Davidpa tropankunapa jefenkunamanta
27
Watapi sapa killa muyuyninpi reypa servicionpi kaqkunam karqaku ayllukunapa jefenkuna,
waranqa soldado kamachiqkuna hinaspa pachak soldado kamachiqkuna hinaspa wakin capitankuna.
Runakunamá rakisqa karqaku chunka tawayoq waranqa soldadonka.
2 Qallariy killapi reyta servinanpaq punta kaq rakisqa tropapa kamachiqninmi karqa Zabdielpa churin Jasobeam,
paypa kamachisqan tropakunaqa karqa iskay chunka tawayoq waranqa soldadokunam.
3 Farezpa miraynin Jasobeanmi kamachirqa chay punta kaq killapi serviq tropakunapa llapallan jefenkunataqa.
4 Iskay kaq killapi reyta servinanpaq rakisqa tropapa kamachiqninmi karqa Ahohi casta Dodai,
chay tropakunapa kamachiqninmi karqa Miclot,
paypas kamachirqa iskay chunka tawayoq waranqa soldadokunatam.
5 Kimsa kaq killapi reyta servinanpaq rakisqa tropapa kamachiqninmi karqa sacerdotekunapa jefen Joiadapa churin Benaia,
paypas kamachirqa iskay chunka tawayoq waranqa soldadokunatam.
6 Kay Benaiam karqa kimsa chunka valeroso soldadokunapa huknin.
Ichaqa chay tropakunataqa kamachirqa Benaiapa churin Amisabadmi.
7 Tawa kaq killapi reyta servinanpaq tropapa kamachiqninmi karqa Joabpa wawqen Asael,
Asael wañuruptinqa churin Zebadiasñam kamachirqa,
paypas kamachirqa iskay chunka tawayoq waranqa soldadokunatam.
8 Pichqa kaq killapi reyta servinanpaq tropapa kamachiqninmi karqa Izra casta Samhut,
paypas kamachirqa iskay chunka tawayoq waranqa soldadokunatam.
9 Soqta kaq killapi reyta servinanpaq tropapa kamachiqninmi karqa Iquespa churin Ira,
payqa karqa Tecoa llaqtamantam,
paypas kamachirqa iskay chunka tawayoq waranqa soldadokunatam.
10 Qanchis kaq killapi reyta servinanpaq tropapa kamachiqninmi karqa Pelon casta Heles,
payqa karqa Efrainpa mirayninmi,
paypas kamachirqa iskay chunka tawayoq waranqa soldadokunatam.
11 Pusaq kaq killapi reyta servinanpaq tropapa kamachiqninmi karqa Husapa castan Sibecai,
payqa karqa Zera castam,
paypas kamachirqa iskay chunka tawayoq waranqa soldadokunatam.
12 Isqon kaq killapi reyta servinanpaq tropapa kamachiqninmi karqa Anatot llaqtayoq Abiezer,
payqa karqa Benjamin ayllumantam,
paypas kamachirqa iskay chunka tawayoq waranqa soldadokunatam.
13 Chunka kaq killapi reyta servinanpaq tropapa kamachiqninmi karqa Netofa llaqtayoq Maharai,
payqa karqa Zera castam,
paypas kamachirqa iskay chunka tawayoq waranqa soldadokunatam.
14 Chunka hukniyoq kaq killapi reyta servinanpaq tropapa kamachiqninmi karqa Efrainpa miraynin Piraton llaqtayoq Benaia,
paypas kamachirqa iskay chunka tawayoq waranqa soldadokunatam.
15 Chunka iskayniyoq kaq killapi reyta servinanpaq tropapa kamachiqninmi karqa Otonielpa miraynin Netofa llaqtayoq Heldai,
paypas kamachirqa iskay chunka tawayoq waranqa soldadokunatam.
16 Israel ayllu runakunapa autoridadninkunaqa kaykunam:
Ruben ayllu runakunapa autoridadninmi karqa Zicripa churin Eliezer.
Simeon ayllu runakunapa autoridadninmi karqa Maacapa churin Sefatias.
17 Leviy ayllu runakunapa autoridadninmi karqa Kemuelpa churin Hasabias.
Aaron casta runakunapa autoridadninmi karqa Sadoc.
18 Juda ayllu runakunapa autoridadninmi karqa Davidpa huknin wawqen Eliu.
Isacar ayllu runakunapa autoridadninmi karqa Micaelpa churin Omri.
19 Zabulon ayllu runakunapa autoridadninmi karqa Abdiaspa churin Ismaias.
Neftaliy ayllu runakunapa autoridadninmi karqa Azrielpa churin Jerimot.
20 Efrain ayllu runakunapa autoridadninmi karqa Azaziaspa churin Oseas.
Parten Manases ayllu runakunapa autoridadninmi karqa Pediaspa churin Joel.
21 Galaad lawpi kaq parten Manases ayllu runakunapa autoridadninmi karqa Zacariaspa churin Iddo.
Benjamin ayllu runakunapa autoridadninmi karqa Abnerpa churin Jaasiel.
22 Dan ayllu runakunapa autoridadninmi karqa Jerohampa churin Azareel.
Paykunamá karqa Israel ayllu runakunapa autoridadninkuna.
23 Tayta Diosmi prometerqa Israel casta runakunataqa cielopi lucerokunata hinaña mirachinanpaq,
chayraykum Davidqa mana yupachirqachu iskay chunka watanman manaraq chayaq runakunataqa.
24 Sarviapa wawan Joabmi runakuna yupayta qallaykurqa,
payqa manam tukurqachu chay yupasqanmanta Israel casta runakuna castigasqa kasqankurayku.
Chayraykum Rey Davidpa vidanmanta willakuq libropiqa chay haykam yupasqanqa mana qellqasqachu karqa.
25 Reypa tukuy imanwan cuentallikuqmi karqa Adielpa churin Azmavet.
Uziaspa churin Jonatanñataqmi cuentallikurqa chakrakunapi,
llaqtakunapi,
llaqtachakunapi hinaspa torrekunapi kaqninkunamanta.
26 Quelubpa churin Izriñataqmi cuentallikurqa chakrapi llamkaqkunamanta.
27 Rama llaqtayoq Simei sutiyoq runañataqmi cuentallikurqa uvas huertakunamanta.
Sefam llaqtayoq Zabdi sutiyoq runañataqmi cuentallikurqa almacenpaq vino huñuymanta.
28 Gedera llaqtayoq Baal-hanan sutiyoq runañataqmi cuentallikurqa waqtakunapi aceitunas sachakunamanta hinaspa purun higos sachakunamanta.
Joas sutiyoq runañataqmi cuentallikurqa almacenpi aceitemanta.
29 Saron law Sitrai sutiyoq runañataqmi cuentallikurqa Saron lawpi michina vacakunamanta.
Adlaipa churin Safat sutiyoq runañataqmi cuentallikurqa qechwa lawpi michina vacakunamanta.
30 Ismael casta Obil sutiyoq runañataqmi cuentallikurqa camellokunamanta.
Meronot llaqtayoq Jehodias sutiyoq runañataqmi cuentallikurqa asnokunamanta.
31 Hagar casta Jaziz sutiyoq runañataqmi cuentallikurqa ovejakunamanta.
Paykunamá llapallanku karqa Rey Davidpa kapuqninkunawan cuentallikuqkuna.
32 Davidpa tion Jonatanmi karqa consejo qokuq runa,
payqa karqa allin entiendeq hinaspa allin secretariom.
Hacmonipa churin Jehiel sutiyoq runañataqmi karqa reypa churinkunata yanapaq.
33 Ahitofel sutiyoq runapas karqa reypa consejaqninmi.
Arqui casta Husai sutiyoq runapas karqa reypa confianza runanmi.
34 Ahitofel sutiyoq runapa rantinpiñataqmi karqa Benaiapa churin Joiada hinaspa Abiatar.
Reypa llapallan tropankunapa kamachiqninñataqmi karqa Joab.