Nehemiaspa contranpi rimanakusqankumanta
6
Sanbalatmi Tobiaspiwan Arabia lawmanta kaq Gesem sutiyoq runapiwan,
wakin enemigoyku runakunapiwan yacharurqaku muralla perqasqayta chaynataq chaypiqa murallapa raqranpas manaña kasqanta.
Chay tiempokamaqa manaraqmi punkukunatapas churarqanichu.
2 Sanbalatpiwan Gesenmi kachamurqaku kaynata niwanankupaq:
Hamuy Ono Pampapa huk kaqnin llaqtachanpi huñunakunanchikpaq —nispa.
Paykunaqariki piensarqaku mana allinta rurawanankupaqmi.
3 Chaymi kacharqani runakunata kaynata nimunankupaq:
—Ñoqaqa rurachkani hatun obratam chaymi hamuytaqa mana atiramuymanchu,
qamkunaman rispay kay obrata saqeruptiyqa kay obram sayarunman —nispa.
4 Tawa kutikamam nichimuwarqaku,
ñoqañataqmi paykunaman nichimurqani puntapi nichimusqayta hinalla.
5 Hinaptinmi Sanbalatqa runanwanña kunamusqa hina chayna willakuyllata kunanwanqa pichqa kutikamaña,
apachimuwasqataqmi kicharayachkaq huk cartatapas.
6 Chay cartam kaynata nisqa:
Huklaw nacionniyoq runakunam rimachkanku,
Gesempas hina chaynallatam nin,
qamsi judiokunapiwan hoqarikuyta piensachkanki chaysi murallatapas perqachichkanki,
ninkutaqmi paykunapa reynin karuy munasqaykitapas.
7 Chaynallataqsi churarunkiña Diosmanta willakuqkunatapas:
“Kachkanñam Juda nacionpi rey” nispa chaynapi Jerusalen llaqtapi qanmanta willakachakunankupaq.
Chay rimaykunataqa Rey Artajerjesmanmi willaykunmanku,
chaynaqa hamuypuni rimanakunanchikpaq.
8 Chaymi Sanbalatman nichimurqani:
—Manam chay nisqaykiman hinachu,
chaykunataqa umallaykimantam horqorunki —nispa.
9 Ñoqaykuta mancharichiypi kawaspankum nirqaku:
—Paykunapa kallpanqa obra rurasqankupim pisirunqa chaymi mana tukunqakuchu —nispa.
Chaymi Tayta Diosta mañakurqani:
—Kunanqa aswanraqyá kallpanchaykullaway —nispa.
10 Chaymantam rirqani Mehetabelpa willkan otaq Delaiapa churin Semaiaspa wasinman,
paymi chaypi wichqarayachkasqa hinaspam kaynata niwarqa:
—Diospa templonpa santuarionpi huñunakuspayá punkunkunata wichqarusunchik,
wañuchisunaykipaqmi hamuchkanku,
kunan tutapunim chayamunqaku —nispa.
11 Chaymi payta nirqani:
—Ñoqa hina qariqa manam lluptinmanchu,
ñoqa hina qariqa manam santuarioman yaykunmanchu vidanta salvananpaqqa,
manam yaykusaqchu —nispa.
12 Musyarurqanim paytaqa Dios mana kachamusqanta,
kaytaqa rimachkarqa Tobiaswan Sanbalat pagarusqanraykum.
13 Paykunam pagarurqaku manchachiwananpaq chaynapi chayta ruraspa huchallikurunaypaq hinaspataq paykunapa ñawpaqninpipas penqaypi kaptiy humillachiwanankupaq.
14 Dioslláy,
amayá qonqaychu Tobiaswan Sanbalatpa kay rurasqankutaqa,
amataqyá qonqaychu qanmanta willakuq Noadias sutiyoq warmimantapas chaynataq qanmanta wakin willakuqkunamantapas,
paykunam manchachiwayta munarqaku.
15 Murallamá tukusqa karqa Elul killapa iskay chunka pichqayoq punchawninpi.
Chay obratam qespichirqaniku pichqa chunka iskayniyoq punchawpi.
16 Llapallan enemigoykum yacharurqaku,
rikurqakutaqmi muyuriqniykupi kaq nacionkunapas,
paykunam penqakuspanku humillakururqaku kay rurasqaykuqa Diospa yanapakuyninwan qespichisqa kasqanrayku.
17 Chay punchawkunapim achka cartakunata Juda lawpi reqsisqa runakuna apachinakuqku Tobiaswan.
18 Chaynataqa rurarqaku Juda lawpi achkallaña runakuna Tobiasman juramentasqankuraykum.
Tobiasqariki karqa Ara sutiyoq runapa churin Secaniaspa masanmi,
Tobiaspa churin Johananpa warminñataqmi karqa Mesulampa warmi churin,
Mesulamqa karqa Berequiaspa churinmi.
19 Ñoqapa ñawpaqniypipas allinllatañam rimaqku Tobiasmantaqa,
paymanmi willaqku tukuy ima rimasqaykunata.
Hinaptinmi Tobiasñataq apachimuwaq cartakunata manchachiwananpaq.