—Yachasqaykipi hinapas qosayqa wañukunñam,

payqariki Tayta Dios respetaq runam karqa.

Debekusqay runa hamuruwaspanmi iskaynin qari wawaykunataña servichikunanpaq pusayta munachkan —nispa.

2 Chaymi Eliseoñataq nirqa:

—¿Imatataq munanki qampaq ruranayta?

¿kachkanchu imallaykipas wasikipi?

—nispa.

Hinaptinmi chay warmiñataq nirqa:

—Manam imaypas kanñachu,

kaspaqa-kachkan aysakuchaypi aceitellayñam —nispa.

3 Eliseom nirqa:

—Kutirispaykiyá vecinoykikunamanta prestakaramuy achka vacio aysakukunata.

4 Wasikiman yaykuruspaykiñataqmi wawaykikunallawan punkuta wichqakurunki,

llapallan prestakamusqayki kaqkunaman hillpuruspam huntasqanman hina huklawman churanki —nispa.

5 Nisqanpi hina pasaspanmi chay warmiqa wawankunallawan punkunta wichqakururqa.

Wawankuna aysakukunata haywaptinmi aceiteta hillpurqa.

6 Aysakukunapas huntaruptinñataqmi warmanta nirqa:

—Huk aysakutawanraq haywamuway —nispa.

Chaymi warmañataq nirqa:

—Manam kanñachu —nispa.

Chaynata niruptillanmi aceite tukururqa.

7 Diospa runanman willamuptinmi pay nirqa:

—Chay aceiteta rantikamuy debesqaykita paganaykipaq,

puchunwanñataqmi qanwan wawaykikuna vidaykichikta pasankichik —nispa.

8 Huk punchawmi Eliseo pasarqa Sunem llaqtachapa chawpinta.

Chaypim yacharqa ancha reqsisqa warmi.

Paymi Eliseota hikutaspan pusarqa wasinpi mikunanpaq.

Sapa kutilla chayninta pasaspanmi warmipa wasinpi mikunanpaq yaykuq.

9 Chay warmim qosanta nirqa:

—Kunanmi yacharuni wasinchikman hamuq runaqa Diospaq sapaqchasqa runa kasqanta.

10 Altospiyá cuartochata rurarapusunchik,

chaypiyá camata,

sillata,

mecherota churapusunchik watukamuwaspanchik chaypi samakunanpaq —nispa.

11 Huk kutipi chay wasiman chayaruspanmi rurapusqanku cuartochapi puñurqa

12 chaymi Giezi sutiyoq runanta nirqa:

—Wasiyoq señorata qayaramuy —nispa.

Qayaramuptinmi Eliseopa qayllanman hamurqa.

13 Chaymi Eliseoñataq runanwan chay warmita nichirqa:

—Tukuy imapas rurasqaykiwanmi favorecewachkankiku.

¿Imatataq munanki qampaq ruranayta?

¿Reytachu otaq tropakunapa kamachiqnintachu munanki favornikipi rimapayanaypaq?

—nispa.

Hinaptinmi chay señorañataq nirqa:

—Kay llaqtaypiqa hawkam kawsakuni —nispa.

14 Eliseom chay runanta tapurqa:

—Imatamá paypaqqa rurasunchik —nispa.

Hinaptinmi Giezeñataq nirqa:

—Señorapaqa manam wawan kanchu,

qosanpas machuñam —nispa.

15 Chaymi Eliseo nirqa:

—Qayaramuy —nispa.

Qayaramuptinmi chay señoraqa punkupi sayaykurqa.

16 Chaymi Eliseo nirqa:

—Watamanmi kunan hina tiempopi wawata marqarinki —nispa.

Chaymi señorañataq nirqa:

—Diospa runan taytáy,

amayá kay sirvientaykitaqa llullakuwaychu —nispa.

17 Eliseopa nisqanpi hinamá chay señoraqa wiksayakuruspan hamuq watapi chay nisqan tiempopi qari wawata wachakurqa.

18 Wawa wiñaruspanmi huk punchaw rirqa taytanman chakrapi rutuqkunawan kachkaptin.

19 Chaymi taytanta nirqa:

—Ay,

umallaymi nanawachkan —nispa.

Taytanñataqmi sirviententa kamachirqa:

—Mamanman aparuy —nispa.

20 Marqarikuspanmi mamanman chayarachirqa chaymi mamanpa millqayninpi chawpi punchawkama karuspan wañururqa.

21 Mamanñataqmi altosman aparuspan Diospa runanpa camanman churaykamurqa.

Sapallanta saqeykamuspanmi lloqsikaramurqa.

22 Qosanta qayaykuspanñataqmi nirqa:

—Huknin runata kacharamuway asnontinta,

Diospa runan Eliseopatayá rirusaq,

chayllam kutiramusaq —nispa.

23 Qosanmi tapurqa:

—¿Imamantaq paypataqa rinki?

Kunanqa manam ^amosoq killachu nitaqmi samana punchawchu —nispa.

Hinaptinmi chay warmiñataq nirqa:

—Ama hukmanyaychu —nispa.

24 Riysiqnin runawan asnonta caronaykachispanmi payta nirqa:

—Ñawpaqniyta riptikim qatisqayki.

Amam maypipas sayachiwankichu ñoqa ninaykama —nispa.

25 Pasaspanmá Carmelo Orqopi Eliseopa kasqanman chayarurqa.

Diospa runan Eliseo karullamantaraq Sunem llaqtayoq warmita rikuruspanmi sirvienten Giezita kamachirqa:

—Wak hamuqqariki Sunem llaqtayoq warmim.

26 Kallpaylla taripaykuspaykiyá tapuykamuy:

“¿Allinllachu kachkanki,

qosaykipas chaynataq wawaykipas allinllachu kachkan?”

nispa.

Chaynata tapuykuptinmi chay señora nirqa:

—Allinllam kachkaniku —nispa.

27 Diospa runan Eliseopa kasqan orqoman chayaruspanmi Eliseopa chakinta abrazakuykurqa.

Asuriykachinanpaq Giezi asuykuptinmi Diospa runan nirqa:

—Ama imanaychu sonqonpi ancha llakisqam kachkan.

Imamantam chayna kasqantaqa manaraqmi Tayta Dios willawanchu —nispa.

28 Señoram nirqa Eliseota:

—Taytalláy ¿ñoqaqa mañakurqaykichum qari wawata?

¿Manachum nirqayki ama llullakuwanaykipaq?

—nispa.

29 Chaymi sirvienten Giezita kamachirqa:

—Chaylla alistakuspayá tawnayta aparikuspa pasaypuni,

ñanpi piwanpas tupaspaykiqa amam rimaykunkichu nitaqmi pipa rimaykususqaykitapas chaskinkichu.

Tawnaytam warmapa uyanman churaykunki —nispa.

30 Warmapa mamanñataqmi nirqa:

—Kawsaq Tayta Diosraykum chaynataq qamraykum jurani,

manam saqesqaykichu —nispa.

Chaymi Eliseoqa chay warmiwan pasarqa.

31 Giezi puntaruspanmi warmapa uyanman Eliseopa tawnanta churaykurqa aswanqa manam warmapa samaynin karqachu nitaqmi kawsaypaq hinañachu karqa chaymi Eliseoman kutirispan willarqa:

—Warmaqa manam rikcharinchu —nispa.

32 Wasiman Eliseo chayaruptinqa hinallam warmaqa wañusqa Eliseopa camanpi chutarayachkasqa.

33 Eliseo yaykuruspanñataqmi punkuta wichqakaramurqa hinaspam warmallawan chay ukupi kaspan Tayta Diosta mañakurqa.

34 Wañusqa warmapa hawanman pakchanpa chutakuykuspanmi siminta,

ñawinta,

makinkunata warmapa siminwan,

ñawinwan,

makinkunawan tupanaykachirqa hinaptinmi warmapa cuerpon qoniriyta qallaykurqa.

35 Sayariruspanmi Eliseoqa wasipi kayman-chayman purikacharqa.

Kutiykuspanñataqmi yapamanta warmapa hawanman chutakuykurqa chaymi warmaqa qanchis kutikama hachinyaruspan qawarikururqa.

36 Eliseom Giezita qayaykuspan niykurqa:

—Wasiyoq señorata qayaykamuy —nispa.

Qayaramuptinmi nirqa:

—Kayqa wawayki,

apakuyñayá —nispa.

37 Yaykuruspanmi Eliseopa ñawpaqninpi qonqoranpa pampaman kumuykurqa hinaspanmi wawanta marqarikuspa lloqsimurqa.

38 Gilgal llaqtaman Eliseo kutiruptinmi chay lawpi hatun muchuy karqa,

Diosmanta willakuqkuna Eliseopa muyuriqninpi yachachinanpaq tiyaykuptinkum sirviententa Eliseo kamachirqa:

—Hatun mankata churkuspayki paykunapaq yanumuy —nispa.

39 Paykunapa hukninmi rirqa monteta mikunankupaq yuyu pallamuq.

Arwi-arwipa rurunta tariramuspanmi llikllan huntata pallaramurqa.

Wasiman chayarachispanñataqmi pikaparuspa yanukusqanku mankaman kamarurqa ichaqa manam yacharqachu ima plantapa rurun kasqantapas.

40 Mikunankupaqña qaranakuruspam malliykuspa qaparirqaku:

—Diospa runan,

kay mikuyqa venenoyoqmi kasqa —nispa.

Manaña mikuptinkum

41 Eliseo kamachirqa:

—Harinata apamuwaychik —nispa.

Qoykuptinkum mankaman talliykuspan nirqa:

—Runakunaman qaraychik —nispa.

Mikuruptinkuqa manañam paykunataqa imanarqapaschu.

42 Baal-salisa llaqtamantam huk runa apamurqa Diospa runan Eliseoman iskay chunka cebadamanta primicia tantakunata,

apamurqataqmi chayraq cosechasqa espigayoq trigotapas.

Eliseom sirviententa kamachirqa:

—Runakunaman qoykuy mikunankupaq —nispa.

43 Chaymi sirvientenñataq nirqa:

—Imanispataqsi pachak runakunamanqa kaychallataqa qoykusaq —nispa.

Chaymi Eliseoñataq nirqa:

—Qoy runakunaman mikunanpaq,

Tayta Diosmi nin:

“Mikuptinkupas puchunqaraqmi” nispa.

44 Runakunaman qoykuptinmi mikurqaku aswanqa puchururqaraqmi Tayta Diospa nisqanpi hina.