—Churiy Salomontam Dios sapallanta akllarqa,

warmallaraq kachkaptinpas tukuy ima rurananqa hatu-hatunllañam kachkan.

Manamiki chay rurayqa kachkan runapaq palacio ruraruyllachu aswanqa yupaychasqanchik Tayta Diospaq templon ruraymi.

2 Tukuy kallpaywanmi imakunatapas alistarqani Diosniypa templon rurachinaypaq.

Qoritam alistarqani qorimanta kaqkunapaq,

qollqetañataq qollqemanta kaqkunapaq,

broncetañataq broncemanta kaqkunapaq,

qerutañataq qerumanta kaqkunapaq.

Alistarqanitaqmi hapichinapaq kaq onice sutiyoq rumitapas,

yana rumitapas,

imaymana colorniyoq rumikunatapas,

tukuy rikchaq suma-sumaq rumikunatapas chaynataq achkallaña marmol sutiyoq rumitapas.

3 Templopaq tukuy ima alistasqaymantapas Diosniypa templonta kuyasqayraykum qoni kikiypa kaq qoritawan qollqeta.

4 Qonimá pachak tonelada qori-purota,

qonitaqmi iskay pachak kimsa chunkan tonelada chuyayachisqa qollqetapas,

chay qollqewanmi templopa perqankunata qarachanqaku.

5 Qoritamá qoni qorimanta kaqkunapaq,

qollqetañataqmi qoni qollqemanta kaqkunapaq,

chaykunataqa tukuy ima ruraypaqmi qoni maestrokuna rurananpaq.

Kunanqa ¿pitaq kikillanmanta ofrendata qoykunman Tayta Diosman?

—nispa.

6 Chay voluntad ofrendatam qorqaku familiakunapa jefenkuna,

Israel ayllukunapa jefenkuna,

waranqa soldadokunapa kamachiqninkuna,

pachak soldadokunapa kamachiqninkuna,

qorqakutaqmi reypa obranpi llamkaqkunapa jefenkunapas.

7 Templopi ruraykunapaqmá qorqaku pachak soqta chunkan pichqayoq tonelada qorita,

yaparqakutaqmi pusaq chunka tawayoq kilo qoritapas.

Qorqakutaqmi kimsa pachak kimsa chunkan tonelada qollqetapas,

yaqa soqta pachak tonelada broncetapas chaynataq kimsa waranqa kimsa pachaknin tonelada fierrotapas.

8 Alhaja rumiyoq kaqkunapas chay rumikunatam Tayta Diospa templonpaq qorqaku Gersonpa miraynin Jehielman.

9 Chay voluntadninkumanta qosqankuwanmi llapa runakuna kusikurqaku,

paykunaqa tukuy sonqonkuwanmi chaykunata Tayta Diosman qorqaku,

Rey Davidpas anchatataqmi kusikurqa.

10 Chayraykum Davidqa llapallan runakunapa qayllanpi Tayta Diosta alabarqa kaynata nispa:

—Abueloyku Israelpa yupaychasqan Tayta Dios,

qamqa wiña-wiñaypaq alabasqam kanki.

11 Dios Taytalláy,

qamqa kanki mayna hatunmi,

mayna munayniyoqmi,

mayna suma-sumaqmi,

mayna wiñaypaqmi chaynataq mayna atiyniyoqmi.

Qampamiki cielopi tukuy ima kaqpas chaynataq kay pachapi kaqpas.

Dios Taytalláy,

hina qamtaqmi tukuy imakunatapas gobiernanki,

qamqariki tukuy imapa hawanpim kachkanki.

12 Qanmantam hamun apuyaypas chaynataq ancha reqsisqa kaypas.

Qamllam tukuy imapiqa munaychakunki.

Qamllataqmi pimanpas qonki kallpatawan atiytaqa,

qamllataqmi runataqa hatunyachiwaq hinaspa atiytapas qowaq.

13 Diosnillayku,

chayraykum qamllamanña graciasta qospa suma-sumaq sutillaykita alabaniku.

14 Ichaqa ¿pimá ñoqaqa kani?

¿Imamá castamasiykunaqa chaynapi tukuy kaykunata qanman ofrecenaykupaqqa?

Cheqaptaqariki tukuy imapas qanmantam hamun,

ñoqaykuqa qochkaykiku qanmanta chaskisqallaykutam.

15 Qampa ñawpaqnikipiqa kachkaniku samapakuq forasterokuna hinallam,

hina chaynallam karqaku llapallan ñawpaq abueloykupas.

Ñoqaykupa vidaykuqa kay pachapi chinkaruq llantuy hinallam.

16 —Dios Taytallayku,

yupaychallasqayku,

tukuy kay alistasqayku qori-qollqeqa llapallanmi qanmanta hamun hinaspapas hina qampam,

chaykunataqa alistarqaniku chuya sutillaykipaq templota ruranaykupaqmi.

17 Diosnilláy,

ñoqaqa yachanim runakunapa sonqonta qampuni qawasqaykita chaynataq munasqaykiman hina kawsaq runakunaqa agradoykipaq kasqanta,

chayraykum allin sonqoywan tukuy kaykunataqa ofrecemuchkayki.

Kunanmi kusikuywan qawaykuni kaypi huñunasqa runaykikunaqa voluntad ofrendanku qomususqaykita.

18 Abueloyku Abrahampa,

Isaacpa hinaspa Israelpa yupaychasqan Tayta Dios,

yanapaykuyá kay runakunapa sonqon hina kaynalla kananpaq,

paykunaqa qanman sonqo runakunayá kachunku.

19 Churiy Salomonmanpas allin sonqotayá qoykuy chaynapi kamachikusqaykikunata,

Chunkantin Kamachikuynikikunata hinaspa decretoykikunata cumplispa alistasqay kaqkunawan templota rurananpaq —nispa.

20 Davidqa huñunasqa llapallan runakunatapas kaynatam nirqa:

—Kunanqa yupaychasqanchik Tayta Diostayá alabaychik —nispa.

Hinaptinmi chaypi huñunasqa llapallan runakuna abuelonkupa yupaychasqanku Tayta Diosta alabarqaku,

qonqoranpam pampaman kumuykurqaku Tayta Diospa qayllanpipas chaynataq reypa qayllanpipas.

21 Paqarinnintin punchawñataqmi Tayta Diospaq wañuchipurqaku animalkunata,

ofrecerqakutaqmi lliw kañana ofrendakunatapas.

Chay ofrecesqankum karqa waranqa malta torokuna,

waranqa carnerokuna,

waranqa malta carnerokuna,

chaykunataqa ofrecerqaku vino ofrendayoqtakamam,

Israel casta llapallan runakunapaqpas ofrecerqakum wakin achka-achka ofrendakunatapas.

22 Chay punchawpim ancha kusikuyllawanña Tayta Diospa ñawpaqninpi mikuspa tomarqaku hinaspam iskay kaq kutipiña reypaq churarqaku Davidpa churin Salomonta.

Paytaqa munaychakuq kananpaqmi aceitewan tallirqaku Tayta Diospa qayllanpi.

Sadoctañataqmi aceitewan tallirqaku sacerdote kananpaq.

23 Chaynapimá Salomonqa Tayta Diospa qayllanpi gobiernayta qallaykurqa,

payqa taytan Davidpa rantinpi gobiernaspanmi anchallaña bendecisqa karqa.

Paytamá Israel casta llapallan runakuna kasukurqa.

24 Llapallan jefekunapas chaynataq valeroso soldadokunapas Rey Davidpa llapallan mirayninkunapiwanmi Rey Salomonta kasukunankupaqña churakurqaku.

25 Tayta Diosmi Rey Salomonta llumpa-llumpayta hatuncharqa Israel casta runakunapa qayllanpi,

payqa gobiernasqanpim ancha-ancha reqsisqa rikurirurqa,

paypa ñawpaqnintaqa chayna ancha reqsisqa reyqa manam karqachu Israel nacionpiqa.

26 Isaipa churin Davidmá gobiernarqa enteron Israel nacionpi.

27 Payqa Israel nacionpim gobiernarqa tawa chunka wata.

Qanchis watam gobiernarqa Hebron llaqtapi,

kimsa chunka kimsayoq watañataqmi gobiernarqa Jerusalen llaqtapi.

28 Payqa wañukurqa yuyaq kayninpi achkallaña watayoqmi,

payqa wañukurqa apu-apullañam chaynataq anchallaña reqsisqam.

Paypa rantinpim gobiernarqa churin Salomon.

29 Rey Davidpa rurasqankunaqa qallariyninmanta tukuyninkamam qellqasqa kachkan Diosmanta willakuq Samuelwan sutichasqa libropi,

qellqasqataqmi kachan Diosmanta willakuq Natanpa qellqasqan libropipas chaynataq Diosmanta willakuq Gadpa qellqasqan libropipas.

30 Qellqasqamá kachkan gobiernonpi tukuy ima pasasqanmantapas atiyninmantapas,

tukuy ima payta pasasqanmantapas chaynataq Israel naciontawan wakin nacionta imam pasasqanmantapas.