—¿Imanasqataq llakisqa kachkanki?

Manam onqosqaqa kawaqchu chaynaqa ¿imamantachiki llakikuchkanki?

—nispa.

Chaymi sinchillataña mancharikurqani.

3 Hinaspaymi nirqani reyta:

—Wiñaypaqyá kawsakuy reylláy.

¿Imaynataq manaqa llakikuymanchu abueloykunapa pampakusqan llaqta chunnichisqa chaynataq zaguan punkukunapas kañasqa kachkaptinqa?

—nispa.

4 Reyñataqmi niwarqa:

—¿Imatataq munanki qampaq ruranayta?

—nispa

Chaymi hanaq pachapi munaychakuq Diosta mañakuspay

5 reyta nirqani:

—Reylláy,

munaspaykiqa kay sirvientekitayá favorecewaspayki kachaway Juda lawpi abueloykunapa pampakusqan llaqtaman chaynapi mosoqmanta hatarichimunaypaq —nispa.

6 Reinapas waqtanpi tiyachkaptinmi rey niwarqa:

—¿Hayka unaypaqtaq illanki hinaspaqa haykapitaq kutimunki?

—nispa.

Hinaptinmi rey kachawarqa haykapikamam kamunayta niykuptiy.

7 Reytaqa nirqanitaqmi:

—Reylláy,

munaspaykiqa qoykachiwayá cartakunata Eufrates Mayupa waklawninpi gobiernaqkunapaq chaynapi Judá lawman chayanaykama ama harkakuwanankupaq.

8 Huk cartatañataqyá qoykuway sachaykikuna waqaychaq Asaf sutiyoq runapaq chaynapi pay kullukunata qowananpaq.

Chaykunawanchiki rurachisaq templopa punkunkunata,

llaqtapa murallanta chaynataq yachanay wasitapas —nispa.

Chaynatamá rey qowarqa Tayta Diospa favorecewasqanman hina.

9 Eufrates Mayupa waklawninpi gobiernaqkunaman chayaruspaymá qorqani reypa cartankunata.

Reypa kachasqanmi ñoqawan rirqaku tropakunapa jefenkuna chaynataq caballopi sillasqa soldadokunapas.

10 Aswanqa Horon llaqtayoq Sambalat hinaspa Amon castamanta kamachikuq Tobias yacharuspam sinchillataña piñakururqaku,

piñakururqakuqa Israelpa mirayninkunata yanapananpaq hukkaqnin hamusqanraykum.

11 Chayarqanimá Jerusalen llaqtaman,

chaypi kimsa punchaw karuspaymi

12 tutan hatarirqani wakin qarikunapiwan ichaqa manaraqmi pimanpas willarqanichu Jerusalen llaqtapi ruranaypaq sonqoyman Diospa churasqantaqa.

Ñoqapa sillakusqay animalmanta hukqa manam karqachu.

13 Tuta lloqsispaymi Qechwaman Riq Zaguanninta pasaspay rirqani Dragonwan sutichasqa pukyu lawmanwan Qopapataman Riq Zaguanman.

Jerusalen llaqtapa lliw murallankunatam tuñichisqata qawarqani,

qawarqanitaqmi llaqtapa zaguan punkukuna kañasqa kasqantapas.

14 Chaymantam pasarqani Pukyuman Riq Zaguanman chaynataq reypa rurasqan qochaman,

aswanqa manam karqachu campo sillakusqay uywa pasananpaq.

15 Tutaraqmi wayqonta wichayman rirqani hinaspaymi qawarqani murallata,

muyuspaymi yaykurqani Qechwaman Riq Zaguanninta,

chaymantam kutikurqani.

16 Jefekunam ichaqa mana yacharqakuchu mayman risqaytapas nitaq imam rurasqaytapas,

chaykamam imatapas manaraq nirqaniraqchu judiokunaman otaq sacerdotekunaman,

prefectokunaman chaynataq wakin obra ruraqkunamanpas.

17 Chaymantañam paykunata nirqani:

—Qamkunaqa qawachkankichikmi sasachakuypi kasqanchikta.

Jerusalen llaqtapa murallanpas tuñichisqam kachkan chaynataqmi zaguan punkunkunapas kañasqataq kachkan.

Hatarispayá Jerusalen llaqtapa murallanta hatarichisunchik,

amañayá mastaqa penqaypi kasunchikchu —nispa.

18 Willarqanitaqmi paykunaman imaynatam Diosniy favorecewasqantapas chaynataq reypa niwasqankunatapas hinaptinmi nirqaku:

—Hatarispayá perqasunchik —nispa.

Chaynapimá kallpanchakurqaku ruranankupaq.

19 Aswanqa Horon llaqtayoq Sambalat hinaspa Amon castamanta kamachikuq Tobiasmi Arabia lawmanta Gesem sutiyoq runapiwan yacharuspanku asipayawarqaku hinaspa despreciawarqaku,

paykunam nirqaku:

—¿Imatataq rurachkankichik?

¿Reypa contranpichu hoqarikuchkankichik?

—nispa.

20 Ñoqañataqmi paykunata nirqani:

—Hanaq pachapi munaychakuq Dios yanapawaptinkum kay sirvientenkunaqa perqasaqku.

Qamkunataqa manam imapas qokusunkichikchu Jerusalen llaqtamantaqa —nispa.