Jerusalen llaqtapa murallankuna kaqllamanta hatarichisqankumanta
3
Sacerdotekunapa jefen Eliasibmi sacerdotemasinkunapiwan perqarqaku Ovejawan sutichasqa zaguanta hinaspam Diospaq sapaqcharqaku.
Punkunkunatapas churaspankum Pachakwan sutichasqa torrekama murallatapas perqarqaku,
chaykunatapas Diospaqtaqmi sapaqcharqaku Hananeel sutiyoq torrekama.
2 Paykunapa waqtanpim perqarqaku Jerico llaqtayoq qarikuna.
Paykunapa waqtanpiñatqmi perqarqa Imripa churin Zacur.
3 Senaapa mirayninkunam perqarqaku Challwawan sutichasqa zaguanta.
Churarqakutaqmi punkupa chakankunatapas,
punkunkunatapas chaynataq aldabankunatapas hinaspa cerrojonkunatapas.
4 Paykunapa waqtanpim allicharqa Cospa willkan otaq Uriaspa churin Meremot.
Paykunapa waqtanpiñataqmi allicharqa Mesezabeelpa willkan otaq Berequiaspa churin Mesulam.
Paykunapa waqtanpiñataqmi allicharqa Banapa churin Sadoc.
5 Paykunapa waqtanpiñataqmi allicharqaku Tecoa llaqtayoq runakuna,
allin reqsisqa runakunam ichaqa mana yanapayta munarqakuchu kamachikuqkunapa obranpi llamkayta.
6 Ñawpa Zaguantam allicharqaku Paseahpa churin Joiadapiwan Besodiaspa churin Mesulam,
churarqakutaqmi punkunkunatapas,
aldabankunatapas chaynataq cerrojonkunatapas.
7 Paykunapa waqtanpim allicharqa Gabaon llaqtayoq Melatias,
Meronot llaqtayoq Jadon,
Gabaon llaqtayoq runakuna chaynataq Mizpa llaqtayoqkunapas,
paykunam Eufrates Mayupa waklawninpi kaq prefectopa munaychakuyninpi karqaku.
8 Paykunapa waqtanpim allicharqa Harhaiapa churin Uziel,
paymi karqa qorimanta alhaja ruraqkunamanta kaq.
Paypa waqtanpiñataqmi allicharqa Hananias,
paymi karqa perfume ruraqkunamanta.
Paykunam allicharqaku Jerusalen llaqtapa ancho murallankama.
9 Paykunapa waqtanpitaqmi allicharqa Hurpa churin Refaiaspas,
payqa karqa Jerusalen parten llaqtapi alcaldem.
10 Paykunapa waqtanpim allicharqa Harumaf sutiyoq runapa churin Jedaiaspas,
payqa rurarqa wasinpa chimpanpi kasqanraykum.
Paypa waqtanpim allicharqa Hasabniaspa churin Hatus.
11 Harimpa churin Malquiaswan Pahat-moabpa churin Hasubmi allicharqaku huk hawaqta,
allicharqakutaqmi Hornokunawan sutichasqa torretapas.
12 Paykunapa waqtanpim allicharqa Halohespa churin Salum,
paymi karqa Jerusalen parten llaqtapa alcalden,
paywantaqmi llamkarqa warmi churinkunapas.
13 Qechwaman Riq Zaguantam allicharqa Hanunwan Zanoa llaqtapi yachaqkuna,
paykunam mosoqmanta perqarqaku,
churarqakutaqmi punkunkunatapas,
aldabankunatapas chaynataq cerrojonkunatapas.
Murallatapas allicharqakum tawa pachak pichqa chunkan metrota Qopapataman Riq Zaguankama.
14 Qopapataman Riq Zaguantam allicharqa Recabpa churin Malquias,
paymi karqa Bet-haquerem lawpi gobernador,
paymi mosoqmanta perqaspan churarqa punkunkunata,
aldabankunata hinaspa cerrojonkunata.
15 Colhozepa churin Salum sutiyoq runapas allicharqam Pukyuman Riq Zaguanta,
paymi karqa Mizpa lawpi gobernador.
Paymi mosoqmanta perqaspan churarqataq punkunpa chakankunatapas,
punkunkunatapas chaynataq aldabantawan cerrojonkunatapas.
Allicharqataqmi reypa huertanman riq Siloe estanquepa perqantapas Davidpa Llaqtanmanta uraykamuq gradaskama.
16 Paypa waklawninpiñataqmi allicharqa Azbucpa churin Nehemias,
paymi karqa Bet-sur parten distritopa gobernadornin,
paymá allicharqa Davidpa sepulturankunapa ñawpaqninkama,
estanquekama hinaspa soldadokunapa cuartelninkama.
17 Paypa waklawninpiñataqmi allicharqaku Leviy casta Banipa churin Rehum,
paypa waqtanpim allicharqa Hasabias,
paymi karqa Keila parten distritopa gobernadornin,
payqa allicharqa Keila distritopa sutinpim.
18 Paykunapa waklawninpiñataqmi allicharqa ayllun Henadadpa churin Bavai,
paymi karqa Keila parten distritopa gobernadornin.
19 Paypa waqtanpim allicharqa Josueypa churin Ezer,
paymi karqa Mizpa llaqtapa gobernadornin,
paymi allicharqa esquinapi armakuna waqaychana wasiman seqanapa chimpanpi esquinakama.
20 Paypa waklawninpiñataqmi Zabaipa churin Baruc huk hawaqta ganasllawanña allicharqa,
esquinamanta qallaykuspam sacerdotekunapa jefen Eliasibpa wasinpa punkunkama allicharqa.
21 Paypa waklawninpiñataqmi huk hawaqta allicharqa Cospa willkan otaq Uriaspa churin Meremot,
allicharqaqa Eliasibpa punkunmanta qallarispam hina kikin Eliasibpa wasinpa cantonkama.
22 Paypa waklawninpiñataqmi allicharqaku sacerdotekuna,
paykunaqa karqa Jordan Mayupa qechwanpi yachaqkunam.
23 Paykunapa waklawninpiñataqmi allicharqaku Benjaminpiwan Hasub,
chaytam rurarqaku wasinkupa chimpan kasqanrayku.
Paykunapa waklawninpiñataqmi allicharqa Ananiaspa willkan otaq Maasiaspa churin Azarias,
paypas allicharqa wasinpa waqtanpi kaqtam.
24 Paypa waklawninpiñataqmi huk hawaqta allicharqa Henadadpa churin Binui,
Azariaspa wasinmanta qallarispam murallapa esquinanpi tukurqa.
25 Uzaipa churin Palalmi allicharqa esquinapa chimpanpi,
allicharqataqmi reypa alto palacionmanta lloqsiq hatun torretapas,
chay torremá karqa guardiakunapa pationpa hichpanpi.
Paypa waklawninpiñataqmi allicharqa Farospa churin Pedaias.
26 Ofel Moqopi yachaq templopa sirvientenkunañataqmi allicharqaku intipa qespimunan lawpi lloqsina zaguanpa chimpankama hinaspa hawa lawman lloqsiq torrekama.
27 Paykunapa waklawninpiñataqmi huk hawaqta allicharqaku Tecoa llaqtayoq runakuna,
allicharqakuqa hawa lawman lloqsiq hatun torrepa chimpanmanta qallarispam Ofel Moqopa murallankama.
28 Caballokunapa Zaguanninmanta qallaykuspam sacerdotekuna allicharqaku sapakama wasinkupa chimpanta.
29 Paykunapa waklawninpiñataqmi allicharqa Imerpa churin Sadoc,
payqa allicharqa wasinpa chimpantam,
paypa waklawninpiñataqmi allicharqa Secaniaspa churin Semaias,
paymi karqa intipa qespimunan lawpi zaguan punkuwan cuentallikuq.
30 Paypa waklawninpiñataqmi huk hawaqta allicharqaku Selemiaspa churin Hananiaspiwan Salaf sutiyoq runapa soqta kaq churin Hanun,
paykunapa waklawninpiñataqmi allicharqa Berequiaspa churin Mesulam,
payqa allicharqa cuartonpa chimpantam.
31 Paypa waklawninpiñataqmi allicharqa qorimanta alhaja ruraqkunamanta kaq Malquias,
allicharqaqa templopa sirvientenkunapa wasinkamam chaynataq negociantekunapa wasinkamam,
chay wasiqa karqa soldadokunapa huñunakunanku zaguanpa chimpanpim.
Malquiasqa allicharqataqmi esquinapi llaqta cuidaqkunapa puestonkamapas.
32 Esquinapi llaqta cuidaqkunapa puestonmanta qallarispam Oveja sutiyoq zaguankama allicharqaku qorimanta alhaja ruraq negociantekunapiwan.