Hanaq pachaman Elias hoqarisqa kasqanmanta
2
Tayta Dios remolino wayrawan Eliasta hanaq pachaman hoqarinanpaq kaptinmi Gilgal llaqtamanta Elias rirqa Eliseowan.
2 Eliasmi nirqa Eliseota:
—Tayta Diosmi Betel llaqtaman kachawachkan,
ama hina kaspaykiyá kayllapi kachkay —nispa.
Chaymi Eliseoñataq nirqa:
—Kawsaq Tayta Diosraykum chaynataq qamraykum jurani:
Manam qepaymanchu,
qatisqaykipunim —nispa.
Chaymi kuskanku Betel llaqtaman rirqaku.
3 Betel llaqtapim yacharqaku Diosmanta willakuqkuna,
Eliseo chaskiq llaqtamanta lloqsispankum payta nirqaku:
—¿Manachum yachanki patronniki Eliastaqa kunan punchaw Tayta Dios qanmanta hoqarirunanta?
—nispa.
Chaymi Eliseo nirqa:
—Arí,
yachanim,
upallaychik —nispa.
4 Yapamantam Elias nirqa:
—Tayta Diosmi Jerico llaqtaman kachawachkan,
ama hina kaspaykiyá kayllapi kachkay —nispa.
Hinaptinmi Eliseoñataq nirqa:
—Kawsaq Tayta Diosraykum chaynataq qamraykum jurani:
Manam qepaymanchu,
qatisqaykipunim —nispa.
Chaymi kuskanku Jerico llaqtaman chayarurqaku.
5 Jerico llaqtapim yacharqaku Diosmanta willakuqkuna,
paykunam Eliseoman asuykuspa nirqaku:
—¿Manachum yachanki patronniki Eliasta kunan punchaw Tayta Dios qanmanta hoqarirunanta?
—nispa.
Chaymi Eliseo nirqa:
—Arí,
yachanim,
upallaychik —nispa.
6 Chaymantam Elias nirqa Eliseota:
Tayta Diosmi Jordan Mayuman kachawachkan,
ama hina kaspaykiyá kayllapi kachkay —nispa.
Hinaptinmi Eliseo nirqa:
—Kawsaq Tayta Diosraykum chaynataq qamraykum jurani:
Manam qepaymanchu,
qatisqaykipunim —nispa.
Chaymi kuskanku pasarqaku.
7 Diosmanta willakuq pichqa chunka runakunam paykunata qatimuspanku karu chimpankupi sayaykuspa qawarqaku,
Eliaspiwan Eliseoñataqmi Jordan Mayupa patanpi sayarqaku.
8 Eliasmi capanta pataraykuspan mayuta waqtarqa.
Mayu kichariykuptinmi iskayninku chimparurqaku chaki allpanta.
9 Chimparuptinkuñataqmi Eliseota Elias nirqa:
—Qampaq imapas ruranayta munaspaykiqa mañakuway manaraq qanmanta rakikuchkaptiy —nispa.
Eliseom mañakurqa:
—Espirituykimanta herenciata hina huk chaynatawan qoykuway rantikipi aqepanaypaq —nispa.
10 Eliasmi nirqa:
—Sasa rurana kaqtam mañakurunki.
Qanmanta rakikusqayta rikuspaykiqa mañakusqaykitam chaskinki,
mana rikuspaykim ichaqa mana chaskinkichu —nispa.
11 Rimastin paykuna richkaptinkum rupachkaq caballokunapa aysasqan rupachkaq carreta rikuriykuspa paykunata rakirurqa,
remolino wayrapa hoqarisqanmi Elias hanaq pachaman hoqarikururqa.
12 Eliseom Eliasta qawarispan qaparirqa:
—Taytáy,
taytáy Elias,
Israel nacionpaqmi carretakunawan caballopi sillada tropakuna hina karqanki —nispa.
Chaymantapunim manaña Eliasta rikurqañachu.
Eliaspa rantinpi Eliseo kasqanmanta
Eliseoñataqmi pachanta hapispan iskayman llikirurqa.
13 Eliaspa wichiykachisqan capanta hoqariykuspanmi kutirirqa hinaspam Jordan Mayupa Patanpi sayarqa.
14 Eliaspa wichiykachisqan capanta hapispanmi mayuta waqtarqa:
—¿Maypitaq Eliaspa yupaychasqan Tayta Diosqa kachkan?
—nispa.
Chaynata nispa waqtaruptillanmi mayu kicharikuykurqa chaymi Eliseo chimparurqa.
15 Jerico llaqtapi kaq willakuqkuna chimpanmanta qawaspam ninakurqaku:
—Eliaspa espiritunmi Eliseopiña kachkan —nispa.
—Kaypim ñoqaykuwan kachkan pichqa chunka kallpasapa runakuna.
Paykuna rispankuyá servisqayki Eliasta maskaramuchunku,
ichapas Tayta Diospa espiritun hoqariruspan chay-chay orqopi otaq qechwapi saqerun —nispa.
Eliseom nirqa:
—Amaña kachaychikchu —nispa.
17 Paykuna huktawan-huktawan niptinkum Eliseoñataq penqarikuspa nirqa:
—Kachaychikyá —nispa.
Chaymi paykuna kacharqaku chay pichqa chunka runakunata.
Kimsa punchaw Eliasta maskamuspankum manaña tarimurqakuchu.
18 Jerico llaqtapiraq Eliseo kachkaptinmi Elias maskamuqkuna kutiramurqa chaymi paykunata nirqa:
—¿Manachum nirqaykichik amaña rinaykichikpaq?
—nispa.
Jerico llaqtapi pukyuta Eliseo allinyachisqanmanta
19 Jerico llaqtapi kaq runakunam Eliseota nirqaku:
—Señorllayku,
rikusqaykipi hinam kay llaqtapa kasqan sitioqa allin sitio,
ichaqa yakunmi mana valeq,
allpankunapas qala allpam —nispa.
20 Eliseom nirqa:
—Mosoq mankata apamuwaspaykichik chayman kachita hinamuychik —nispa.
—Tayta Diospa nisqantam kaynata nirqa:
—Ñoqam allinyachini kay yakuta,
manañam kunanmantaqa wañuypas nitaq qala allpapas kanqachu —nispa.
22 Chay punchawmantapunim Eliseopa nisqanman hina chay yakukunaqa tomanapaq hinaña karqa.
23 Jerico llaqtamantam Eliseo pasarqa.
Wichayman riq ñanninta Betel llaqtaman richkaptinmi llaqtamanta lloqsimuq warmakuna paymanta burlakuspanku qayaykacharqaku:
—Yaw paqla,
seqay,
yaw paqla,
seqay —nispa.