Rubenpa mirayninmanta
5
Rubenmi karqa Israelpa piwi churin ichaqa taytanpa compañeranwan puñurusqanraykum piwi churi kayninpa derechon qosqa karqa wawqen Joseypa mirayninmanña.
Rubenqa manam piwi churi hinañachu cuentasqa karqa.
2 Judam ichaqa llapallan wawqenkunamanta aswan atiyniyoq rikuriruspan paykunapa kamachiqnin karqa.
Chaywanpas Joseymanmi piwi churi kay derechoqa tocarqa.
3 Israelpa piwi churin Rubenpa churinkunamá karqa Hanoc,
Falu,
Hezron hinaspa Carmi.
4 Rubenpa miraynintaqmi karqa Joelpas,
Joelpa churinmi karqa Semaias.
Semaiaspa churinmi karqa Gog,
Gogpa churinñataq Simei.
5 Simeipa churinmi karqa Micaia,
Micaiapa churinmi karqa Reaia,
Reaiapa churinmi karqa Baal,
6 Baalpa churinñataq Beera.
Beeram karqa Ruben castakunapa jefen.
Paytam presota pusachirqa Asiria nacionpa reynin Tiglat-pileser.
7 Beerapa castankunam ayllunkuman hina listasqa karqaku.
Kamachikuqmi karqa Jeiel.
Listasqataqmi karqa Zacariaspas
8 hinaspa Azazpa churin Belapas.
Azazmi karqa Semapa churin.
Semaqa karqa Joelpa mirayninmi.
Paykunam munaychakurqaku Aroer llaqtamanta Nebo Orqo lawkama hinaspa Baal-meon llaqtakama.
9 Munaychakurqakutaqmi intipa qespimunan lawpipas Eufrates Mayumanta qallarispa chunniq lawpi tukunankama,
chaynaqa karqa Galaad lawpi animalninku llumpayta mirarusqanraykum.
10 Saulpa gobiernasqan tiempopim Ruben castakuna pelearqaku Agar casta runakunawan.
Ruben castakunam paykunata venceruspanku munaychakurqaku intipa qespimunan lliw Galaad lawpi.
Gadpa mirayninmanta
11 Gadpa mirayninqa yacharqa Rubenpa mirayninpa chimpan Basan lawpi Salca llaqtakamam.
12 Basan lawpi yachaqkuna kamachiqmi karqa Joel,
payman qatiq kamachiqñataqmi karqa Safan,
Jaanai hinaspa Safat.
13 Paykunapa ayllunkunam abuelonkunapa castankunaman hina karqaku Micael,
Mesulam,
Seba,
Jorai,
Jacan,
Zia hinaspa Heber.
Llapallankum karqaku qanchis.
14 Kaykunam Abihailpa churinkuna.
Abihailmi karqa Huripa churin,
Hurim karqa Jaroapa churin,
Jaroam karqa Galaadpa churin,
Galaadmi karqa Micaelpa churin,
Micaelmi karqa Jesisaipa churin,
Jesisaimi karqa Jahdopa churin,
Jahdoñataq Buzpa churin.
15 Ahi sutiyoq runam karqa Abdielpa churin otaq Gunipa willkan.
Chay Ahi sutiyoq runam karqa abuelon castakunapa jefen.
16 Gad castankunam yacharqaku Galaad lawpi,
Basan lawpi hinaspa llaqtachankunapi.
Yacharqakutaqmi Saronpa lliw echaderonkunapipas.
17 Juda nacionpi Rey Jotam gobiernachkaptinmi chaynataq Israel nacionpi Rey Jeroboam gobiernachkaptinmi Gad casta llapallan runakuna castankuman hina listasqa karqaku.
Intipa qespimunan lawpi yachaqkuna enemigonkuta vencerusqankumanta
18 Rubenpa mirayninkunam Gadpa mirayninkunapiwan hinaspa Manasespa parten mirayninkunapiwan karqaku tawa chunka tawayoq waranqa qanchis pachak soqta chunkan valeroso soldadokuna.
Paykunaqa harkachikunawan hinaspa espadawan armasqam karqaku.
Paykunaqa flechana arcokuna allin manejaqkunam karqaku.
Guerrapaq alli-allin yachachisqa kaspankum tropa-tropa lloqsiqku.
19 Paykunam pelearqaku Agar casta runakunawan,
Jetur casta runakunawan,
Nafis casta runakunawan hinaspa Nodab casta runakunawan.
20 Paykunata Dios yanapaptinmi Agar castakunatawan yanapaqninkunata vencerurqaku.
Paykunam peleachkaspanku Diosta mañakurqaku chaymi Dios yanaparqa paypi confiakusqankurayku.
21 Enemigonkupa animalninkunata qechuruspankum apakurqaku pichqa chunka waranqa camellokunata,
iskay pachak pichqa chunkan waranqa ovejakunata chaynataq iskay waranqa asnokunatapas.
Presocharurqakutaqmi pachak waranqa runakunatapas.
22 Nana-nanaqmi enemigonku wañururqa Diospa munasqan chay guerra kasqanrayku.
Chaynapimá paykunapa kasqankupi yacharqaku preso pusasqa kasqanku tiempokama.
23 Manasesmanta parten ayllukunam anchata mirarurqaku hinaspam yacharqaku Basan lawmanta qallarispa Baal-hermon llaqtakama,
chay llaqtam karqa Senir Orqopa sikinpi,
chay Senir Orqopa huknin sutinmi karqa Hermon.
24 Paykunapa castanpi jefekunam karqa Efer,
Isi,
Eliel,
Azriel,
Jeremias,
Hodavias hinaspa Jahdiel,
paykunamá castanpi alli-allin valeroso jefekuna karqaku.
25 Ichaqa abuelonkupa yupaychasqan Diostam traicionarurqaku,
chay allpapi runakunapa taytachankuta adoraspankum huchapakuq warmi hina huchallikururqaku,
chaynatam rurarqaku paykunapa qayllanmanta Dios chay runakunata chinkarachichkaptinpas.
26 Chaymi paykunapa contranpi Israelpa Diosnin sonqocharqa Asiria nacionpa reynin Pulta.
Pulpa huknin sutinqa karqa Tiglat-pilesermi.
Pulmi Ruben aylluta,
Gad aylluta hinaspa Manases parten aylluta presota pusachirqa Halah lawman,
Habor lawman,
Hara lawman hinaspa Gozan Mayu lawman,
chaypim karqaku kay libro qellqasqa kasqan tiempokama.