—Hatarispayá alabaychik wiñaymanta-wiñaykama kaq yupaychasqanchik Tayta Diosta.

Dios Taytallayku,

tukuy imamantapas aswanqa sutikiyá alabasqa kachun.

6 Qam sapallaykim kanki Tayta Diosqa,

qanmi rurarqanki cielokunatapas,

cielokunapa hawanpi kaqkunatapas,

llapallan lucerokunatapas,

qamtaqmi rurarqanki kay pachatawan llapallan chaypi kaqkunatapas chaynataq lamar qochakunatawan lliw chaypi kaqkunatapas,

qamtaqmi llapallan chaykunataqa kawsachinki chaymi hanaq pachapi angelkunapas adorasunki.

7 —Dios Taytalláy,

qanmi kanki Abramta akllaykuq Diosqa,

paytaqa Caldea law Ur llaqtamantam horqomurqanki hinaspam suticharqanki Abrahanwan.

8 Qanmi qawaykurqanki payqa qampi hapipakuq allin qari kasqanta chaymi paywan huk contratota rurarqanki,

chay contratopim prometekurqanki Canaan casta runakunapa,

Het casta runakunapa,

Amor casta runakunapa,

Ferez casta runakunapa,

Jebus casta runakunapa hinaspa Gerges casta runakunapa allpanta Abrahampa mirayninman qonaykipaq.

¡Chay prometekusqaykitaqa Taytáy,

cumplirqankim!

9 Qamqa qawarqankim Egipto nacionpi imaynam abueloykupa ñakarisqanta,

uyarirqankitaqmi Puka Lamar Qochapa patanpi imaynam waqapakusqankutapas.

10 Hatun milagrokunatawan hatun señalkunatam rurarqanki Rey Faraonpa hinaspa yanapaqninkunapa contranpi chaynataq nacionninpi llapallan runakunapa contranpipas.

Qanmi yacharurqanki Egipto runakunaqa llumpayllataña hatunchakuspa Israel castakunawan imam rurasqankuta,

chaynapimiki sutikipas kachkan kunanqa ancha allin reqsisqaña.

11 Israel castakunapa ñawpaqninpim iskayman rakirurqanki lamar qochata chaymi paykunaqa pasarqaku chakichisqa allpantaña,

ichaqa uku-uku yakuman rumita wischuykuchkaq hinam qocha ukuman wischuykurqanki paykuna qatiq enemigonkunataqa.

12 Israel castakunatam punchawninpi pusarqanki sayanpa puyuwan,

tutanñataqmi pusarqanki sayanpa ninawan chaynapi risqanku ñanta kanchinanpaq.

13 —Sinai Orqopa hawanman uraykamuspam altomanta rimapayamurqanki,

paykunamanmi qorqanki allin reglamentokunata,

cheqap yachachikuykunata,

decretokunata hinaspa sumaq kamachikuykunata.

14 Paykunataqa yachachirqankitaqmi samana punchawtapas qampaq sapaqchanankupaq,

paykunaman willananpaqmi serviqniki Moisesman qorqanki kamachikuykunata,

decretokunata hinaspa yachachikuykunata.

15 Paykuna yarqaymanta kaptinkum qam qorqanki cielokunamanta mikuyta,

yakumanta kaptinkupas taqrawaqtamanta horqoykuspam paykunaman qoykurqanki,

qamqa nirqankitaqmi prometekusqayki nacionman yaykunankupaqpas.

16 —Ichaqa paykunam otaq abueloykum karqaku hatun tukuq rumi sonqo runakuna,

chayraykum qampa kamachikuynikikunata mana kasukurqakuchu.

17 Paykunaqa manam munarqakuchu kasukuyta,

manataqmi yuyarqakuchu paykunapa favorninpi imapas hatun kaqkuna rurasqaykitapas,

rumi sonqo kasqankuraykum Egipto nacionpi huktawan sirviente kayta munaspanku kutikunankupaq akllakurqaku huk kamachikuqta.

Ichaqa qamqa kanki huchakuna pampachaykuq Diosmi,

qamqa kanki llampu sonqo kuyapayakuq hinaspa anaq piñakuq Diosmi,

qamqa kuyakuq kaspaykim paykunataqa mana saqerurqankichu.

18 Kikinkupaq fundisqa malta torota rurakuruspankum nirqaku:

“Kaymi Egipto nacionmanta horqomuwaqninchik diosqa” nispa,

chaykunawanmi llumpayta piñachisurqanki.

19 Qamqa kuyapayakuq kaspaykim paykunataqa mana saqerurqankichu chunniqpipas.

Punchaw riptinkum paykunataqa pusarqa sayanpa puyu,

manam huk punchawllapas chinkarurqachu,

tutan riptinkuñataqmi kanchirqa chay sayanpa nina.

20 Espirituykitapas qorqankim paykunata yachachinanpaq,

paykunataqa manam pisirqachu manawan sutichasqa apachisqayki mikuypas,

yakunayachikuptinkupas qamqa qorqankitaqmi tomanankupaq yakutapas.

21 Paykunataqa tawa chunka watapunim chunniqpi mikuchirqanki,

manam imapas paykunataqa pisirqachu,

pachankupas manam mawkayarqachu nitaqmi chakinkupas punkirqachu.

22 —Paykunamanqa qoykurqankitaqmi gobiernokunatapas hinaspa nacionkunatapas,

chay allpakunapa linderonkunatapas paykunapaqmi parteparurqanki,

chaynapim paykunaqa dueñochakuykurqaku Hesbon llaqtapi yachaq Sehon sutiyoq reypa nacionninta,

dueñochakuykurqakutaqmi Basan nacionpa reynin Ogpa allpantapas.

23 Abueloykupa miraynintaqa cielokunapi lucerokunata hinañam mirachirqanki hinaspam paykunataqa pusarqanki dueñochakunankupaq ñawpa abuelonkuman prometekusqayki allpaman.

24 Chaynapim mirayninkunaqa yaykuspanku Canaan lawpi allpakunata dueñochakurqaku,

chay allpapi yachaqkunatapas paykunapa makinmanñam qoykurqanki chaynapi munasqankuman hinaña chay runakunata ruranankupaq.

25 Paykunaqa dueñochakuykurqakutaqmi murallasqa llaqtakunatapas,

chay tukuy imapa qespinan allpakunatapas,

tukuy imayoq wasikunatapas,

toqosqaña pozokunatapas,

uvas chakrakunatapas,

aceitunas sachakunatapas chaynataq tukuy rikchaq fruta sachakunatapas.

Chaynapim paykunaqa saksanankukama mikurqaku,

paykunaqa wirayaspankum kusikuyllawanña chaskirqaku qampa sumaqllaña qosqaykita.

26 —Ichaqa mana kasukuqña rikuriruspankum traicionarusurqanki,

qampa yachachikuynikikunatapas paykunaqa qepanchakururqakuñam,

qanmanta willakuqkunatapas wañurachispankum llumpa-llumpayta piñarachisurqanki.

27 Chaynapim qampas Taytáy,

chay abueloyku runakunataqa enemigonkumanña qoykurqanki ñakarichisqa kanankupaq chaynapim ñakarispankuña yanapaykunaykipaq mañakusurqanki,

qamñataqmi llakipayakuq kasqaykirayku hanaq pachamanta uyariykurqanki,

qamqa libraqnin runakunatam paykunaman kacharqanki chaynapi ñakarichiqnin enemigonkunamanta libraykunanpaq.

28 —Ichaqa hawkayayta tariruspankum huktawan qampa ñawpaqnikipi mana allinta rurarqaku chaynapim qamqa enemigonkupa munaychakuyninmanña qoykurqanki hinaptinmi paykunaqa yanapaykunaykipaq huktawan mañakusurqanki,

chaymi qamqa llakipayakuq kasqaykirayku hanaq pachamanta uyariykurqanki,

qamqa achka kutipimá paykunataqa libraykurqanki.

29 Paykunataqa anyaypaqmi-anyarqanki yachachikuynikikunaman kutirikunankupaq,

ichaqa paykunaqa hatun tukuqllaña rikuriruspankum mana kasurqachu kamachikuynikikunatapas,

paykunaqa huchallikururqakutaqmi yachachikuynikikunapa contranpipas,

chay yachachikuykunaqariki kawsaytam qon pipas kasukuqninmanqa.

Chay abueloyku runakunaqa mana kasukuq kaspankumá qepanchakurusurqanki hinaspam rumi sonqoña rikurirurqaku.

30 Paykunataqa watantin-watantinmi pacienciakuspayki Espirituykipa yanapasqan willakuqkunawan willachirqanki ichaqa paykunaqa manam uyarikurqakuchu,

chayraykum paykunataqa allpakunapi munaychakuq runakunamanña qoykurqanki.

31 Chaywanpas qamqa llumpay llakipayakuq kasqaykiraykum paykunataqa mana pasaypaqchu chinkarachirqanki nitaqmi pasaypaqqa saqerurqankichu.

Qamqariki kanki llampu sonqo kuyapayakuq Diosmi.

32 —Atiyniyoq Diosnillayku,

qamqariki kanki hatu-hatun manchakuypaq Diosmi,

qamqariki wiñaypaqmi cumplinki contrato rurasqaykitawan hatun kuyakuynikitaqa.

Chaynaqa Diosnillayku,

amayá asllapaqchu hapiy tukuy mana allinkuna pasaruwasqankutaqa,

chaynam pasarurqa reyniykuta,

jefeykuta,

sacerdoteykuta,

qanmanta willawaqniykuta,

abueloykuta hinaspa llapallan runakunata.

Chaykunaqariki pasawarqanku Asiria nacionniyoq reykunapa tiemponmantaraqmi kunankama.

33 Chaywanpas qamqariki mana huchayoqmi kanki tukuy imapas pasawasqankumantaqa,

qamqariki tukuy imatapas rurarqanki cheqap ruraynikiman hinam,

ñoqaykum ichaqa mana allinkunata rurarqaniku.

34 Reyniykupas,

jefeykupas,

sacerdoteykupas hinaspa abueloyku runakunapas manam rurarqakuchu yachachikuynikikunaman hinaqa.

Paykunaqa manataqmi kasukurqakuchu kamachikuynikikunatapas chaynataq paykunapa contranpi willasqayki Chunkantin Kamachikuykunatapas.

35 Paykunaqa aswanraqmi gobiernonkupi tarikuspankupas mana yupaychasurqankichu,

manataqmi qepanchakurqakuchu mana allin rurasqankutaqa.

Paykunaqa chaykunataraqmi rurarqaku qosqayki hatu-hatun tukuy imapa wiñanan chakrakunapi tukuy imata qoykuchkaptikipas.

36 —Qawariwaykuyá Diosnillayku,

kunanqariki sirviente runakunañam kachkaniku,

kaynaqa kachkaniku abueloykuman qosqayki allpapim,

kay allpataqa qorqanki imapas wiñaqkunatawan imapas allin kaqkunata mikunankupaqmi.

37 Imapas achkallaña ruruqkunaqa hawaykuman churasqayki reykunapañam rikurirun,

chaynaqa kachkan huchaykuraykum,

paykunañam munasqankuman hina munaychakuchkanku ñoqaykumantapas chaynataq animalniykumantapas,

chayraykum ñoqaykuqa ancha llakisqallaña kachkaniku.

38 —Chayraykum ñoqaykuqa chunkay-chunkayta prometekuspa qellqaniku huk contratota,

chaypi firmaspam sellonkutapas churachkanku jefeykupiwan,

Leviy casta runakuna chaynataq sacerdoteyku.