NEHEMIASPA QELLQASQAN LIBRO
Jerusalen llaqtapaq Nehemias mañakusqanmanta
1
Kaymi Hacaliaspa churin Nehemiaspa willakusqankuna:
Rey Artajerjes iskay chunka watamanña gobiernachkaptinmi Quisleu sutiyoq killapi ñoqa Nehemias palaciopa kanan Susa llaqtapi kachkarqani.
2 Hinaptinmi aylluykunamanta kaq Hanani sutiyoq runa hamurqa,
paywantaqmi hamurqaku Juda lawmanta wakin runakunapas.
Paykunatam tapurqani mana preso riq puchuq judiokunamanta chaynataq Jerusalen llaqtamantapas.
3 Hinaptinmi niwarqaku:
—Chay lawpi yachaq presochasqakunamanta puchuqkunam ñakarispanku penqaypi kallachkanku.
Jerusalen llaqtapa murallanpas tuñichisqam kachkan,
zaguan punkunkunapas kañasqataqmi kachkan —nispa.
4 Chaykunata uyarispaymi tiyaykuspay waqarqani,
achka punchaw llakikuspaymi ayunaspay mañakurqani hanaq pachapi munaychakuq Diosta.
5 Paytam nirqani:
—Mañakuykim hanaq pachapi munaychakuq Dios Taytalláy.
Qamqariki kanki hatun manchakuypaq Diosmi.
Contratoykita cumplispaykim kuyaqnikikunatawan kamachikuynikikuna kasukuqkunata kuyapayanki.
6 Tuta punchaw qampa qayllaykipi kay sirvientekipa mañakusqaytayá qawarimuspa uyariykullaway.
Israelpa miraynin sirvientekikunaraykum mañakamuyki,
reqsikunitaqmi Israel casta runakunaqa qampa contraykipi huchallikurusqaykuta.
Arí,
ñoqapas abueloypa castanpiwanmi huchallikuruni.
7 Llumpay mana allintam ruraruniku contraykipi,
manataqmi kasukunikuchu serviqniki Moiseswan qowasqaykiku kamachikuynikikunatapas,
decretoykikunatapas chaynataq reglamentoykikunatapas.
8 Yuyariyá serviqniki Moisesman kayna nisqaykita:
“Qamkuna huchallikuptiki- chikqa ñoqam cheqechisqaykichik huklaw nacionkunaman.
9 Ichaqa ñoqaman kutirikamuwaspaykichik kamachikuyniykunata kasukuptikichikqa,
cheqechisqa karu llaqtapi kasqaykichikmantam huñumuspa pusamusqaykichik yachanaypaq akllasqay sitioman” nispa.
10 —Israelpa mirayninkunaqariki sirvientikikunam kaniku chaymi hatun atiynikiwan librawarqankiku.
11 Ruegakuykim Señorlláy,
chaylla kay sirvientikipa mañakuyniyta chaynataq sutiki respetay munaq sirvientikikunapa mañakuynintapas uyariykunaykipaq.
Kay sirvienteki imapas rurasqay allin lloqsinanpaqyá yanapaykuway,
reywanpas favoreceykachiwayá.
Chaynatam nirqani reyman copa serviq kasqayrayku.