2 Rey Davidmi sayariykuspan nirqa:

—Castamasillaykuna,

runallaykuna,

uyariykuwaychikyá.

Ñoqam munarqani templo rurayta chaynapi Tayta Diospa contrato baulnin chaypi kananpaq hinaspa chaypitaq Diosninchikpa chakinpas samaykunanpaq.

Chayta rurachinaypaqmi tukuy imakunatapas alistarqaniña.

Ichaqa Diosmi niwarqa:

3 “Manam qamchu temploytaqa rurachipuwanki,

qamqariki guerrapi peleaq kaspaykim achkallaña runakunata wañuchirqanki” nispa.

4 Chaywanpas Israelpa yupaychasqan Tayta Diosmi akllaykuwarqa llapallan familiaymanta chaynapi wiñaypaqña Israel casta runakunapa reynin kanaypaq.

Paymá Juda ayllu runakunata akllaykurqa gobiernanankupaq,

chay Juda ayllumantañataqmi akllaykurqa ñoqapa familiayta chaynapim wawqeykunamantañataq ñoqata akllaykuwarqa enteron nacionpi rey kanaypaq.

5 Tayta Diosmi qoykuwarqa achkallaña churikunata,

kunanmi llapallan churiykunamanta Tayta Dios akllaykun churiy Salomonta chaynapi Tayta Diospa munaychakusqan Israel nacionpi rey kananpaq.

6 Tayta Diosmi niwarqa:

“Churiki Salomonmi rurachipuwanqa temploytawan patioykunataqa,

paytaqa churiypaqñam akllaykuni,

ñoqañataqmi paypaq kasaq taytan hina.

7 Paypa gobiernontam takyachisaq wiñaypaq,

chaynataqa rurasaq kamachikuyniykunatawan reglamentoykunata kunankama cumplisqanta hina kallpanchakuspan cumpliptinmi” nispa.

8 —Israel casta runakunaqa Tayta Diospa runankunam kankichik,

chaynaqa kunanyá lliw Israel casta runakunapa qayllanpi Diosninchik uyarichkaptin tukuy sonqoykichikwan kasukuychik yupaychasqanchik Tayta Diospa kamachikuyninkunata,

chayna kaptinqa kay sumaqllaña allpanchikmi hina kikillaykichikpaq kanqa hinaptinmi wiñaypaqña herenciata hina churikichikkunamanpas saqenkichik —nispa.

9 Churin Salomontañataqmi David nirqa:

—Churilláy Salomon,

kay taytaykipa Diosniyta reqsikuspaykiyá serviy tukuy sonqoykiwan hinaspa ganasllawanña.

Tayta Diosqariki qawachkanmi llapa runakunapa concienciantaqa,

reqsintaqmi runapa imam munasqantapas chaynataq tanteasqantapas.

Chaynaqa payta maskaptikiqa tariykachikunqam,

payta saqeruptikim ichaqa paypas wiñaypaqña qanmanta karunchakurunqa.

10 Amayá qonqaruychu Tayta Diospa akllasusqaykitaqa,

payqariki akllasurqanki santuarionpaq templonta ruranaykipaqmi.

Chaynaqa kallpanchakuspaykiyá ruraypuni —nispa.

11 Chaymantam Davidqa churin Salomonman qoykurqa templopa corredorninpa planonkunata,

kikin templopa planonkunata,

almacen cuartokunapa planonkunata,

altosninpi cuartokunapa planonkunata,

uku lawpi kaq cuartokunapa planonkunata hinaspa hucha pampachana cuartopa planonkunata.

12 Qorqataqmi templopa pationkunapi tukuy ima rurananpaq tanteasqan planokunatapas chaynataq patiokunapa muyuriqninpi ruranan kaq cuartokunapa planonkunatapas.

Qorqataqmi Diospa qori-qollqen waqaychana cuartokunapa planonkunatapas chaynataq paypaq sapaqchasqa ofrendakuna waqaychananku cuartokunapa planonkunatapas.

13 Yachachirqataqmi sacerdotekunawan Leviy casta runakuna muyuyninpi Tayta Diospa templonpi imaynam ruranankutapas chaynataq templopi kaq tukuy ima serviciokunawan imaynam ruranankutapas.

14 Qorimanta hinaspa qollqemanta sapa serviciokunapaqpas yachachirqam haykam qoriwan qollqe yaykunanmanta.

15 Candelerokunapaqwan mecheronkunapaqpas yachachirqam haykam yaykunanmanta,

chaykunaqa sapakamam kanan karqa qorimanta hinaspa qollqemanta.

16 Hina chaynallatam yachachirqa qorimanta hinaspa qollqemanta sapakama mesapaqpas.

Chay qorimanta mesapim patanasqata churaqku Diospa tantanta.

17 Qori-puromanta kananpaqmi yachachirqataq trinchekunapaqpas,

medianokunapaqpas,

aysakukunapaqpas hinaspa qorimanta tazonkunapaqpas.

Payqa yachachirqa chay serviciokunapaq haykam yaykunanman hinam.

18 Incienso kañananku altartapas qori-puromanta rurachinanpaqmi yachachirqa haykam yaykunanta.

Yachachirqataqmi carretata imaynam rurachinanpaqpas.

Chay carretaqa karqa Tayta Diospa contrato baulninpa querubin sutiyoq angelkunapa rapranwan llantuykusqanmi.

19 Tukuy chay yachachikuykunam qellqasqa karqa Davidman Tayta Diospa qawachisqanman hina,

chaynapi tukuy imatapas chay yachachikuyman hina rurananpaq.

20 Davidmá Salomonta nirqa:

—¡Qarinchakuspa hinaspa kallpanchakuspayá ruraypuni,

amayá hukmanyaruychu nitaq manchakuychu,

qamtaqariki yanapasuchkanki yupaychasqay Tayta Diosmi!

Paypa templonpi serviciokunata lliw tukuchinaykikamam payqa mana saqerusunkichu nitaq karunchakunqachu.

21 Kayqayá kaypi kachkan sacerdotekunapas chaynataq Leviy casta runakunapas muyuyninpi Diospa templonpi servikunankupaq.

Tukuy ima ruraypi llamkaypaqpas kanqam kikinkumanta ofrecekuq runakuna,

paykunaqa tukuy imata ruranankupaq yachayniyoqmi kanku.

Jefekunapas chaynataq llapallan runakunapas qampa kamachisqaykitam kasukunqaku —nispa.