Israel nacionpi Rey Joram gobiernasqanmanta
3
Acabpa churin Rey Joranmi Israel nacion gobiernayta qallaykurqa Samaria llaqtapi yachaspan,
payqa gobiernarqa Juda nacionpa reynin Josafat chunka pusaqniyoq watamanña gobiernachkaptinmi.
Joranqa gobiernarqa chunka iskayniyoq watam.
2 Tayta Diospa qayllanpim mana allinkunata rurarqa.
Ichaqa manam taytanpa nitaq mamanpa rurasqanta hinachu.
Payqa wischururqam taytanpa rurasqan Baal sutiyoq taytachapa pilarninta.
3 Chaywanpas Israel nacionniyoq runakunata huchallichiq Rey Jeroboam hinam huchallikurqa.
Jeroboamqa karqa Nabatpa churinmi.
Eliseom willakun Moab nacion vencesqa kananmanta
4 Moab nacionpi Mesa sutiyoq reymi achka oveja uywaq kaspan Israel nacionpi reyman impuestota pagaq pachak waranqa malta carnerokunatawan pachak waranqa millwantin carnerokunata.
5 Ichaqa Rey Acab wañuruptinmi Moab nacionpa reynin hoqarikururqa Israel nacion reypa contranpi.
6 Rey Joramñataqmi chay punchaw Samaria llaqtamanta pasaspan Israel nacionpi runakunata tropa-tropata huñurqa.
7 Juda nacionpa reynin Josafatmanpas kaynatam willachimurqa:
—Moab nacionpa reyninmi contraypi hoqarikurun.
¿Paypa contranpi peleaq riwaqchum ñoqawan?
—nispa.
Chaymi Juda nacionpa reynin Josafat nirqa:
—Arí risaqmi.
Ñoqawan qamqa chullallam kanchik.
Runaykunawan caballoykunapas qamllapataqmi —nispa.
8 Tapurqataqmi:
—¿Maylawnintataq risunchik?
—nispa.
Chaymi Rey Joramñataq nirqa:
—Edom nacionman riq chunniq ñannintam risun —nispa.
9 Chaymi Israel nacionpa reynin,
Juda nacionpa reynin hinaspa Edom nacionpa reynin kuskanku rirqaku.
Qanchis punchawña chunniqninta muyuchkaptinkum soldadokunapaq yakunku pisirurqa,
pisirurqataqmi pusasqanku uywakunapaqpas.
10 Hinaptinmi Israel nacionpa reynin nirqa:
—Achachallawya kimsanchik reykunatam Tayta Dios huñuramuwanchik Moab casta runakunaman qoykuwananchikpaq —nispa.
11 Chaymi Rey Josafat tapukurqa:
—¿Manachum pipas kaypi kanman Tayta Diosmanta willakuq chaynapi paynintakama Tayta Diosta tapunanchikpaq?
—nispa.
Hinaptinmi Israel nacion reypa serviqninkunamanta huknin nirqa:
—Kaypim kachkan Safatpa churin Eliseo.
Payqa Eliaspa makinman yaku talliqmi karqa —nispa.
12 Rey Josafatmi nirqa:
—Payqa Tayta Diospa nisqantam willawasun —nispa.
Israel nacionpa reyninmi,
Edom nacionpa reyninpiwan hinaspa Rey Josafatpiwan rirqaku Eliseopa kasqanman.
13 Chaymi Israel nacionpa reyninta Eliseo nirqa:
—¿Imatataq munanki ñoqawan?
Taytaykipa chaynataq mamaykipa tapunan willakuqkunamanyá riy —nispa.
Chaymi Israel nacionpa reyninñataq nirqa:
—Manam,
Tayta Diosmi kay kimsan reykunata huñuramuwanku Moab casta runakunaman qoykuwanankupaq —nispa.
14 Hinaptinmi Eliseo nirqa:
—Llapallan Kamachiq Tayta Diospa qayllanpim kunan kachkani,
Juda nacionpa reynin Josafatllatam respetani,
mana chayqa manam yanapaykimanchu nitaqmi qawarikimanpaschu karqa.
15 Chaynaqa arpa tocaqtayá pusamuwaychik —nispa.
—Kay qechwapiyá achka yarqakunata kicharuychik.
17 Manam wayratapas nitaq paratapas rikunkichikchu,
kay qechwa yakuyoq rikuriruptinmi qamkunapas,
ganadoykichikpas chaynataq uywaykichikkunapas upyankichik.
18 Ñoqa Tayta Diospa kay rurayniyqa manam imapasraqchu,
ñoqaqa Moab casta runakunatapas makikichikmanmi churamusaq.
19 Llapa murallasqa llaqtakunatawan suma-sumaq llaqtakunatam vencenkichik.
Llapa allinnin sachakunatam kuchunkichik,
llapa pukyukunatam pamparunkichik,
llapa allinnin chakrakunatapas rumikunawanmi huntarachinkichik —nispa.
20 Nisqanpi hinamá paqarinnintinta,
Diosman ofrenda kañananku horapi,
Edom nacion lawman riq ñanninta yakukuna hamururqa hinaptinmi chaypi allpakuna yakuyoq rikurirurqa.
21 Moab nacionpi kaqkunam paykunawan peleananpaq reykuna risqanta yacharuspa armakuna manejay yachaq llapallan runakunata qayarurqaku hinaspam nacionpa linderonpi churakururqaku.
22 Paqarinnintinmi tutapayta hatarispanku chimpamanta qawaykurqaku chaymi yakukuna intipa kanchariyninwan yawar hina pukallaña paykunapaq rikchakarapurqa.
23 Chaymi ninakurqaku:
—Waqa yawarmi.
Ñoqanchikman hamuq reykunam kikinkupura peleaspa wañunarachikunku.
Chaynaqa imankutapas qechumunanchikpaqyá kallpasunchik —nispa.
24 Aswanqa Israel casta runakunapa kasqanman chayaruptinkum paykunañataq lloqsiramurqa chaymi Moab casta runakuna paykunapa ñawpaqninta lluptirqaku hinaptinmi Israelpa castankunaqa hayparuspa wañurachirqaku.
25 Llaqtakunatam tuñichirqaku.
Allinnin chakrakunamanpas sapakamam rumikunata wischurqaku huntarachinankukama,
yakuyoq pozokunatapas pamparuspam allinnin sachakunatañataq kuchuparurqaku.
Sayaspaqa-sayarqa Kir-hareset sutiyoq llaqtallañam ichaqa warakaqkunam muyuriqninpi churakuruspanku vencerurqaku.
26 Moab nacionpa reyninmi peleasqankupi vencerachikuspa espadayoq qanchis pachak peleaqkunata pusarikuspan atacaq rirqa Edom nacion reypa kasqanman ichaqa manam atirqachu.
27 Chayraykum kikinpa rantinpi rey kananpaq kaq piwi churinta hapiruspan murallapa hawanpi wañurachirqa,
paytaqa wañurachirqa ofrendata hina diosninman kañananpaqmi.
Israel casta runakunapa contranpi anchallataña Dios rabiaruptinmi Israelpa castankunaqa lloqsiruspanku llaqtankuman kutikurqaku.