—Ñoqaykuqa achkallañam kaniku,

achkallañataqmi wawa-churiykupas,

chayraykum mana wañurunaykupaq munaniku trigota —nispa.

3 Wakinñataqmi nirqaku:

—Yarqawaptinkum trigota rantinaykupaq prendakuruniku chakraykuta,

uvas huertaykuta chaynataq wasiykutapas —nispa.

4 Wakinñataqmi nirqaku:

—Qollqetam prestakuruniku reyman impuestota paganaykupaq chaypaqmi chakraykutawan uvas huertaykutapas prendakunayku.

5 Judiomasinchikkunawanqa ayllupuram kanchik,

churinchikpas churinku hinam,

paykunapa sirvientenña kananpaqmi qorqaniku qari churiykutawan warmi churiykutapas.

Wakin warmi churiykuqa sirvientañam kachkankupas,

manataqmi harkakunaykupaq ima ruraytapas atinikuchu chakraykupas hinaspa huertaykupas hukpa makinpiña kasqanrayku —nispa.

6 Quejankutawan willakuwasqankuta uyariruspaymi sinchillataña rabiarurqani.

7 Chaykunamanta yuyaymanarispaymi reqsisqa runakunata chaynataq gobiernaq runakunata qaqcharqani kaynata:

—¿Mirayninpaqraqchum castaykichikman prestankichik?

—nispa.

Chay asuntomanta rimanaykupaqmi huñururqani runakunata.

8 Paykunatam nirqani:

—Ñoqaykum atisqaykuman hina kutichimurqaniku nacionkunaman rantikusqa judiomasinchikkunata.

¿Qamkunañataqchu aylluykichikta rantikurunkichik ñoqayku kutichimunaykupaq?

—nispa.

Upallakuspa mana imatapas niwaptinkum.

9 nirqani:

—Manam allinchu chay rurasqaykichikqa.

¿Manachum respetankichik Diosninchikta chaynapi enemigonchik nacionkuna ama burlakuwananchikpaq?

10 Ñoqapas aylluntinmi runaykunapiwan qollqetawan trigota prestarqaniku chaynaqa qonqasunñayá miraynin mañaytaqa.

11 Ruegakuykichikmi chakrankuta,

uvas huertankuta,

aceituna huertankuta chaynataq wasinkutapas kutichipunaykichikpaq.

Ruegakuykichiktaqmi qollqemantapas,

trigomantapas,

vinomantapas hinaspa aceitemantapas manusqaykichikpa miraynin mañasqaykichikta kutichipunaykichikpaq —nispa.

12 Paykunañataqmi niwarqaku:

—Kutichipusaqkum,

manañam imatapas mañasaqkuchu,

nisqaykiman hinamá rurasaqkuqa —nispa.

Chayman hinamá sacerdotekunata qayaspay juramentachirqani.

13 Pachaytapas taspispaymi kaynata nirqani:

—Pipas kay juramento mana cumpliqkunatayá wasinkumantawan llamkayninkumanta Dios kaynata taspichun hinaspa llapa imantapas qechuchun —nispa.

Lliw huñunasqa runakunañataqmi nirqaku:

—¡Chaynayá kachun!

—nispa.

Tayta Diosta alabaspamá chayman hina rurarqaku.

14 Rey Artajerjesmi churawarqa Juda lawpi prefecto kanaypaq.

Prefecto kaytam qallarirqani pay iskay chunka watamanña gobiernachkaptin.

Kimsa chunka iskayniyoq watamanña gobiernachkaptinmi chunka iskayniyoq wataña prefectoman tupaq mikuyta ñoqapas nitaq aylluykunapas mana chaskirqanikuchu.

15 Ñoqamanta punta kaq prefectokunaqa ñakarichirqam runakunata hinaspam mikunankupaqwan vino tomanankupaq sapa punchaw chaskiqku yaqa parte kilo qollqeta,

paykunapa yanapaqninkunapas ñakarichirqam runakunataqa.

Ñoqam ichaqa Diosta respetasqayrayku mana chaynatachu rurarqani.

16 Kay muralla hatarichiypipas ruranaytam rurarqani,

manataqmi rantirqanikuchu chakrakunatapas,

llapallan runaykunapas chay llamkaypim karqaku huk runa hinalla.

17 Judiokuna kaspapas otaq gobiernaqkuna kaspapas ñoqamantataqmi mikuqku pachak pichqa chunkan runakuna ichaqa manam yupasqachu karqa ñoqaykupa muyuriqniykupi kaq nacionkunamanta hamuq runakunaqa.

18 Sapa punchaw mikuyta rurachispaymi nakachirqani huk torota,

akllasqa soqta ovejakunata hinaspa raprayoq animalkunata,

sapa chunka punchawñataqmi nana-nanaq vinota apachimurqani.

Chaywanpas prefecto kasqayrayku tupawaqniy mikuytaqa manam mañakurqanichu,

chaynataqa rurarqani kay runakunapa llumpayllaña llamkayninku kasqanraykum.

19 Chaynaqa Dioslláy,

allinniypaqyá ama qonqawaychu kay runakunapaq tukuy ima rurasqayrayku.