2 —Ñoqaqa wañukusaqñam chaynaqa kallpanchakuspayá qarinchakuy.

3 Moisespa qellqasqan yachachikuykunaman hina kawsaspayá kasukuy yupaychasqanchik Tayta Diospa decretonkunata,

kamachikuyninkunata,

reglamentokunata hinaspa Chunkantin Kamachikuyninkunatapas,

chaynata kawsaspaqa llapa ima rurasqaykipipas chaynataq mayman risqaykipipas allinpunim kanki.

4 Tayta Diosmi prometewasqanta cumplinqa,

paymi niwarqa kaynata:

“Qampa miraynikikuna ñoqamanta mana rakikuspa nisqaykunata tukuy sonqonwan hinaspa tukuy vidanwan kasukuspa kawsaptinkuqa mana tukuytam qampa miraynikikunamanta Israel nacionpi gobiernaq qari kanqa” nispa.

5 Qamqa ñam yachankiña paniy Sarviapa wawan Joab imam rurawasqantaqa,

payqariki Israel nacionpim llapallan tropakuna kamachiq iskay runakunata wañurachirqa,

payqa wañurachirqa Nerpa churin Abnertawan Jeterpa churin Amasatam.

Paykunataqa wañurachirqa manam guerra tiempopichu,

chay runakunapa yawarninwanmi yawarcharurqa weqawniy watakunaytapas chaynataq sandaliaytapas.

6 Chaynaqa yuyaywanyá ruray,

paytaqa wañuchinkimá.

7 Galaad lawmanta Barzilaipa mirayninkunatam ichaqa kuyapayarinki,

palacioykipim qanwan kuska paykunaqa mikunqa,

paykunaqariki yanapaykuwarqakum wawqeki Absalonmanta lluptichkaptiy.

8 Qanwantaqmi kachkan Bahurim lawpi yachaq Benjaminpa miraynin Gerapa churin Simeipas,

paymi Mahanaim llaqtaman richkaptiy hatun ñakaywan ñakawarqa,

kutimuptiymi ichaqa kikillan Jordan Mayuman taripaykamuwaspa chaskiykuwarqa chaymi Tayta Diosrayku jurarqani:

“Manam wañuchisqaykichu” nispay.

9 Ichaqa castigankipunim,

qamqa yuyayniyoq runam kanki,

tanteasqaykiman hinayá ruray,

paytaqa wañuchinkimá —nispa.

10 David wañukuptinmi pamparurqaku “Davidpa Llaqtan” sutiyoq barriopi.

11 Davidmi Israel nacionpi gobiernarqa tawa chunka wata.

Qanchis watam gobiernarqa Hebron llaqtapi,

kimsa chunka kimsayoq watañataqmi gobiernarqa Jerusalen llaqtapi.

12 Taytan David wañuruptinmi Salomonña gobiernarqa,

paypa gobiernonqa allintam takyarqa.

13 Salomonpa maman Betsabeymanmi hamurqa Haguitpa wawan Adonias chaymi Betsabey nirqa:

—¿Allin sonqowanchu hamuwachkanki?

—nispa.

Chaymi Adoniasñataq nirqa:

14 Qanman ninaymi kachkan —nispa.

Hinaptinmi Betsabey nirqa:

—Niwayá —nispa.

15 Chaymi pay nirqa:

—Yachankim gobiernoqa ñoqapa kasqanta,

yachankitaqmi Israel casta llapallan runakunapas gobiernanay munasqankutaqa ichaqa chay gobiernoqa pasarun wawqeymanñam chaynata Tayta Dios kamachisqanrayku.

16 Mañakunaymi kachkan,

chaytaqa amamá negaruwankichu —nispa.

—Chaymi Betsabey nirqa:

—Niwayá —nispa.

17 Adoniasmi nirqa:

—Ama hina kaspaykiyá Rey Salomonta rimapayaykapuway Sunem llaqtayoq Abisag sutiyoq sipaswan casarachiwananpaq,

qamtaqa manam negasunkichu —nispa.

18 Chaymi Betsabey nirqa:

—Allinmi,

reytaqa ñoqam rimapayaykapusqayki —nispa.

19 Chaynapimá Betsabeyqa rirqa Rey Salomonta Adoniaspa favorninpi rimapayamunanpaq.

Rey Salomonmi sayarispa chaskirqa hinaspam mamanpa qayllanpi qonqorakuykurqa.

Tiyananpi kasqallan tiyaykuspanmi aparachimurqa mamanpa tiyananta,

reypa alleqninpi maman tiyaykuspanmi

20 payta nirqa:

—Taksachalla mañakuytam mañakusqayki,

amamá negawankichu —nispa.

Chaymi reyñataq mamanta nirqa:

—Mañakuway mamáy,

ñoqaqa manam negasqaykichu —nispa.

21 Chaymi mamanñataq nirqa:

—Sunem llaqtayoq Abisag sutiyoq sipaswanyá wawqeki Adoniasta casarachiy —nispa.

22 Hinaptinmi Rey Salomonñataq mamanta nirqa:

—¿Imanasqataq mañawanki Sunem llaqtayoq Abisag sutiyoq sipaswan Adoniasta casarachinaypaq?

Chaywanqa mañakuwachkanki mayorniy kasqanrayku gobiernoyta payman qonaypaqmi,

paypaq mañakuspaqa-mañakuytaqyá sacerdote Abiatarpaqpas chaynataq Sarviapa wawan Joabpaqpas —nispa.

23 Chaynata niruspam Rey Salomonqa jurarqa Tayta Diosrayku kaynata:

—Tayta Diosyá llumpayta castigawachun chay mañakusqanmanta Adoniasta mana wañuchiptiyqa.

24 Tayta Diosmi taytay Davidpa rantinpi gobiernachiwachkan,

promesanman hinam chay gobiernotaqa ñoqamanwan mirayniymanña qoykuwanku,

kunanpunim Adoniasqa wañunqa —nispa.

25 Joiadapa churin Benaiata Rey Salomon kachaptinmi Adoniasta wañurachimurqa.

26 Chaymantam sacerdote Abiatarta Rey Salomon nirqa:

—Anatot llaqta lawpi chakraykiman ripukuy,

qampas wañunaykim yachachun ichaqa Señor Diospa baulninta taytay Davidpa qayllanpi apasqaykiraykum chaynataq taytay Davidpa tukuy ima ñakarisqanpi ñakarisqaykiraykum manaraq wañuchisqaykichu —nispa.

27 Chaynatamá Abiatartaqa Tayta Diospa sacerdoten kasqanmanta Rey Salomon qarqorurqa.

Chaynapimá cumplikurqa Eliypa mirayninpa contranpi Silo llaqtapi Tayta Diospa rimasqan.

28 Absalonmanqa mana hukllawakuchkaspapas Joabqa Adoniaspa partidonmi karqa chayraykum chay noticiata uyariruspan Tayta Diospa karpanman lluptikururqa chaypim altarpa waqrachankunaman hapikururqa.

29 Rey Salomonmanmi willaykurqaku Tayta Diospa karpanman Joab lluptiruspa altarpa waqtanpi kasqanta.

Joiadapa churin Benaiata Salomon kachaspanmi nirqa:

—Rispaykiyá Joabta wañurachimuy —nispa.

30 Tayta Diospa karpanman Benaia yaykuruspanmi nirqa:

—Reymi kamachikun lloqsinaykipaq —nispa.

Hinaptinmi Joab nirqa:

—Manam lloqsiymanchu,

ñoqaqa kaypim wañusaq —nispa.

Chaymi Benaiañataq kutirqa Joabpa nisqanta reyman willananpaq.

31 Chaymi reyñataq nirqa:

—Chaynaqa nisusqaykiman hinayá wañuchispa pamparamuy chaynapim ñoqamantawan taytaypa mirayninkunamanta qechunki yanqapunimanta Joabpa wañuchisqan culpata.

32 Tayta Diosmi castiganqa chay runakuna wañuchisqanmanta,

taytay Davidpa mana yachasqantam Joab wañuchirqa paymanta aswan allin kaq qarikunata.

Wañuchirqamá Nerpa churin Abnerta,

payqa karqa Israel llapallan tropakunapa kamachiqninmi,

wañuchirqataqmi Jeterpa churin Amasatapas,

payqa karqa Juda casta llapallan tropakunapa kamachiqninmi.

33 Chay rurasqanmantam Joabwan mirayninkuna castigasqa kanqa,

Davidmanmi ichaqa mirayninkunamanwan,

familiankunamanwan chaynataq gobiernonmanwan Tayta Dios qonqa wiñaypaq hawka kawsakuyta.

34 Chaymi Joiadapa churin Benaia rispa Joabta wañurachimurqa hinaspam pamparamurqa kikin Joabpa wasinpi,

chay wasinqa karqa chunniqpim.

35 Chaymi Joiadapa churin Benaiata Joabpa rantinpi rey churarqa llapallan tropapa kamachiqnin kananpaq,

Sadoctañataqmi churarqa Abiatarpa rantinpi sacerdote kananpaq.

36 Simeitapas rey qayachimuspanmi nirqa:

—Jerusalen llaqtapi wasita ruraspa chaypi yachakuy ichaqa amam maymanpas lloqsinkichu.

37 Sichu lloqsiruspa Cedron Wayqota chimparuspaqa wañunkipunim,

kikikim huchayoqqa kanki —nispa.

38 Chaymi Simeiñataq reyta nirqa:

—Allinmi,

qam reyniypa nisqaykiman hinam rurasaq —nispa.

Simeimi Jerusalen llaqtapi unay tiempo yacharqa.

39 Ichaqa kimsa wata pasaruptinmi Simeipa iskay sirvientenkuna lluptirurqaku Maaca sutiyoq runapa churin Aquispaman.

Aquisqa karqa Gat llaqtapa reyninmi.

Willaykurqakum Simeiman kaynata:

—Sirvientekikunaqa Gat llaqtapim kachkanku —nispa.

40 Chaymi Simeiqa asnonta montoraykuspan Gat llaqtapi Aquispa wasinman rirqa sirvientenkunata maskamunanpaq.

Riruspanmá Simeiqa sirvientenkunata kutichimurqa Gat llaqtamanta.

41 Salomonmanmi willaykurqaku Simeiqa Jerusalen llaqtamanta riruspa Gat llaqtamanta kutiramusqanta.

42 Chaymi Simeita qayachimuspan rey nirqa:

—¿Manachum Tayta Diosrayku jurachispay avisarqayki:

“Kaymanta lloqsispaykiqa wañunkipunim” nispay?

¿Manachum niwarqanki:

“Allinmi niwasqaykiqa” nispa?

43 ¿Imanasqamá Tayta Diosrayku jurasqaykitaqa mana respetarqankichu chaynataq kamachisqaytapas mana kasukurqankichu?

44 Sonqoykipiqa yachachkankim taytay Davidpa contranpi mana allinkuna rurasqaykita,

chaynaqa Tayta Diosmi mana allin rurasqaykimanta castigasunki.

45 Ñoqa Rey Salomonmi ichaqa Diospa bendecisqan kasaq hinaptinmi Davidpa gobiernon wiñaypaq takyachisqa kanqa Tayta Diospa qayllanpi —nispa.

46 Reymi Joiadapa churin Benaiata kamachirqa Simeita wañuchimunanpaq chaymi rispan Simeita wañurachimurqa chaynapim Salomonpa gobiernon allinta takyarqa.