq tiempopiqa kapuqnikikunam
aswan achkaraq kapusunki.
8 Qamqa tapurikuyá ñawpa runakunata.
Qamqa yachayá abuelonkupa yachasqanta.
9 Ñoqanchikqa qayna punchawmanta
kaqllam kanchik.
Mana ima yachaqmi
ñoqanchikqa kanchik.
Llantuy hina pasaruqllam
ñoqanchikqa kawsanchik.
10 Ñawpaq runakunaqa rimaspankum
yachachisunki.
Ñawpa runakunaqa sonqomantam
rimapayasunki.
11 Tuturaqa manam wiñanmanchu
mana mitupa kasqanpiqa.
Soqosqa manam wiñanmanchu
mana yakupa kasqanpiqa.
12 Ichaqa chayraq ikllimuptin
mana yakuyoq kaspanqa,
ichaqa chayraq ikllimuptin
manaraq rutuna kaspanqa
wakin pastokunamantapas
puntataraqmi chakirunqa.
13 Chaynapunim Dios qonqaruq
lliw runapa vidanqa.
Chaynapunim Diosmanta mana yuyariq runapa
confianzanqa tukurunqa.
14 Qaytu hina tipiruqllam
confiakusqanqa.
Arañapa llikan hinallam
paypa hapipakusqanqa.
15 Arañapa llikanman tawnapakuykuptinpas
manam aguantanqachu.
Arañapa llikanman hapipakuykuptinpas
manam takyachinqachu.
16 Mana allin ruraq runakunaqa rikchakun
intita qawaq verdellaña qorakunamanmi.
Mana allin ruraq runakunaqa rikchakun
huertapi sumaqllaña mastarikuq pastokunamanmi.
17 Chaykunapa sapinkunaqa
rumipa hawanpim simpanakunku.
Chaykunapa sapinkunaqa
rumikunapa ukunmanmi ustunku.
18 Pipas chaymanta chutaruptinqa
manañam pipas kaqpaqpas hapinqachu chaytaqa.
19 Chaynallam paykunapa kusikuyninqa.
Chaypa wiñasqanpiñataqmi hukña wiñamunqa.
20 Diosqa manam wischunmanchu
mana huchayoq runataqa.
Diosqa manam sayapakunmanchu
mana allin ruraq runamanqa.
21 Ichaqa chaywanpas payqa
simikitam huntachinqa kusikuywan.
Ichaqa chaywanpas payqa
simikitam huntachinqa kusikuy qapariywan.
22 Ichaqa qamta cheqniqnikikunam
penqaypa intusqan kanqaku.
Ichaqa mana allin runakunapa wasinqa
chunnichisqam kanqaku.