—¿Imatataq chay mana kallpayoq judiokunaqa rurachkanku?

¿Yapamantachu murallakunata hatarichinqaku?

¿Diospaqchum animalkunata wañuchipunqaku?

¿Huk punchawllapichum llamkayta tukurunqaku?

¿Mosoqyarachinqakuchum montonasqa allpa ukupi kañasqa rumikunata?

—nispa.

3 Sanbalatwan kuskataqmi kachkarqa Amon castamanta Tobiaspas,

paymi nirqa:

—Qawaychik,

wak perqasqanku murallataqariki atoq seqaspanpas tuñirachimunqam —nispa.

4 Chaymi ñoqa Nehemias kaynata mañakurqani:

—Diosllayku,

uyariyá asipayawasqankuta,

kikinkumanyá kutirachiy kamikuyninkuta,

paykunaqa huklaw nacionman preso pusasqayá kachunku.

5 Amayá pampachaychu mana allinkuna rurasqankumantaqa,

ñawpaqnikipi kaq huchankutapas amataqyá limpiaychu perqaqkunata sinchillataña rabiachisqankurayku —nispa.

6 Rurarqanikumá murallata hinaptinmi runakuna ganasllawanña rurasqankurayku chawpikamaña lliw muralla rurasqa karqa.

7 Astawanqa Sanbalatpiwan Tobiasmi,

Arabia lawmanta kaqkunapiwan chaynataq Amon castamanta kaqkunapiwan hinaspa Asdod llaqtamanta kaqkunapiwan Jerusalen llaqtapa murallankuna allichasqaykuta chaynataq raqrankunatapas tapasqaykuta uyariruspanku sinchillataña piñakururqaku.

8 Paykunam lliwchanku rimanakururqaku Jerusalen llaqtapa contranpi peleanankupaq chaynapi dañanankupaq.

9 Chaymi Diosniykuta mañakuspayku churarqaniku runakunata tuta punchaw llaqtata cuidanankupaq chaynapi paykunamanta defiendekunaykupaq.

10 Juda lawmanta runakunañataqmi rimarqaku kaynata:

—Apamuqkunapa kallpankum pisirunña,

wischunapaq allpapas achkam,

manataqmi atiymankuchu muralla perqaytaqa —nispa.

11 Ñoqaykupa contraykupi kaqkunañataqmi nirqaku:

—Amayá yachachunkuchu nitaq qawachunkuchu paykunapa chawpinman yaykuruspa wañurachinanchikkama hinaspa llamkasqankuta sayarachinanchikkama —nispa.

12 Aswanqa enemigoykuwan yachaq judiokuna hamuspankum willapayawarqaku chunka kutikama:

—Maylawninchikmantapas paykunaqa atacawasunchikmi —nispa.

13 Chaymi churarqani runakunata murallapa qepan uraynin lawkunapi,

churarqanitaqmi murallapa kicharayaqninkunapipas.

Paykunaqa karqaku espadakunawan,

lanzakunawan hinaspa flechakunawan armasqam.

14 Chaymi qawarispay reqsisqa runakunata,

gobiernaq runakunata hinaspa llapallan runakunata nirqani:

—Amayá manchakuychikchu paykunataqa,

amataqyá qonqaychikchu Señorninchikqa hatun kasqanta chaynataq manchakuypaq kasqantapas,

peleaychikyá aylluykichikrayku,

churikichikkunarayku,

warmikichikrayku hinaspa wasikichikrayku —nispa.

15 Enemigoyku chaykuna yacharusqaykutawan paykunapa rimanakuyninkuta Dios yanqacharusqanta uyariruptinkum llapallayku kutiykurqaniku murallapi rurayniykuman.

16 Chay punchawmantam parten runaykuna llamkaqku obrapi,

partenñataqmi lanzakunawan,

harkachikunawan,

flechakunawan chaynataq qasqopas wasapas harkachikunawan armasqa karqaku.

Juda casta runakunapa qepanpiñataqmi kachkarqaku jefekuna.

17 Murallapi perqaqkunawan qepiqkunam huknin makinkuwan llamkaqku obrapi huknin makinwanñataqmi espadata hapiqku.

18 Perqaqkunam llamkaspanku sapakama weqawninkupi watasqa espadayoq karqaku,

corneta tocaqñataqmi ñoqawan kuska karqa.

19 Hinaptinmi reqsisqa runakunata,

gobiernaq runakunata hinaspa llapallan runakunatawan nirqani kaynata:

—Rurananchikqa hatu-hatunmi,

ñoqanchikñataqmi rakinasqa kachkanchik murallapi karupikama.

20 Chaynaqa cornetapa waqasqanta uyarispaykichikmi chaypipuni ñoqaykuwan huñunakunkichik.

Diosninchikmi ñoqanchikpaq peleanqa.

21 Parten runakuna lanza hapirisqa kaptinkumá ñoqaykuñataq llamkarqaniku achikyasqanmanta tutaykunankama.

22 Nirqanitaqmi runakunata chay tiempopi:

—Sapakama sirvientekichikwan Jerusalen llaqtapi kaychik chaynapi tutan cuidakuspa punchawñataq obrapi llamkananchikpaq.

23 Chaynataqmi ñoqapas,

aylluykunapas,

runaykunapas hinaspa compañaqniy llaqta cuidaqkunapas mana llatanakurqanikuchu pachaykuta,

llatanakuspaqa-llatanakurqaniku bañakunallaykupaqñam.